誠拉麵 (已結業)

前幾日同朋友喺太古行街，佢話康怡廣場入面有間幾好食嘅拉麵，話帶我去食。一去到，就聞到好香濃嘅豬骨湯味！朋友叫咗一個魚介沾麵，而我叫左個黑豚骨拉麵，我地都升級左做套餐，因為想試下個手製餃子同埋叉燒飯。店方都好細心，枱面有唔同嘅調味料，有啲辣嘅醃菜，蒜蓉，全部都好香好好味！加咗落個拉麵度係生息不少！先講下朋友嗰個，佢嗰個黎先，我就食咗好多啖😝佢係用粗沾麵，所以掛湯力好好，每條麵都好吸味！好鍾意佢個荀，同我以前喺日本食嘅好似！好香好入味好爽口！叉燒都煎得好香！個湯又香濃，仲有叉燒碎，好足料！而我個黑豚骨拉麵係用幼麵，我覺得幼麵比較適合用嚟整拉麵，店方好細心！叉燒好好食，入口即化！好中意個溏心蛋！個流心好正！最抵讚係個湯底，真係好香濃好好飲，同個麵好夾。手製餃子都煎得好香，餡料係白菜豬肉，打得好融合！叉燒飯有少少似升級左嘅台式嘅滷肉飯！叉燒肥瘦得宜，有啲好有口感，有啲就入口即化，汁都好好味！每人百零蚊喺太古食到一餐咁高質嘅拉麵，好抵！值得一戰！