影片
更多
2024-01-02
747 瀏覽
1月1號第一餐諗住食得好啲，特登揀嚟呢度食Weekend Brunch Buffet，點知中哂伏餐廳位於蘭桂坊加州大廈，同一集團喺呢幢大廈有幾間餐廳，而且都有做Weekend Brunch Buffet，認真睇晒所有Menu後，加上有YouTuber吹捧到呢間啲海鮮好高質，最終揀咗呢間，仲特登事前Full Pay先訂到枱，用餐時間12-3pm，好期待㗎。12pm準時去到餐廳，其實有畀餐廳個環境同Buffet枱驚豔到，樓底高而且裝修靚，Buffet枱主角凍海鮮區生蠔、龍蝦、蟹腳、麵包蟹、龍蝦鉗、麵包蟹鉗、蛤仔同蝦樣樣齊，而且有晒橙色膏，心諗今次值回票價啦，坐低安頓好就出去攞嘢食。凍海鮮區係由職員代夾，其他區就自己夾。第一次我唔知規矩，同佢講樣樣都要，佢就每樣夾一件俾我，OK試吓先都好嘅，但Buffet枱就搵極都搵唔到檸檬同相關醬汁，算，照食；第二次開始見到啲人可以同佢講數量，就攞咗3隻生蠔、2件半邊龍蝦、1件半邊麵包，今次個職員有夾檸檬俾我，原來連檸檬都要佢夾，OK仍然好好食，呢個時候我哋仲沉醉在今年美好的第一餐之中…到第三次出去，講緊只係12:30pm，就已經冇晒龍蝦、蟹腳同麵包蟹，O
餐廳位於蘭桂坊加州大廈，同一集團喺呢幢大廈有幾間餐廳，而且都有做Weekend Brunch Buffet，認真睇晒所有Menu後，加上有YouTuber吹捧到呢間啲海鮮好高質，最終揀咗呢間，仲特登事前Full Pay先訂到枱，用餐時間12-3pm，好期待㗎。
12pm準時去到餐廳，其實有畀餐廳個環境同Buffet枱驚豔到，樓底高而且裝修靚，Buffet枱主角凍海鮮區生蠔、龍蝦、蟹腳、麵包蟹、龍蝦鉗、麵包蟹鉗、蛤仔同蝦樣樣齊，而且有晒橙色膏，心諗今次值回票價啦，坐低安頓好就出去攞嘢食。
凍海鮮區係由職員代夾，其他區就自己夾。第一次我唔知規矩，同佢講樣樣都要，佢就每樣夾一件俾我，OK試吓先都好嘅，但Buffet枱就搵極都搵唔到檸檬同相關醬汁，算，照食；第二次開始見到啲人可以同佢講數量，就攞咗3隻生蠔、2件半邊龍蝦、1件半邊麵包，今次個職員有夾檸檬俾我，原來連檸檬都要佢夾，OK仍然好好食，呢個時候我哋仲沉醉在今年美好的第一餐之中…
到第三次出去，講緊只係12:30pm，就已經冇晒龍蝦、蟹腳同麵包蟹，OK未refill得切啫，等陣出去再攞囉，食啲沙律菜先啦，12:45pm再出去，都係冇refill，於是開口問職員，點知驚嚇嘅事就發生啦，佢話已經冇晒啦，仲理直氣壯咁解釋，話琴晚除夕晚餐full house好多人食，所以啲凍海鮮冇乜存貨，叫我食其他嘢，我聽到好愕然，個brunch buffet只係開始咗半個鐘，就已經冇哂龍蝦、蟹腳同麵包蟹？我嘗試搵另一個職員再問，都係得到同一答案，而且都係同一理直氣壯態度。
呢個時候我已經大受打擊，唯有轉去攞個羅餸湯飲，去到嘅時候好大浸燶味，我以為係廚房傳出，唔理，照攞湯返位，想飲之際發現真係唔對路，完全係煲燶嘅味道，於是同職員講，點知佢又處變不驚咁答案係煙熏味，OK可能係我唔識嘢，但燶味太勁入唔到口算啦唔飲，點知再出去攞嘢嘅時候，見到三個職員圍住煲湯研究，最後成煲湯拎走，換咗個龍蝦湯。
之後去麵包區諗住食包充飢，點知佢係一條手臂咁長嘅法包，完全冇切開，亦都冇放刀放喺度畀人切，除咗我都有其他食客望住個法麵束手無策，最終有職員攞把長刀出嚟切，我同其他食客先至可以有麵包充飢。
既然冇龍蝦、蟹腳同麵包蟹，其他凍海鮮都食住先啦，點知呢間餐廳再出現一個嶄新嘅問題，冇碟用，行埋去凍海鮮區嘅時候，職員為咗更好地用僅餘嘅碟，逐個排隊嘅食客問「你攞得多唔多㗎？」，我聽到呢個問題之後真係好大壓力，只好回答要生蠔同龍蝦鉗，職員聽到之後就用隻細碟夾畀我，之後我都唔好意思再攞，而同一問題都出現喺甜品區，去到最後完全冇碟攞蛋糕同雪糕，我又開聲問職員，結果驚喜一浪接一浪，職員直接將放食物區放夾嘅碟攞起隻夾遞俾我，我咁大個仔真係第一次見，最後我堅持叫佢畀熱飲杯我裝雪糕。
以為咁樣已經好伏？仲有㗎！我哋特登加咗$208要free flow酒類，根據餐牌係包括紅白啤酒同香檳，都飲咗好幾杯嘅，點知2pm再有職員就通知我哋，free flow要last order啦，問我哋仲有咩想要，我即刻問brunch buffet唔係食到3pm咩？佢答係，但free flow只係兩個鐘，我真係吹漲。事後睇返個Menu，連埋啲細字，都冇提及得兩個鐘。
成個Weekend Brunch Buffet加埋每位近$800，我冇諗過係咁，食物質素唔差㗎，但係開始半個鐘就唔refill龍蝦、蟹腳同長腳蟹㗎啦。隔籬枱1pm先入座，我真係鄧佢哋慘，成餐飯都有唔少人投訴，小職員當然冇辦法啦，但有個着黑色西裝背心嘅疑似經理，眼見情況失控紙包唔住火，索性匿埋喺Reception，其實去到1:30pm又點會再有客入嚟吖，匿埋喺嗰度純粹真係唔想面對。
一心一意諗住新年食餐好嘅開年飯，點知搞到咁，仲要聽咗咁多大話、不合理理由，真係好嬲，而家成日話啲人返大陸玩同食，香港啲餐廳點慘點慘，但今次嘅體驗我都好慘，冇心做就唔好嘥人時間啦，呢個價錢可以食到好好嘅酒店brunch buffet，直頭對同集團所有餐廳都失去信心，以後要食真係正正經經搵間酒店食好過。如果餐廳有回應，我都想聽吓。
P.S. 取餐區地板長期濕滑，好多人都跣一跣，餐廳最後放咗幾塊白布鋪地，但好快俾人踩到黑晒，個畫面仲肉酸過大排檔，完全無言。
張貼
