The Farmhouse 咖啡廳 (裝修中)

今日同啲長輩、小朋友一大栅人食晏，自助餐應該係最佳選擇。見 Farm House 地點就腳，加上環境唔錯，姑且試吓，決定前都有睇過食評，見到多數評語都係一般，都係話食物選擇唔多，味道亦唔見突出，不試亦冇壞。不過見長者同小童有半價，咁就試吓啦。熱盤同冷盤放置唔同地區。冷凍食物如雪糕、甜品、沙律、壽司及冷麵近入口處。汽水方面，呢間 cafe 係提供支裝，可選擇可樂、雪碧、玉泉，飲支裝嘅 feel 確係唔同啲。甜品方面，真係好一般，選擇唔多，味道亦一般，我只取了芒果布甸，綠茶紅豆糕及朱古力味蛋糕，味道真係欠奉，以酒店水準嚟講，甜品控一定失望。我地12人分兩張長枱，由於空間頗寛濶，離座拎食物唔會影響到坐旁邊嘅人。入口直入盡頭就係熱盤區。提供嘅食物有牛肉，羊扒，咖喱，麵，點心，燒味。選擇比我預期好。啲叉燒、油雞切得幾厚身，口感十足。可惜冇糖水，我鐘意嘅紅豆沙、豆腐花，一律欠奉。週日大人價為398，長者及小童半價，而家大人有85折，平均一位三百幾，都算OK。