阿叔泰麵 (西菁街) (已結業)

元朗都有船麵食！呢間阿叔泰麵獨沽一味只賣船麵同少少小食，呢日就特登同男友去試下！小店人氣好旺，630pm已經坐滿人，大概等咗10min就可以入座啦！揀咗一碗牛肉船麵($58)同一碗雞肉船麵($52)。每碗船麵都有炸豬皮，賣相正宗，而且可以自選麵條。牛肉船麵有新鮮牛腩同牛丸，不過牛腩份量好少，牛丸亦細細粒唔夠彈牙，肉味一般，反而我欣賞個金邊粉夠咬口，唔會太淋，麵質唔錯。湯底亦飲得出有誠意，用牛骨熬成，無味精，味道鮮甜。雞肉船麵有三隻雞槌同雞腎，份量比較足，感覺性價比較高，哈哈。河粉好滑身，亦唔會太淋，麵質確係幾好。我哋仲試咗三食雞翼拼盤($58)，三款雞翼包括：紅咖喱、香茅魚露同酸辣凍雞翼，味道特別。我最鍾意食香茅魚露雞翼，充滿香茅香味，雞翼亦嫩滑juicy。酸辣凍雞翼係好開胃嘅小食，酸酸辣辣，非常過癮，不過我唔太食得辣，食到後期真係有D辣。