○de▽ 鯛白湯らーめん

營業中

休息中

星期五晏晝閃去中環食午餐，等到一點半先食諗住冇人等，點知都係要排一陣隊，但都值得，果然名不虛傳，食到好好味嘅魚湯拉麵。舖頭唔係好多麵款俾你選擇，要喺入去之前揀定拉麵，俾定錢，等咗30分鐘度就有得入，算係快。我哋兩個人揀咗三個麵，因為想一次過試哂，仲叫咗蛋及炸雞，好痴線竟然食得哂。鯛沾麵 $148，好特別賣相，打卡必叫，亦都真係好好味，麵本身似刀削麵，個湯係濃嘅魚及湯，開頭以為咖哩咁，但原來係濃濃嘅魚香沾汁。入面暖暖嘅醬汁仲有啲魚肉，沾麵食一流。鯛白湯 $138 及櫻木煙熏糖芯蛋 $15，啲湯好好味，濃但唔會飽滯，黃色嘅係柚子蓉，點少少食，會令啖麵加湯有一陣清甜味。鯛清湯 $138，個清湯好好味，魚皮非常脆口，夠厚，唔會因為浸湯耐咗而軟林林。朋友唔鍾意食魚皮試咗一啖後都話好食。日式炸雞 $48，一啲都唔油膩，炸得好香，點唔點側邊個咖哩粉都咁香口。兩個人嘅單合共$487，開頭見到每個麵都超過100蚊，但食完覺得絕對值得再嚟食，同埋如果叫多支啤酒飲，會更好味。