名屋拉麵 (已結業)

今日就同friend去咗荃灣嘅名屋食拉麵。荃灣不嬲都多好嘢食嘅，唔知係咪因為呢間拉麵嘅位置就比較僻，所以夜晚去嘅時候都唔多人，唔使等位。不過真心價錢好公道，所以都覺得慢慢會有越來越多客人。環境方面，都幾乾淨，又有洗手間提供。店舖都幾大，幾寬敞。有吧枱位坐，幾有日本嘅風味。因為今次我哋四個人，所以就冇坐吧枱。食物方面，我就叫咗個黑豹墨汁拉麵。配料有勁多海鮮，啱晒我呢個海鮮迷，有蟹柳、蝦、蟹子、青口。款款海鮮都好新鮮，我就尤其欣賞佢加左蟹子。青口同蝦，亦都幾大隻。通常啲拉麵店都有得揀軟硬度，名屋除咗有得揀軟硬度之外，仲有得揀直麵或者曲麵。佢嘅麵質亦都幾煙韌。餐牌亦都有好多串燒可以點。今次我哋就叫左香辣雞翼、珍珠番薯、鯖魚、豬頸肉、鐵板蒜蓉牛舌。串燒嘅價錢亦都非常之合理，細細份，每款都可以食試少。本人尤其欣賞佢嘅鯖魚，我本身唔太鍾意食魚，今次朋友叫咗就試一試。點知一試返唔到轉頭，仲同朋友爭魚嚟食。鯖魚配佢個醬汁，食到停唔到口。名屋算係一間高質嘅拉麵店，價錢亦都非常之平民。環境整潔、店員服務態度好有禮貌，值得一讚。下次一定會再帶家人朋友黎食拉麵。