Walter Bistro (智選假日酒店) (已結業)

喺觀塘工業區入面竟然隱藏咗一間酒店，而且佢仲有餐廳提供自助餐。幾個同事放咗工之後，搵地方食飯就話不如試下呢間自助餐喇。講環境一定唔會差啦，酒店嘅餐廳點都唔會衰得過普通放題，最起碼坐得舒舒服服。 呢度係嗌一個main course再自己出去夾野食，佢main course 有幾款嘢你揀，好似帶子意大利飯，肉眼扒......等，加多少少錢仲有和牛食添。不過我想講嘅係其實出面已經好多嘢食，有冇主菜都好，出面嘅款式基本上都夠你食飽，有即開生蠔、長腳蟹、 龍蝦、多款刺身，仲有幾款芝士同parma ham，仲有提供埋熱食添， 好似有海南雞，上湯浸娃娃菜……等等，但估唔到有驚喜嘅竟然係佢個蘑菇湯好好飲😂自己再加栗米粒落去，食到，而甜品我已經食唔落，剩係食到movenpick雪糕。講返個主菜肉眼扒，我嗌咗五成熟，食落去一啲都唔韌，而且肉汁好多， 一啲都唔失禮。所以基本上喺度食，大概每個人四百零五百蚊 有咁嘅質素已經係好好，性價比都算ok。慶祝節日黎呢間食都唔差呀。