響 - Hibiki 日本燒肉 (已結業)

同朋友去左國貨買野，之後附近搵食見到呢間食燒肉放題，有澳洲和牛任食。地下有幾個易拉架，所以好易望到。簡約既餐具，唔會太花巧。任飲某牌子啤酒需要加錢，唔洗加錢就可以飲其他牌子罐裝啤酒。清酒、梅酒、柚子酒、白酒係任飲的，所以我地都飲左唔少清酒梅酒。刺身拼盤，好鮮甜，食唔到雪藏味。海膽之外，其他都可以再叫。海鮮拼盤，隻蝦好大隻，燒完啲殼好易剝唔係霉，鮑魚同螺都好鮮甜。紅色嗰條係一夜干，燒完啲肉都好香，無乜骨好易食。燒肉拼盤，和牛唔洗多講，幾款肉既油脂分布都唔錯，燒完都好淋。雞肉腸並唔係平時屋企食嗰啲，呢隻係免治雞肉咁，所以燒完有好濃烈既雞味。豚西冷同豚拖羅燒完都好爽口，特別係拖羅醃得好夠味。熟食我地無乜點叫，剩係叫左天婦羅，熱辣辣食落好香口，粉無同肉分開的。再叫左幾轉肉，牛舌係厚切的，厚得黎都好快熟，好爽好有口感。有M字頭雪糕，味道有幾種，另外仲有雪條同豆腐雪葩。