麥文記麵家

營業中

休息中

本身打算去澳洲牛奶度食,但去到男友見到隔離係呢間正野就二話不說入左去食,叫了兩個雲吞河同一個芥蘭。芥蘭好靚,同0的雲吞真係好好味,有蝦膏的,好好味,好鮮!

平安夜日,到成4點,起身唔知食乜好,食太飽,又驚夜晚食唔落,本來諗住食牛奶公司,但鬼死咁多人,走去隔離食雲吞麵(都多多人),我食雲吞麵,雲吞有4粒,全蝦,蝦幾爽,幾新鮮,入面無豬肉,細細粒,麵就旦牙,無乜水味,個湯都甜,無乜味精,飲完都唔頸渴,肥b就叫炸醬撈麵,肥b話炸醬幾好味,撈麵唔落湯都唔乾身,仲叫個芥蘭加腩汁,芥蘭好甜無渣,腩汁都濃,肥b話全部食都ok,唯一扣分係d太細碗同太細碟,食完好似仲肚餓過唔食,d位坐得太迫,同全部唔可以雙併,叫我比ok,唔好比笑笑喎!

今朝想食澳洲牛奶公司早餐\, 但衰晏起身, 諗住食個常餐\都好. 點知去到門口, 太多人啦! 咁就轉軚, 食好耐無食過嘅麥文記!我係南乳豬手怪, 去親食麵都忍唔住叫豬手撈. 男友就食筋腩撈, 再加淨雲吞和菜心. 豬手同筋腩味道其實唔差, 但腩實在太瘦, 好鞋又好\"ngun\", 豬手就炆得唔夠耐. 真係有少少失望.碟菜淥過左籠, 我死鬼姨婆無晒牙都應該食得到. 碗雲吞都真係多左少少味精, 但係要讚吓佢\地d 蝦好爽口, 又唔似用梳打粉醃到無晒咪, 條蝦腸亦挑乾淨晒. 至於個湯底, 真係同以前讀書時食嘅唔同lu, 無咁香蝦子同大地魚味.希望佢\地留意吓, 水準反彈番,唔好繼續下降就得啦!

上次來了之後已訂好要再來嘗這裡的豬手麵，想信除了出名的細外，這豬手理應不賴。是日到尖沙咀辦完事後就過來一聚。當然是豬手麵，仍是小小份量的那種，豬手只是三塊而矣，麵亦是細細份量的那種。嘗一口，豬手很腍，很香南乳味，膠質很豐厚，這比起很多標榜豬手主打的食肆好得多；另外全蛋麵不說了，跟上次來吃時的食味無疑，亦是彈牙香口；清湯底混了南乳汁，想若是撈麵加南乳汁的話，極品也！廿塊錢其實都幾值得，起碼食味有保證，份量是小了一點，故在解口舌之癢才過來幫襯的！

前幾日放工過左佐敦食晩飯,係呢到點左個雲吞河!之後睇返原來呢到d雲吞係無豬肉,所以咁先出名,但係我始乎鐘意食有豬肉ga多d噃!而且加腩汁要俾多一元,因為d腩汁味道似乎幾濃,但係本身d湯都好好味!呢間食肆我個好強烈的感覺就係整間舖頭好光鮮又乾淨,呢樣係抵讚

嘗過不小自認正宗、標榜好味或老字號的雲吞麵，說到可真正回味兒時記憶的細蓉雲吞麵的食肆又小之又小；今日朋友在倫敦廣場宴客，見時間尚早故跑來這裡一試馳名雲吞麵及水餃。地方真的窄窄，尤以卡位更甚，好在兩口子身材玲巧，否則都幾辛苦。點了雲吞麵及水餃麵，因幫襯的客人頗多，都要等好陣子才上檯。名乎其實的細蓉，份量是罕有的，雲吞麵及匙羹的位置對板，翻動一下，雲吞不是散尾但沒關系，最主要對口；先嘗一口湯，大地魚味道濃鬱，嘗到絲絲老香港細蓉的味道感覺，加分；全蛋麵是爽身彈牙，完全沒有鹼水味道，這點已經坊間小見，此時此刻，除了大口大口，沒別的事情可做；雲吞的份量不少，當中的鮮蝦可用新鮮甜美來形容，不需多餘的肥肉，只是鮮蝦的雲吞，吃得極其痛快。再嘗一口內子的水餃，如墮冰窟，水餃數量奇小的情況下食味又不見凸出，若先前錯點此水餃麵，食評的打分絕對不一樣。雖然每碗盛惠廿銅板，但以麵湯雲吞的食味絕對超值；地方窄窄但可以；環境算是衛生，但可能是老店，阿姐阿哥的笑容總是欠奉；另外看到貼在牆上的雜誌報導及挺多食客點選這裡的豬手，下次過來必會一會！提外話：這段時間時常在廣州工作，故在這雲吞麵的發祥地四處打聽及自已親自品嘗，

「貴客請提單找數」這句說話你會想起甚麼？是理所當然？還是另有別意？在這句說話思量過後，食物亦隨之而上，小時吃過後還是要吃，不懂表達，只知是美味。依舊是沒有抗拒的理由驅使，入口的麵由最初吃不出甚麼味道來，再吃你自會發現是鴨蛋味，帶有微膻味，從沒想過那化學作用之美，剛好補足那麵質的質感，令到麵條滑身，而微微的鹼水是不會過於喧賓奪主。另湯底，靈魂關鍵，蝦頭蝦殼湯、大地魚湯、羅漢果湯底？只是那湯清澈，入口清新，沒有庸俗，無需要添加調味品，惟恐畫蛇添足。雲吞是一口雲吞，絕對是全蝦，沒有半點不新鮮，但欠缺那肥豬肉，始終是不能全缺。這碗細蓉中，平分春色，猶如Mark、豪、杰。而那碟芥蘭，鮮綠脆嫩，但味道是仍有保留，大家記得端記嗎？原想的美意，但被現實狠狠的撕裂下，細心思量，只能留下那無奈。

自細細個就跟阿爸阿媽嚟食...大個之後就少嚟咗。琴日行過就去懷舊一下...老店經裝修後變得光猛乾淨咗，但我仍然喜歡以前殘殘舊舊嘅樣...睇到其他食友評論話D麵細碗，食極都唔飽，不禁失笑...雲吞麵都有名你叫--- "細蓉" ma，主要係吃巧不吃量。依家十蚊大大碗勞什子所謂"鮮蝦"雲吞充斥巿面，令人唏噓不已..>.<例牌叫細蓉加韮菜花走蠔油...依然係傳统嘅presentation方法--- 麵在上，匙羹置中，雲吞沉底。先喝一口湯，入口幾清，大地魚味唔濃，亦飲得出有少少味精；雲吞係明符其實嘅全蝦雲吞，蝦食得出好新鮮，好甜好彈牙，但自己始終都係鐘意食有肥豬肉响入面嘅雲吞...麵質就差咗 --- 有D似食橡筋，食到有少少鹼味，失望...韮菜化水準依然--- 爽甜冇乜渣，綠油油好新鮮，始終獨步天下...三十蚊唔算貴嘞，但水準，對我呢亭老顧客嚟講，係覺得差咗...

我去麥文記幫襯左十幾年，通常會點水餃麵，加碟菜芯或菲菜花，三十零蚊，吃得開心，唔算貴！ 水餃材料有蝦、冬菇、豬肉同勁甜，冇佢唔得，勁甜的的荀粒，麵係水準之作，非常橡根，湯.......I like it！ 我會再加醋、胡椒、和橙色的辣醬，好好味！ 至於菜方面，亦係最優質的菜，因為本人都有菜市場做過幾年買手，都知到點揀條靚菜，其實比四兩菜你食，比到最靚你食，在非打風時候，咪最多比個半銀錢菜你食，賣10蚊碟菜，都賺死佢啦！ 我喜愛麥文、麥奀、何洪記等一派雲吞麵的原因，完全唔係佢的價錢，而係風味同情懷，本人都成四張0野，細時家境一般，唔係話想食乜老豆就帶我去食(唔係我"伯Yeah"孤寒，而係佢冇時間同我去街)，唔記得乜0野情況下食過呢派雲吞麵，但是，那美味的感覺，直至食到麥文記後，才與這種感覺重逢，你話幾開心呢？！ 我唔係麥氏的親屬，我吹唔吹佢都可以住洋樓養番狗，只不過，我很喜愛這派的廣東麵食文化，那些大大碗買十蚊，全蝦雲吞好似乒乓波咁大的雲吞麵，我就食唔出那種感受。 不過睇怕都要好似我咁上下年幾，先有我呢種感覺啦！

昨天中午唔肚餓,順便去開佐敦咪去試下E間野!我自已一個人叫左大家都好推介的雲吞麵,真係好細碗~好的式~要成20元/碗~食完又唔覺得好特別~只是D雲吞的蝦比較新鮮之外~便沒有其他的感覺了!!!!試一次已經好足夠了!我想不會有下一次了~

佢d雲吞有味精..又貴..所以真係唔抵食..另外..一碗丁咁少ge麵..賣成二十幾蚊..唔好去搶?!!我去其他地方食野都唔洗咁貴啦..呃人Q__Q

吃罷彌敦,意猶未盡,與友人"辣更",最後去到麥文記,找個位坐下.去過麥文記的朋友或者會知道,此店有個二人卡座.另闢一角,對住塊牆.當初店方的原意,是否設成情侶卡座?又不知道多少男女,曾在此奇妙牆之下,立下過任何誓言?這一刻,心中千個疑問.友人要細蓉,我就要蝦子撈吧,再加碟爽甜的芥蘭,$1蠔油錢也得慳.此店的蝦子撈係有水準,前文已略略提過,只係車品品一出現,令到坊間所有的蝦子撈,已比下去.且說友人對我讚到天上有,地下無的芥蘭存在質疑之際,說會這個卡位,我與友人非屬情侶,那樣會想起些什麼?想到Oasis的Wonderwall,其中一段...."And all the roads we have to walk along are winding. And all the lights that lead us there are blinding There are many things that I would like to say to youI don't know how Because maybe You're gonna be the one who saves me ?

又係一間老字號, 由吊扇時代到而家冷氣開放, 呢間麥文記都係咁多人, 尋日一條友好突然間好想食牛腩, 咁就近近地啦! 平時好日都唔幫襯, 全因覺得唔抵食, 太細碗喇, 兩三啖就冇晒! 但尋晚就括左出去, 點知............... 入到去都幾多人, 不過一條友就好易有位! 二話不說即刻叫碗牛腩麵,之後先望下個餐牌, 發現又加左價, 好彩帶夠錢, 成$20一碗, 不過諗住算啦好味咪得囉, 點知都幾失望! 佢d碗細就唔再講, d牛腩我覺得仲衰過d$10碗d呀, 牛腩超韌, 連同牛肋都係超韌, 直碘要同佢鬥力, 真係冇晒心機啦, 好彩佢真係少, 唔係都唔知要食幾耐呀? 不過d麵又真係幾好食, 加埋辣椒醬都好正, 但係d牛腩就真係差左好多喇! 本來諗住如果好味又唔飽就食多碗雲吞麵, 但最後我係決定拿拿聲走! 慳番!我諗我又有排都唔再幫襯喇, 失望, 十分失望!

一心諗住去隔離既澳洲牛奶公司食炒蛋, 可惜撞正佢中秋節休息唔開, 於是就過左麥文記試下佢既雲吞麵~~通常出名既雲吞麵店都唔會大碗, 不過我覺得份量細細地幾o岩女仔食, 男仔就可能要食兩碗先飽~^^~一碗四粒鮮蝦雲吞, 雲吞唔算大但入面D蝦就好新鮮, 麵都幾爽幾好食~~另外叫左碟芥蘭, 新鮮但略為多油, 一早叫佢走油相信會更好~~食完過隔離既九記食糖水, 不過都係大良八記既糊好味D。當然, 澳洲牛奶公司有開就最perfect~~下次一定要再來過呢頭食野呢~~^0^/

行完黃金,見仲有時間,就搭地鐵落佐敦行一陣,好似仲未夠飽,就去試下佢\的細蓉...麥文記就在牛奶公司隔離,唔難找...七點幾,好多人食,大部份的人都係上左年紀的長輩,坐得好逼,睇黎都係老一輩比較上...入到黎,淨係叫左碗細蓉.細蓉黎左,大概係一隻食飯碗咁大到,記得上次經過麥奀,d碗只有茶樓碗仔咁細...呢度的雲吞麵雖然比出面果d細碗,但都唔算係好細果種...正宗的雲吞麵擺\法,麵在上,雲吞在底...麵比較粗身(個人覺得),爽口彈牙...雲吞皮滑,餡係全蝦,一碗有四隻雲吞...一隻雲吞有兩隻蝦,蝦鮮甜,口感同食有豬肉餡的雲吞好唔同...湯只有九菜,清甜但油左少少...食完,繼續想食,可惜,我已經飽了...無論係正宗雲吞麵,定係$10大大碗雲吞麵,都有唔同的食法.雖然正宗雲吞麵比$10大大碗雲吞麵好食,但我覺得,如果要比較味道的話,正宗雲吞麵應與正宗雲吞麵比較,$10大大碗雲吞麵與$10大大碗雲吞麵比較就好了...食完之後,行一陣廟街,就正正式式出去睇國慶煙花了...