嵐山日本料理

營業中

休息中

喺尖沙咀同個客食飯，佢話想食日本野，見到《嵐山日本料理》咁多好評就去試下。我哋坐吧枱，全場氣氛都熱鬧幾好。店員先送上前菜分別加左柚子醋嘅車厘茄、海帶蜆肉同醃蘿蔔，幾醒胃，食完即刻好肚餓。先來一個刺身拼盤裏面有帆立貝、赤貝、北海道牡丹蝦、銀鱈魚同拖羅，樣樣都好有光澤，非常鮮甜。平時食銀雪魚都係西京燒，今次刺身嚟食又滑又肥美，有啲似油甘魚腩。然後係三件壽司分別係鯛魚壽司、火炙太刀魚壽司同火炙赤鯥魚壽司。我最鍾意食火炙赤鯥魚壽司，因為經火炙，魚油迫晒出嚟，加上焦香，好正！燒物方面，我哋叫咗串燒雞皮、串燒雞翼、串燒黑豚蘆筍同燒鮑魚。我最鍾意食串燒雞皮，脆卜卜又鹹鹹地。鮑魚好多時燒得唔好，會好似食擦子膠，呢度火候控制得好好，柔嫩帶咬口。店員介紹我哋點紫薯甘栗薯餅。攞過嚟嗰陣時熱辣辣外層好鬆脆，裏面啲紫薯蓉好香，仲有啲一粒粒栗子咬下，唔錯！牛油焗帶子金菇，牛油濃郁，而且仲在好多片帶子。烏冬一向係我最愛,幾飽都要叫。稻庭泡菜黑豚肉石鍋烏冬，煙煙韌韌，泡菜辣辣地，約有五六片豚肉，大滿足。