火土燒肉

餐廳位於K11 Art Mall，門口有露營打卡位，而裝潢由枱凳到餐具都用上露營裝備，唔講唔知以為自己真係去咗轉glamping ⛺️ 食物方面主打燒肉同海鮮，亦有多款炸物、小食、甜點、飲品供應，打卡able又好食，絕對值得到訪😋前菜有黑醋冰番茄沙律同椰菜火山胡麻沙律，估唔到份量咁多，超級澎湃，前者酸甜開胃，後者清新解膩，感覺健康，配肉一流😎 牛雞豚套餐包括自選燒肉、前菜、白飯同湯～ 牛肋肉鮮嫩多汁、豚五花肥瘦適中、雞肉嫩滑唔嚡口，值得一讚嘅係全部已經醃製過，唔洗額外點燒汁都夠曬入味！蔬菜有蒜蓉牛油本菇、金菇同牛油粟米粒，望住牛油慢慢融化然後滲入配料裏面嘅感覺真係好正，配埋碗白飯就最合適不過了💕 另外私心推介紫番薯甘栗餅同厚燒玉子蛋，冇諗過紫薯味咁出而且好足料，搭配粒粒甜栗子令到整體口感更加豐富～ 玉子蛋一定要放落去燒，暖暖地同時帶點淡淡嘅蛋香味，食完都幾飽🙈最後當然唔少得以甜品作結，雲呢拿雪糕有黃豆粉同抹茶口味，雪糕奶味香濃，食落軟滑，非常解膩，旁邊仲有蕨餅添，會話係大滿足呀！蜜桃蛋卷都唔錯，賣相可愛，一口一粒，甜甜地咁都幾好味，開心🥳