海福樓 (已結業)

唸住帶呀仔到黃埔冒險樂園玩, 對上一次去已經是兩年前既事, 唔通因為今年🌻夏天真係太熱, 好多父母都好似我地咁, 帶小朋友到有冷氣既室內遊樂場玩, 今日真係超級爆多人, 同兩年前既情況差好遠。先到附近食LUNCH, 搵左呢間可以網上訂位, 評價不錯同早少少開(11點)既餐廳。我地點左蝦餃, 香菇滑燒賣, 百花蒸釀魚肚, 蜂巢芋角, 蠔王叉燒包, 春風得意腸粉同荔茸西米焗布甸。最先到既係焗布甸, 好好味, 鍾意食焗布甸既朋友唔好錯過, 芋茸份量足仲食到芋頭粒粒, 香甜綿滑。春風得意腸粉 - 就算放耐左都依然外脆內軟, 入面有新鮮蘿蔔絲同蝦肉, 最開心係無我唔鐘意既芹菜, 蔥, 芫茜...蜂巢芋角 - 蜂巢鬆化, 芋泥綿密, 調味剛好, 比上兩個星期觀塘孔夫子食到既好味。蝦餃 - 餡料新鮮但蝦餃皮做得偏厚也略嫌乾身左D, 呢個就孔夫子做得好食好多。百花蒸釀魚肚 - 🔥熱辣辣, 厚身魚肚軟滑多汁, 不錯。燒賣 - 我無食, 老公話豬肉新鮮啖啖肉, 水準之作。叉燒包 - 肯定好好食, 成籠比我仔清左。海福樓點心價錢合理份量足, 加上舒適的座位裝修, 下次一家人再過黎玩可以encore。