食堂半山 (已結業)

正所謂ㄧ雞死一雞鳴，執咗ㄧ間茶餐廳，原位開番間裝修得更靚但價錢又唔係貴好多嘅。邊個咁有吉士?入去就知了，睇吓WiFi個名，原來係鴻星集團旗下，依家中小企想生存真係越來越難。 可能開張冇耐兼附近選擇唔多，星期六中午十二點已經要等位，大概都係抱住試新嘢嘅心態。地方算乾淨但擺位略擠逼，人手亦嫌不足。 餐牌選擇多，最驚喜竟然有燒鵝，三拼米粉只賣四五十蚊，牌面甚抵，上菜賣相亦吸引，燒味堆滿一碗看似甚滿足，食落就知原來師傅切燒味功夫甚「佳」，細舊之餘叉燒仲要中間再切一半，去製造抵食假象，但如此價錢不能苛求了。味道略令人失望，叉燒合格但不出色，燒鵝得個肥字但皮不脆肉不香，燒肉皮硬而不脆，最正係舊索滿鵝汁嘅蘿蔔。 另外叫咗豉汁豆卜排骨籠仔蒸飯，睇落汁多顏色深好似好夠味，但食落竟然又冇乜味。 總括黎講都係賣相優於食味，一貫鴻星本色。不過喺選擇有限嘅情況下，質素不差價錢唔貴已經不愁生意了。