forte (已結業)

有朋友食過話質素相當高，於是乎嚟試吓呢度嘅自助晚餐，除咗自助海鮮沙律吧同甜品吧之外，仲會加送一個主菜，份量都唔細，主菜嘅質素亦相當之高，有澳洲穀飼斧頭牛扒(四人份量)，烤焗德國鹹豬手(二人份量附送兩支啤酒)等等，其中香草火焰燒雞賣相最了得，味道亦相當唔錯，皮薄肉厚。至於海鮮沙律甜品吧就冇我想像中咁好，生蠔、魚生、刺身、長蟹腳、青口和蟹都冇乜鮮味，只有蝦和希靈魚刺身比較有鮮味，沙律方面，配料選擇亦都相當多，甜品就唔得啦，寥寥幾款，質素唔高，不過有haagen daz 雪糕任食就算佢啦。呢度嘅地方裝修都幾講究，枱與枱之間嘅距離幾寬闊，座位唔多，令到個場地冇咁墟撼，食嘅時候都比較寧靜和舒服，如果一家大細嚟呢度食下野傾吓偈，係一個幾好嘅選擇，以價論價，質素就唔可以要求太高，以欣賞個主菜嚟呢度食，加上沙律些少海鮮算係十分超值，而且某幾張信用卡仲有八五折添。