影片
招牌菜
主廚由經驗豐富珠圓玉潤皮薄餡靚白裡透紅入廚幾十年既半血泰婆煮理 half blood Thai chef，食物質素有保證﹗Hunter 獵人餐廳感覺會有好多肉啖啖都係肉、飛禽走獸、奇珍野味、叢林植物野菌野菜香草、特色食材、罕見料理及烹調方法﹗諗下都非常過癮。半血泰婆秘製泰式酸辣汁，撈乜都掂﹗沙律、刺身、海鮮、白肉紅肉、粉麵飯、等等，同樣出色一流﹗家傳秘方絕對不是那些唔識泰菜扮識泰菜既混水摸魚之徒﹗善有善報、惡有惡報，若然未報、時辰未到﹗泰式柚子沙律，多謝老闆為我精心炮製的前菜﹗清甜爆汁滴水撈埋香口蔥酥蝦皮連新鮮沙律菜，滿星美味差點連碟都吞埋！炸紐紋粗薯條，外脆內軟啖啖肉，薯肉綿綿滾滿茄汁最開心﹗明太子軟殼蟹漢堡⭐️⭐️⭐️⭐️⭐️等了又等，終於苦盡甘來食得到，果然名不虛傳﹗熱辣辣軟塾香噴噴的麵包非常好楂手，手感一流愛不釋手﹗酥脆的軟殼蟹啖啖肉夾雜甘甜蟹膏格外滋味，仲有香辣明太子及酸甜沙律醬助攻，加上火箭菜、生菜、番茄的鮮甜爽嫩﹗百味交錯、錯綜複雜，味道交替融合昇華，無話可說﹗獵人炸髀⭐️⭐️⭐️⭐️⭐️三多炸髀始創廚師進化版，始祖巨人炸髀﹗會使人食上癮的精製醃料無人能及﹗狠狠地一咬一扯雞汁飛射，薄脆雞皮鳳脂甘甜閃令令，嫩嫩白肉冒著煙散發動人幽香﹗洒上薄薄一層自家辣粉更加惹味，損晒手指﹗獵人炸雞扒⭐️⭐️⭐️⭐️⭐️可能係超越三多炸髀的料理、可能係全大埔最美味的雞扒﹗皮脆肉嫩滴著汁，醃味清爽芳香回味無窮，白肉滑滑閃令令，鳳脂脆雞皮香噴噴！配粥粉麵飯漢堡包都一流。燒雞皮⭐️⭐️⭐️薄脆乾爽帶鹽香，助酒良伴。燒墨魚嘴⭐️⭐️⭐️巨嘴不是討厭的迷你種，飽滿脹卜卜咬落脆卜卜，最後黏黏彈彈。燒厚切牛舌芯⭐️⭐️⭐️⭐️焦香芬芳聞到已經流晒口水，爽爽的質地牛汁飛射，只甜不羶舔舔脷﹗汁燒鰻魚肝⭐️⭐️⭐️⭐️⭐️魚肝初體驗，只怕不再遇上﹗清新的醬汁不濁不膩，魚肝油潤不乾硬，甘甜幼滑帶彈性，鬆軟滑滑兼帶汁﹗狠狠地一啖一舊塞入口，爆開魚油美味絕倫﹗蒜芯炒雞柳⭐️⭐️⭐️蒜芯翠綠爽甜，雞柳滑滑結實，識食梗係全部一齊掃入口。炸雞皮餃子⭐️⭐️⭐️炸得要再乾一點再脆一點，雞皮開口使到肉汁流失了﹗餃子掃一層薄薄醬油會更開心。獵人法式烤鹿架⭐️⭐️⭐️難得一遇少有的鹿肉料理﹗啖啖肉軟綿多汁3成熟嫩紅滑滑沒丁點羶味，味道似羊亦似牛，配上辛辣爽蒜夠過癮！連條骨都損得乾乾淨淨。如果換成欖油焗蒜就更賞心悅目，將蒜泥塗滿鹿肉齊齊享用，天堂的味道！幻想下已非常興奮，配多碟野豬肉醬意粉就不得了！好很想念北海道旭川星野渡假村內的火山石板燒梅花鹿肉，簡直係10星級，無可取代﹗完全不用任何調味直接燒直接入口，肉甜肉嫩到無與倫比，陶醉得飄飄欲仙﹗燒司華力腸⭐️ ⭐️界花靚靚真的好有心機，而且更易讓醬汁滲入其中。估計應該牌子問題，這款肉質偏腍不彈啊。鹽燒煙鴨胸片⭐️ ⭐️我對煙鴨胸完全沒有任何好感的，要食就食鮮鴨胸﹗偏咸油膩泛著香腸味道及質地，焦香油潤，喜歡的就非常喜歡。雙太陽蛋芝士撈出前一丁，太陽蛋煎得太老鞋鞋啊，就連蛋白都起豆皮了﹗煎好不要繼續擱在熱鑊上，餘溫已足夠使其變老過身返魂乏術，最好立即端起放碟備用吧。何解芝士會有羶味呢？不是只用車打芝士溝牛奶嗎？羶味都的不弱，頂硬上極速兩啖啜晒落肚，不要諗要立即消滅﹗曾經試過芝士再加少許湯粉更加滋味開胃。棒子西多士，大家都係天生不折不扣的食肉獸，對於無肉的三文治完全掂都掂、望都唔望。美式咖啡，心知不是即磨啡，只係咖啡沖劑，無緊要吧。
繼續閱讀
之前經過都想試，今次經過見有位，就入嚟試吓餐牌見菜式都有幾多選擇，burger嘅種類都多，平時見到嘅都有，其他小食就樣樣都有啲。因為今次只係食個快飯，所以就淨係叫咗個burger小試牛刀。叫左呢個熱浪風情漢堡，$88有驚喜，本身塊牛肉漢堡已經夠厚好juicy, 而入面塊菠蘿夠甜，又多汁，夾埋一齊好夾，平衡咗漢堡既油膩感，推薦👍跟餐有薯條，夠脆好食，份量都多，唔驚唔夠飽👍整體嚟講，今次用餐經驗幾好，推薦呢間餐廳，下次黎會試多啲唔同嘅食物，睇吓啲小食表現好唔好
繼續閱讀
星期五晚上6點左右嚟到，小店座位唔多，不過當晚到我離場都唔滿，客人唔多。獵人鹿肉卷 $68我自己無食過鹿肉，所以唔知係咪真野，唯一可以講食落口感似豬肉🤔，味道就只食到茄汁嘅酸味同埋頗重嘅香料味。肉嘅份量唔多，另有配料洋蔥絲、芝士、車厘茄，整體無咩特別，性價比亦唔高😅。明太子醬$10+煙肉碎薯條$25千島醬加入少少明太子，食落唔會過鹹，有淡淡嘅明太子味，而且帶點酸，唔會好滯嘅一個醬。煙肉碎唔多，如果比多少少就更好。榛子西多士 $25呢個唔係即炸出嚟，因為裡裡外外都係凍...😑同埋，無咩特別狂牛漢堡 $88跟半份薯條呢個份量同肉卷比感覺抵好多😅起碼跟左半份薯條，個包都大份D🙈漢堡扒好厚，而且好有牛味，仲有好多肉汁添😯我口唔算細，但一啖咬哂咁多層都有D難度。麵包鬆軟，不過凍嘅，扣分。餐廳當晚機仔壞左，所以只收現金。另外，餐廳星期一休息，大家唔好摸門釘。整體食物味道OK，但某D食材上枱果陣已經凍哂，有待改善；另外，抽風系統亦需要加強，喺客人唔多嘅情況下，全店充斥住油煙味，我用餐果半個鐘，真係好辛苦。其次冷氣唔夠，越食越熱，行出餐廳果刻深感外面比店內涼快、呼吸更舒暢。
繼續閱讀
今次係週末既Tea Time (大約4:00) 黎到，嗌左4樣野，脆香魚柳漢堡 ($68)，跟餐加配香橙椰果梳打 (+$12)，榛子西多士 ($25)，自家製香蔥陳皮鯪魚肉炸燒賣 ($15)，埋單$120，唔洗收加一。距離上次黎到都有一個月既時間，今次門口多左道趟門，變左坐最出面張枱都唔會太嘈 (始終鋪頭位置係喺巴士站附近)。另外除左本身有既射燈仔，亦多左8支小吊燈，令店面整體光猛番d，音樂亦都比之前細聲左唔少，相信店家應該有睇呢道d食評，抵讚。一如既往都係嘢飲先上，其他嘢食陸續上枱。當時計埋我有兩枱客人，等侯時間都係大約10分鐘，唯獨是西多要耐少少，大約15分鐘。先講香橙椰果梳打，大大杯，Size比一般支裝汽水多，單論份量計個人覺得抵飲過支裝汽水 (跟餐加$8)。芬達底，加椰果粒，加冰。比3星既原因係味道偏淡，其實過往兩次幫襯既支裝芬達/忌廉都有類似問題，唔排除支裝個味係冇平時既罐裝咁甜。之後講下脆香魚柳漢堡 ($68)，跟餐有半份原味薯條。薯條以往都講過，唔再重覆講喇。魚柳包既配菜有番茄、紫洋蔥、西生菜、芝士片，沙律醬。比3粒星係因為魚柳撲既炸粉漿份量略多，特別係最外圍既部份，令到個包上枱時重量側埋左喺前面，搞到冧左，店家要用手扶住個包先冇跌到落碟 (有d人會好介意呢樣野，我就還好)，不過最好研究下點樣令到個包上枱時個賣相都係完整啦。至於魚柳味道略淡，調味只用左少量黑椒，肉質唔差，都實既，食到有少少魚既腥味，味道黎講係ok既。挑剔位係芝士片未融，建議可略略焗熱漢堡包皮，食落會再正d。跟住講講鯪魚肉燒賣 ($15)，非常脆口，上枱後30分鐘都仲脆。陳皮味就試唔出喇，不過同坊間既炸燒賣最唔同既係，有落蔥，而且份量都唔少，食落味道會香口d，亦都好食同濃味過出面其他鋪頭。最後係等左15分鐘既榛子醬西多 ($25)，一句說話形容，係值得等15分鐘既。四邊金黃色，煮法係煎而唔係炸，缺點係冇坊間既咁香脆，偏軟身。榛子醬好食，搽既份量都ok多，加埋煉奶都唔會太甜。唯一挑剔位係煉奶只係略略搽左喺面一下就算，搽多少少就perfect。小總結，最推介炸燒賣+榛子西多，前者多蔥非常香口惹味，後者榛子醬份量比足你，麵包偏軟身。魚柳包同香橙梳打就一般般，前者略嫌外圍既炸漿太多，同調味偏淡，後者既芬達底汽水味冇罐裝味咁甜，估計係支裝汽水既原因。相信小店有睇小弟寫既食評，上次寫既燈光+音樂問題已有明顯改善，幫襯3次暫時食過8樣野，有一半都係超水準咁好食既，繼續加油。
繼續閱讀
我很愛食Burger, 所以是shake shack的常客。呢間都好有水準,自製雞軟骨扒,好味又低食。由一對夫婦用心經營的小店,不設加一服務費。一個價錢$68,漢堡包連沙律或可選薯條。上次試左薯條很香脆,所以今次試沙律,D菜好新鮮。最後要講主角漢堡包是會另人回味的,真心好味。獻上我的第一個openrice食評,祝福小店。由於我是真食客都要講下唯一的缺點是由於用心製作所以等待需時,希望有待改善。但是我是個為食的客人,等一個好味的漢堡包,我是十分願意的,極力推介給大埔街坊!下次再見~
繼續閱讀