食記餐廳

營業中

休息中

港式小食店已經買少見少，食到好味嘅更加唔好放過食記已經係鴨脷洲開咗好多年，食極都唔厭，當正餐又得，下午茶又得🤩每次嚟到必食兩溝或者三溝😋🍧另外仲有糖水 (豆腐花、紅豆沙、綠豆沙、蕃薯糖水、芝麻糊)🐟生菜魚肉翅 ($23)碗仔翅嘅肉絲、素翅、蛋花都好多，每啖都食到好足料🤤魚肉份量好多、好大舊，完全唔腥，又唔會大陣粉漿味，咬落非常煙韌有3大片生菜墊底，好大碗，食到好飽🌟 Lamlam脷指數 😋😋😋😋😋 (5/5)🥢炒米粉 (大$16 小$14)炒米粉都係另一個街坊大讚嘅美食之一，雖然蘿蔔絲、菜絲就少咗D，得兩條😣但係米粉唔會炒到碎哂或者一團餅咁🌟 Lamlam脷指數 😋😋😋😋 (4/5)🌟整體評價: 依個價錢已經好難搵到咁足料嘅魚肉翅，仲要整得咁好味，嚟到鴨脷洲必食嘅小店啊😋🌟 Encore指數 ⭐️⭐️ ⭐️⭐️⭐️ (5/5)

有少量座位，有好多抵食又好味既小食，其中炸燒賣、生菜魚肉、煎腸粉、炒麵，係我會經常食，因為真係好正，煎腸粉仲會問你要唔要芝麻，又大份，又熱辣辣。另外都係炸麥樂雞係友人推介，等我下次試下先~

以前細個住咗喺呢一區好多年,放咗學會間唔時同媽媽落嚟食碗仔翅加魚肉，好熱滴晒汗都一路食,加好多好淺色嘅紅醋同埋胡椒粉😆咁多年冇食魚肉都係好煙韌彈牙,雖然明知道係化學嘢加魚肉,但係我相信住南區嘅朋友都有好深刻嘅回憶.今日我冇買到碗仔翅魚肉，而係買咗炸燒賣同炸雲吞,兩樣嘢都係炸定先，你叫嘅時候佢再翻炸，但係炸得好乾身,雖然啲油係萬年油好深色,但係間唔時一次半次冇所謂啦😆 雲吞入邊有層好薄嘅魚肉,雲吞皮炸得好脆同埋唔太油。燒賣係魚肉燒賣，要黎炸真係一流。

基本上住係鴨脷洲都唔會唔識呢間食記 ，真係由細食到大 而家搬離左鴨脷洲 唔係成日食到 一返鴨脷洲就會買兩碗我至愛嘅生菜魚肉 多醋 麻油胡椒粉拎走吖唔該(一個人食晒）🤣😋 因為係舊式店鋪 位唔多同埋都坐得好親近😬 冇冷氣 所以通常我都係外賣 其實佢都仲有好其他野食 碗仔翅 粥 炒面炒米 炸物 糖水等等推介生菜魚肉 👍魚肉相對比其他較大 啖啖肉又夠彈 我係連湯都飲埋😂 呢個味道真係好多童年回憶🥰

上網睇過好多人介紹好抵食味道亦唔差·滿足下個肚既飽滿感一定係小食😎就睇下佢得唔得先(聽聞之前排長龍～難得無人排緊係即埋位啦)🤣好多選擇～你地食過未呢😝跟小編一齊睇下食咩好先😜😜—————————————————☻非專業食評·純個人口味☻環境係好舊式感覺唔乾淨以部分位置坐出街·價錢平既但公道講味道一般·腸粉要讚🥳真係好滑溜配蔥花非常之夾😋食記姐姐好忙·大家諗好先叫唔好左轉右轉麻煩到人啦😊

今日黎南區遊, 行過鴨脷洲大街, 見到呢間舊式小食店, 堂食位置唔多都系三張枱, 食物有生菜魚肉趐, 炸魚蛋 燒賣腸仔雲吞油池雞脾雞翼,  炒麵腸粉粥, 本黎諗住只系買魚蛋燒賣去公園食, 不過見到店裡有位就坐低食, 涼涼地天氣就最岩坐低食🪑叫左兩溝, 魚肉趐, 一食魚肉就知唔系行貨, 魚肉夠彈牙, 碗仔翅有大量肉絲及木耳絲, 十分足料. 魚蛋細細粒同魚肉一樣彈牙🐟食物足料好味, 價錢抵食, 雖然店舖環境系舊式小店並沒有什麼裝修, 但大家都應該唔太介意, 一路都有幾個人排隊買外賣, 食食下仲有人等位,   加埋幾個姐姐同哥哥都好好人,  充滿住街坊人情味,  見有人介紹炸雞脾炒麵豆腐花, 下次再黎鴨脷洲大街再試

一家人去黃竹坑酒店The Arca渡假, 好耐之前食過呢度嘅豆腐花、大雞髀🍗，念念不忘。即然而家無晚市，就專登揸車🚗入嚟買個外賣返酒店食。我哋一家四口買咗好多嘢，有豆腐花、雞髀、炸燒賣、炸魚旦、魚肉碗仔翅⋯⋯返到酒店慢慢嘆。家人話樣樣都好食，但係冇影到相。隻大雞髀🍗外層炸得酥脆，內裏仍保留肉汁，味道適中不會太鹹。魚肉碗仔翅，魚肉超多彈牙，但略嫌多粉魚味不足，但我仍覺得好好食。加多支象🐘啤，冇得頂。

位於鴨脷洲的人氣小食店☺️店鋪主打生菜魚肉 除此之外 炸物亦十分受歡迎 我最喜愛店鋪的炸魚蛋 10蚊有10粒 勁抵食🍢魚蛋十分彈牙 點上甜醬食別有一番滋味 而餐廳環境方面 就比較舊比較細小 夏天食就比較辛苦🤣

利東站一天遊😌趁假期去咗一轉利東鴨脷洲行下聽講有一間小食好出名好好食就去試下不過環境其實一般大家去之前要考慮接不接受到呀因為keep住有條小人龍同堂食都滿坐所以我同友人A就去買咗外賣過公園仔食整體而言係街坊平價小店炸魚蛋食落算彈牙。魚肉翅：魚肉夠實淨，唔會鬆泡泡。而且呢次都幾足料。環境方面始終都係小店，但係都係非常之多人，而家個價錢來講其實都幾抵食。我會覺得係可以一試嘅類別，咁啱行過路過試吓都OK

鴨脷洲平民小食😍魚肉彈牙又煙韌 碗仔翅足料吾咸 炸魚蛋同腸仔係必食！魚蛋加甜醬食 一流口感🤤-消費共$39💰食完要捧住個肚行出去🤰🏻餐廳環境比較舊 而且冇冷氣 要食建議涼少少去食🤚🏻

總結：價廉物美。無論排長龍，日曬雨淋都一定會食。鴨脷洲大街有兩寶，一個係林德華醫生另一寶就係食記。太太係鴨脷洲人，以前拍拖佢已經帶我嚟食記食好西，話呢度既生菜魚肉🥬特別好味同出面嗰啲唔同。食過一次就愛上，到而家番親去鴨脷洲都會幫襯。其實食記全部食物都好食，係一間好地道嘅港式小食店。冇冷氣，冇招呼（但態度並唔差）只有三張枱，好逼，環境絕唔理想。但係冇人會介意，無論堂食定外賣一樣排長龍。可能因為呢啲舊式嘅地道小食店已經買少見少，二來食記既出品真係好味既。一間小店能夠係同一地方生存超過四十年已經係最好嘅證明。必食推介😋1️⃣生菜魚肉/魚肉碗仔翅$22*我個人比較鍾意食兩溝，魚肉係食記既招牌菜。魚肉非常彈牙，係新鮮手打出嚟而調味做得非常出色。係一種好獨特嘅味道而其他地方係食唔到。至於碗仔翅亦十分足料，有大量肉絲及木耳絲，相信味精不多食完都唔會口乾。2️⃣炸雞脾🍗$14大過塊面既隻炸脾，係生炸既。粉漿好薄，醃得好入咪。外脆內嫩，非常juicy。3️⃣豆腐花$15*嫩滑有豆味，但佢係暖既。我覺得如果一係凍一係熱會好d

人大左反而小左機會食小食店今次同事帶左我來呢間小店一去到都好多人食野,同事話呢度最出名係兩溝,我緊係即刻叫番碗黎試下先,真係幾好味佢好濃既雞味,同埋好足料!ヽ(^0^)ﾉ-我地仲叫左個炸蕃薯share,呢D就係簡單既美味,用簡單做法, 煮成最好味既小食!-仲有叫左魚蛋同埋腸粉,腸粉D醬比你任用,好正, 識食一定係要食多醬^3^

尋找回憶嘅味道之旅😋細個住喺慈雲山，有間小食館嘅炸魚蛋好出名，放學嘅時候會同啲同學仔一齊去，可惜早幾年結業。。。咁啱前排見到人哋介紹，襯放假得閒，專登過咗去鴨脷洲試吓呢間懷舊小店因為小店比較人多，所以我揀咗外賣去公園食🙃⭐️淨魚肉$23打開聞到就係胡椒粉同埋麻油香味入口有少少鯪魚肉味，比較鹹。口感係實淨，即係粉嘅份量比較重唔算係自己鍾意嘅口感，只可以話佢係抵食。⭐️炸魚蛋$9/10粒炸魚蛋都係比較失望，可能人多嘅關係所以係炸定，我食嘅時候已經係凍嘅（小店同公園嘅距離只有3分鐘）☹️但係佢嘅魚蛋係彈牙嘅結論係，要搵返以前嘅味道應該好難，如果大家知道有邊度好食嘅炸魚蛋，不妨話我聽吖🥰食完之後行咗一陣海傍，其實喺個記舒服嘅地方，放假嚟行吓都唔錯

每次到鴨脷洲，必定順路一來，但今日楂車去了大口環一遊，再順路來到，完成了輕鬆半日港漫遊。講返正記，佢係好少夠地道民間小食店，連環境也保留著當年的氣氛，位於路邊座街食首選生菜魚肉，碗仔翅！今次叫了兩溝，是同價的感覺好似底D，唔知食料甚様組合，手打魚肉呎吋大小適中，彈牙有口感，一咬下去味道是記憶的味道！碗仔翅食出夠料有雞肉等材料，配合麻油，味道更為香濃，我好快就食完一碗了！同埸也必叫的炸魚蛋，充滿舊時陳片味令人回味無窮，細細粒先係正宗拮魚蛋嗎，記得自己加齊醬呀！下次再見

掃街之人情味小食推介指數 ❤️❤️❤️❤️🤍難得入來大街四圍hea，當然要去掃街啦！當香港仔珍寶都執咗，食記仍然存在呀！賣嘅只係普通不過嘅香港街頭小食，私心加上街坊嘅人情味，份外好味！小店鋪頭以開放式設計向馬路旁邊、無冷氣、座位少、空間少，有一種大排檔嘅感覺，外賣亦大排長龍㗎！🐟魚肉碗仔翅(兩溝) HKD21喱度嘅魚肉彈牙爽口完滿魚嘅鮮味，碗仔翅底顏色略淡、咸度適中，內裡有蛋花、瘦肉絲同冬菇絲！加埋紅醋、麻油同白胡椒粉，就係香港人嘅口味！🔥炸燒賣 HKD9/6粒新鮮即叫即炸，熱辣辣，魚肉彈牙！🍗炸特大雞髀 HKD19價錢相宜，買到最後一隻，之後想再買多隻都無啦。🔥最想食嘅係炸油池、炸雲吞都售罄，唯有下次再嚟。總結：-食物 ❤️❤️❤️❤️🤍環境 ❤️❤️❤️❤️🤍服務 ❤️❤️❤️❤️🤍