Banabana (已結業)

喺一個悶熱嘅夜晚，行經旺角街頭，本來想去買杯珍珠奶茶，一㩒OPENRICE,先知有間新嘢開咗，即刻嚟試吓先。 小店核心業務係賣SMOOTHIE,舖仔細細，裝修得好似化妝品專櫃。大大個燈箱教客人自訂「升空計劃」？！原來因為呢度賣沙冰，會叫客人先拎一隻穿梭機，再揀三款蔬菜或生果嘅「星球」,放入穿梭機，交比店員，即叫即做，等10分鐘左右就有得飲。除咗好玩，每款材料盒上會標明每份材料所含卡路里，令怕肥又為食嘅客人熱量攝取量都一目了然。其本一杯三款材料嘅沙冰係$28,但個別材料要加多$3$34 MANGO-BANANA-MANGO我點咗芒果-蕉-芒果，由於芒果要加$3,所以要比多$6。一交隻穿梭機同比錢，店員即刻比到張卡路里表我,原來一杯12安士已經有248卡路里！不過男人老狗唔理咁多，飲咗先講。唔使5分鐘已經有得飲，果果好天然，無乜添加糖，最重要係唔會凍到個口僵晒，可以大啖大啖飲，相比台式非天然化學科研合成嘅奶茶，夏天消暑都係果汁優勝啲，而且呢度有成28個星球，每次都有新口味，啱晒貪新鮮嘅香港人。