老闆娘雲南米線

營業中

休息中

呢間米線專門店係網上同報紙都見過唔少關於佢既報導，個個都話要排好耐隊先有得食，攪到我都想試下究竟佢d米線係咪真係咁特別，值得排咁耐隊黎試。是日星期六，我地大約12點幾到達，店外已經有幾十人排緊隊，由於店內座位唔多，我地要等兩輪先至可以入座。店鋪位於荃灣香車街熟食中心，講真環境真係唔多舒適，初初到達都有d想離開，但到見到咁多人排隊，決定點都要試下。由於太多人排隊，店方為左令到客人可以快d食到野，早係排隊時已經為我地落單，所以坐低後無耐就可以食啦。一碗米線要成＄42，只包一個餸，如果要多一個，就要加多＄10，感覺有d貴。湯底方面有好多選擇，包括酸辣，麻辣，麻酸辣同埋蒙古湯，可以揀唔同既辣度。今日試既係麻辣小辣米線，配菜要雞肉。上菜之後第一時間試下個湯底，真係非常入味，辣度剛剛好，感覺非常過癮，除此之外，雞肉份量都好多，入口非常嫩滑，整體味道真係無得頂呀。呢度雖然環境唔太理想，但係d米線真係好好味，唔怪之得點解個個都要爭住排隊黎食啦。