Lagom Kaffe (已結業)

聖誕節當日選擇左呢一間Café 袋午餐，提早係OpenRice 訂左位，諗住佢既位置喺寫字樓樓面，人少啲，點知去到都好多人，幸好一早訂咗位。呢間第一次食，但觀塘分店就食過幾次，覺得唔錯，兩間既野食會有少少唔同，食完呢一間，反而我中意左。呢間環境好大，當日仲見到有人係度拍野。我果日選咗坐窗口位，可以望住出邊綠油油嘅樹去享受我嘅午餐，真係好正。另外，好貼心係每一個人都送一個口罩。全日早餐 - 去每一間Café 必叫，入面有腸、蛋、菇、沙律菜、薯餅、土司，份量相當大，質素唔錯，價錢合理。不過呢度無套餐，野飲就要另外叫。巴馬火腿奶油牛肝菌汁意粉 - 呢個意粉好有驚喜，佢既意粉係比較粗身，食落去係比較有咬口，而且醬汁好多，食落去好juice，加埋啲牛肝菌同埋火腿，每一啖都好豐富。炸魚薯條 - 一黎到時即食係好唔錯，因為佢炸起，炸到好脆身，但如果放多一陣凍左先食就會覺得魚會變油左，不過呢啲係正常情況，整體來講都唔錯中規中矩。其實呢度既甜品都唔錯，不過太飽食唔落，下次要試吓。