叁樓火鍋 (已結業)

今日去咗一間好有風味嘅火鍋店，位於尖沙咀堪富利士道嘅一座大廈嘅3樓。入到去發現裝修別有洞天，係一個比較古色古香嘅風格。店內每張枱都係圓枱，位置比較闊落，非常鬆動。入座後店員會放低個調味盤，值得一提既係入面既蒜油係佢地自家制，用黎做醬油碟一流，好香！我地叫左個鴛鴦鍋：麻辣鴨血粒粒蜆鍋-好足料，有唔少芽菜、鴨血同蜆，啲蜆好乾淨唔會食到沙。重芫荽皮蛋滑豆腐濃湯鍋-超大量芫荽，岩曬好荽之人，鍋內豆腐真係超級無敵滑！頂級安格斯牛肉打邊爐一定係叫安格斯牛肉，牛味濃厚，肉質細嫩又唔會靭。伊比利正豚肉肥瘦均勻，食落彈牙，味道鮮香。鮮蝦雲吞併韭菜餃：粒粒飽滿大隻，皮薄爆餡，雲吞方面食到原隻鮮蝦，而韭菜餃就充滿撲鼻而來既香味。手打鮮蝦丸併鮮牛肉丸：夠彈牙軟滑，蝦肉唔會打得太碎，入口仲食到少少顆粒感。響鈴：係新鮮炸出嚟嘅，上枱時仲熱辣辣，而且聞到一陣陣油香味，超邪惡。蔬菜併盤：有4種菜款，包括粟米、蕃茄、白菜仔同油麥菜，都好新鮮，尤其係粟米好甜，粒粒肉都好飽滿。小食-奇妙炸雲吞：炸完既雲吞再配上胡麻醬又幾新鮮既組合。最後，值得一提係店員都非常友善，仲會周不時會幫手斟下茶，換下碟！