胡爐 (已結業)

一有得出去打邊爐，你可以食到幾盡? 我公司仲行緊彈性上班，佢嘅好處就係我可以早返早放。於是我同同事約好一齊早收工落尖沙咀打個靚爐。胡爐應該係我近期鍾意去打邊爐嘅鋪頭之一啦，因為足料湯底同埋啲靚牛唔會令你失望。今次黎到就試下金翅花膠乳鴿湯，真係不得了，原來成隻乳鴿放左落個煲度，而且花膠，金華火腿等等都係哂度，十分足料。咁呢個時候緊係等水滾啦。等水滾嘅時候，食住個老友鬼鬼先，呢一個記得要趁熱食呀，香脆可口。水滾後，趁未落其他野時，就先飲下個靚湯，食埋隻乳鴿佢。個湯真係幾濃味，乳鴿已經好夠淋，但未去到一夾落去會散哂個種程度，係易食左嘅，起碼唔使點樣徒手拆野先。打邊爐嘅主角當然就係肉啦，呢次一叫就叫左三碟肉，分別係本地手切牛頸脊，豬豚肉，羊肉片。啲紋路，顏色都係好靚仔。鵝腸最緊要夠肥，呢間啲食材就做到野啦，食落係享受，但唔好煮咁耐呀，縮埋就好難搵得返架啦，哈哈。放心，我當然有嗌啲蔬菜類去平衡一下啦。呢間店之所以咁鍾意去，無他嘅，就係湯底足料，食材靚仔，又好坐，鍾意打邊爐又驚食唔到靚野嘅朋友仔真係可以試下黎呢間過下癮。