Give Me 5 (已結業)

食肉獸又出黎覓食，今次黎到“任食牛扒之夜”，200蚊左右可以任食牛扒、羊髀肉、薯條薯菜、沙律、甜品、餐湯、蒜蓉包，仲要普通飲品任飲，幾抵食。路就唔難搵嘅，地鐵站一出行一陣就搵到。最奇怪嘅係openrice話餐廳在5樓，餐廳的確在電梯5樓一出就係，但全部poster（甚至連餐廳門口嘅poster）都話餐廳係4樓，明明4樓就係教會，搞到差d入咗去聽聖詩。講返食物，沙律吧有6款菜，全部都唔錯------除咗個蘑菇，咬落竟然去會頓時散曬，好似食緊擦膠咁，嚇親。餐湯唔錯幾好飲，點蒜蓉包一流，蒜蓉包好脆，略嫌蒜蓉唔太夠。到正餐牛扒羊髀肉，牛扒一次攞兩小塊，雖然唔多，但來回食幾轉一定夠飽肚，味道都唔錯，食得出香牛味，同平時自助餐食嘅嘅差唔多，呢間仲厚切d添。羊髀肉就睇服務員切幾多就食幾多，反正來回幾輪一定飽，羊髀肉好好食，唔會好騷，口感好好，好彈牙。我地叫咗一碟薯角，分量好多，夠曬兩個人食，薯角好脆，熱辣辣，真係一流。最後食埋甜品，一碟細細份，質素中規中矩，反正甜品唔係今晚嘅主角。最後要讚一讚員工嘅服務效率，食完嘅碟真係秒速收好，辛苦曬。