翠林辣蟹舫

營業中

休息中

我本人呢就鐘情日本菜，但係呢就有個中菜胃，之前係外國時，隔日就想食中菜，而家返黎香港，雖然冇咁誇張，但時不時就想食中菜，咁啱今日女友話都想食，咁自然就一拍即合啦，我地去左間位於尖沙咀叫翠林辣蟹舫既中菜館，朋友介紹話啲蟹唔錯，所以就決定去試試。去到時晚市唔算多人，當時仲係疫情時期，好彩仲可以出去食飯，但客人真心唔多。我地叫左個避風塘香辣蟹、桂花陳皮鱔、蜜桃咕嚕肉、避風塘海鮮炒飯。首先黎左個避風塘辣蟹先，最鐘意就係個炸蒜，連埋蟹肉一齊食，超正，蟹肉份量唔少，兩個人食啱啱好，成隻蟹炸過之後，外殼超脆，雖然唔會食埋，但連啲炸蒜一齊‘選’黎食，好正。跟住黎到桂花陳皮鱔，個鱔肉又係炸過，連桂花醬一齊炒，酸酸甜甜，好開胃，鱔肉雖然炸過但仲有鮮味，咬落彈牙又脆脆地，唔錯。跟住蜜桃咕嚕肉都上埋枱，咕嚕肉炸到金黃色，咬落去啖啖肥豬肉，有種入口即溶既感覺，雖然好邪惡但我鐘意🤤，配埋酸酸甜甜既蜜桃，好夾👍🏼最後先上避風塘海鮮炒飯，賣相勁吸睛，將啲飯砌成條魚，第一次見，立即相機食先；但當時其實已經大半飽，以為唔會點食得落，點知又出奇地好食，最後成碟清😋 啲飯粒粒分明，火喉控制得好好，炒飯有味得黎又唔咸，又勁多蝦