大滾友火鍋

營業中

休息中

行完街肚餓餓地，一於就去打邊爐啦。呢度近西鐵站附近，交通方便又就腳，裝修風格行中國風。入座嘅時候，職員會幫我哋煲滾水洗碗碟，食得安心又放心。 醬介 $22（2位）九宮格嘅醬料任揀，有蔥、芫荽、熟芝麻、辣椒🌶️、涼拌青瓜，仲有餐廳自製嘅乾蔥油，未食已經聞到香味。玲瓏浮凸·花膠雞湯鍋（半隻）$298招牌湯底，雞湯濃郁鮮美，餐廳採用三黃雞，肉質嫩滑，花膠又軟又糯，滿滿嘅膠原蛋白。日本九州A4和牛拼盤（特價食品）$698今次食豪啲，嗌咗平時唔捨得食嘅和牛拼盤，賣相已經好吸引，仲有乾冰噴霧好適合打卡，仲有標籤識別每個部位啲肉，有腹心肉、腹協肉、封門柳被⋯⋯脂肪分布均勻，入口即溶，一次過試曬唔同部位嘅肉，真係大滿足，果然係一分錢一分貨。新鮮蟶子（4隻）$198係來自蘇格蘭嘅蟶子皇，濃厚鮮甜，質滑柔嫩卻帶點爽脆。羊肉片 $138厚薄適中大大片，份量唔少，唔會太膻。職員態度好，不時過嚟加湯，可以用QR code落單方便快捷，仲有好多其他湯底、菜式選擇，值得同家人朋友一齊嚟。