Wagyu Ya (已結業)

尖沙咀有間新開張嘅日式燒和牛店，熱愛和牛嘅我當然要親身到訪。店鋪有Bar枱同埋Table枱揀。我地就揀左坐Bar枱，除左可以欣賞到廚師將一片片精緻嘅和牛切好擺盤再端上前，又可以聽下廚師講解每款和牛嘅特色。食燒肉又點少得美味嘅醬汁！呢度嘅醬汁包括燒汁、酸汁同岩鹽，其中酸汁係師傅親自主理，希望客人食燒肉享受油潤肉質之時，可減低油膩感。肉食者Meat Eater ($688) 拼盤擺得好靚好吸睛，見到已令人食慾大增😇 有A5和牛西冷、牛舌、牛肉眼同埋牛肩胛，師傅建議先食油脂無咁多嘅牛舌，再食油脂較多嘅另外三款牛。厚切牛脷好新鮮好爽口，配岩塩剛好。肉眼油脂豐富，食落好似大拖羅咁，入口即溶。西冷就帶有濃濃肉味，肉質軟稔，油花平均，食落都有溶化嘅感覺！A5吉列和牛咖哩飯 ($388) 吉列牛外層炸得香脆，中間肉質呈現嫩紅色，雪花均勻。和牛肉質細嫩幼滑，外脆內軟，水準十分高。