瘋狂小面 (佳德商業大廈)

營業中

休息中

今晩俾朋友仔捉咗去中環試下川菜，本身聽到食四川嘢都嚇到有小小腳仔軟，仲要係中環。諗住會超貴但原來價錢都好親民喎。即刻鬆一口氣。豆漿豆味濃郁，唔係好甜，啱我口味。本身諗住嗌蒸蛋，話係用高湯蒸。可惜今日只限有 15 份，所以我哋都無緣食。最後就我所以叫咗碟鹵水拼盤 (+68) 小食。拼盤有牛肚、牛脷、豬肚和牛展。這種白老鹵屬輕鹵，所以味道較為清淡，同平時食台灣菜啲濃味鹵尾截然不同。另外仲會上一碟仔辣椒粉，嫌唔夠濃味可以點下。小食就叫咗棒棒雞 (+25)，必食！雞用中辣椒泡製，食落又唔算好辣。雞肉嫩滑有咬口，好惹味。朋友嗌咗個紅湯瘋狂肥腸麵。原來四川嘅肥腸一啲都不肥，淨係得皮。正宗做法係師傳會花功夫將白色嘅肥除去，佢哋嘅習慣係唔食一圈圈嘅嘢。走咗肥嘅肥腸嘅特别又好食！我驚太辣，所以嗌咗個唔辣嘅白湯瘋狂牛肉麵。白湯係用豬骨同雞汁熬成，發清甜又唔油膩，真心好食。甜品叫咗一個四川流行小食醪糟粉子，粉子軟糯，汁甜味醇。味道唔會太甜，粉子煙煙韌韌超好食。