響 - Hibiki 日本燒肉 (已結業)

本身想試呢間餐廳好耐，見到正評都幾多，5:30-8:00嘅時段都要前一個月book先得。上到去裝修都唔錯，唔算話好大，好快5:30左右就入哂客。店員首先會送兩隻開邊熟嘅龍蝦比你，然後會比刺身拼盤同肉類拼盤客人。龍蝦味道正常，唔算十分特別。刺身有海膽食，本身自己對海膽唔係特別有興趣，但呢款海膽嘅味道令人易接受到，絕對值回票價。呢個拼盤就推介和牛西冷同埋雞骨腸。西冷脂肪分佈平均，攞嚟燒肉就逼出油分，食落甘香。雞骨腸幾驚喜，食落幾多肉汁！雞翼就一般，食落無乜味。榴槤炸彈超正，濃烈嘅榴槤汁爆出，榴槤fans至愛！叫左雞皮串、雞腎串同埋雞軟骨串。雞皮串都要燒幾耐先會有脆卜卜嘅口感！雞軟骨都脆口，佐酒一流！雞腎味道就一般般。菠蘿燒完都幾多汁，可以中和下燒肉嘅油脂！Movenpick雪糕亦係今次放題重點，有四種味；而Dryers都有兩款甜筒；另有榴槤雪糕！唔錯！飲料方面都有清酒、梅酒、柚子酒等，個人推薦柚子酒，柚子味好清新～而家餐廳做緊82折，平均約$350/個（未計加一）。