幸屋

營業中

休息中

灣仔其實有好多小店，平時返工lunch time得一個鐘，真係好難去發掘啲未食過既餐廳，只能夠放左工後。今日俾我無意中見到呢間新開既日本餐廳，門面裝修得好有日本feel ，以為只有拉麵食，原來仲有丼飯！所以同事和我各叫一款試下。店員好細心咁講解餐牌上既各種拉麵，最後叫左胡麻王芝麻湯底拉麵！大大塊既薄叉燒，肥瘦適中，一啲都唔鞋。而且最欣賞個蛋係溫泉蛋，一咬就流心！好好味，仲要成隻上，唔似其他餐廳得半隻！而湯底好濃，有黏口既感覺，伴著濃郁芝麻味，唔過咸！拉麵係幼麵，我選左正常軟硬度，所以口感都做到，係我個人喜歡既拉麵！朋友叫左原條鰻魚丼飯，一黎到就聞到好香既燒汁味！朋友說鰻魚無骨，鰻魚汁咸甜剛剛好，而肉質嫩滑，都幾厚身，份量都大條，可以食曬成碗飯！最後我地叫埋小食！鹽燒牛舌、燒手羽！牛舌都幾厚！雞翼燒得好香，成隻食完好想再叫多隻！無奈要減肥，都係抑制一下食慾。下次lunch又一好選擇啦！