巧得鍋 (已結業)

朋友曾經介紹過呢間餐廳，話幾好食又性價比好高，今日食晏時候喺觀塘地鐵站附近，就特登行過去試吓，兩三分鐘就行到。叫咗$68嘅「蘿蔔清湯牛腩飯」，包前菜同高原野生蕎麥茶，另加$8仲可以叫特飲。「蘿蔔清湯牛腩飯」好快就嚟到，非常熱辣辣香噴噴，大大一碗賣相幾好😍。牛腩炆得非常軟熟，好有牛味；白蘿蔔好嫩好滑好甜好腍，完全冇渣；牛腩清湯除咗有濃郁嘅牛肉味，仲有強勁胡椒味，好正；飯量就超多；多到我食唔晒😆仲叫咗原價$32嘅「檸檬青蘋果特飲」，裏邊有青蘋果蓉、碟豆花、檸檬、薄荷葉，依家跟餐只需要$8。凍冰冰有好香濃嘅青蘋果同檸檬味，配合埋一齊幾夾幾好飲。食得超飽，朋友冇介紹錯😊