飛鷹餐廳

營業中

休息中

我諗好多人都知太子有兩間懷舊扒房，通常都係金X大餐廳多啲人食嘅。其實我都係第一次食飛鷹，始終名氣的確無金X咁勁啊嘛。黎到門口，懷舊嘅門面設計，手寫嘅餐牌，依然保留90年代情懷！餐牌第一頁就係四個熱門鐵板牛扒餐，我揀左新西蘭肉眼扒餐（$98），個人鍾意食熟少少，叫左7成熟，黑椒汁。大大個嘅麥包放在眼前，仲熱辣辣，肚餓嘅我完全忍唔到了！🍅羅宋湯✨好好味嘅餐湯！✨蔬菜足料，加少少辣味，但唔會太搶，同番茄味好夾！🐮紐西蘭肉眼扒✨份量奇大，一個女仔係無可能食得晒✨如果你係肉食男就啱晒你喇！✨肉眼扒比牛柳嘅肉質實少少，我個人覺得OK7成熟拿捏得非常好，keep到裡面少少紅色！good啊！👍🏾-好鍾意去呢類型嘅餐廳，真正香港懷舊風情，希望佢地可以撐落去！香港人精神萬歲！💪🏾

深水埗區的真.舊式扒房，一看門面就知有返咁上下歷史。 味道方面偏重口味及份量偏少，個人來說感覺一般。鐵板雞扒餐 ($105)有餐包、餐湯、主食同飲品。麵包是大大舊的麥包(比一般扒房的大)，配上牛油食，的確唔錯。.餐湯就揀左白湯，但由於太鹹既關係，喝了兩口便沒有喝了。.個雞扒我就揀左蒜蓉汁，扒餐得份量都算幾大份，雞扒嫩口多汁，唯一不滿地方是跟上的薯菜份量，薯條只有數條😭飲品方面點了凍檸茶，份量依然是很少，幸好我叫了少冰，但其實兩三口便喝完了🍹

係深水埗嗰邊，又想食牛排，但又唔想行去太子嗰邊，今次就食呢間做左非常耐嘅飛鷹餐廳，我好耐以前都知呢間餐廳嘅存在！夜晚八點左右去，唔洗等直接入得👌🏾餐廳格局比較舊式，不失懷舊味道，最值得一讚係佢嘅抽氣做得比較好，食完唔會成身牛排味👍🏾🍞🍵頭盤前菜：👉🏾呢邊嘅餐包比較大嚿，一個牛油唔係好夠，而且叮得無咁熱，沾啲湯一齊食比較有味👉🏾湯方面，個人認為紅湯比白湯出色好多，蕃茄味道好出，而白湯味道都唔差，只不過係紅湯出色好多🐮牛柳餐（5成）👉🏾鐘意食軟淋淋嘅牛嘅話牛柳餐相當適合你！5成做得恰度好處，入口非常軟熟👍🏾👉🏾黑椒汁味偏辣，不過勝在肉質鮮嫩🐮肉眼餐（7成）👉🏾肉質比較實，個人認為牛柳好食好多😋，不過肉質都係好鮮，食唔到隔夜牛嘅味道👉🏾份量足，食哂成個餐一定夠飽總括嚟講，呢間老字號都算係keep到水準，畢竟咁多年都仲有水準，價錢方面每人大約100左右，合理抵食，可以回頭👌🏾

第一次去飛鷹, 亦都係最后一次!點咗紅白湯各一, 西冷牛扒配燒汁, T骨牛扒配蒜蓉汁, 兩杯黑牛.優點 :1, 餐包係熱嘅, 而且份量唔細.2, 紅白湯夠熱, 紅湯味道較濃郁.3, 兩份牛扒無偷工減料.4, 蒜蓉汁有蒜蓉味.5, 格仔枱布令餐廳格調提高.缺點 :1, 白湯得個咸字,味道好死.2, 兩件扒好似放入炸爐炸完再放係鐵板上.3, 鐵板完全唔夠熱! 唔單只我果塊唔夠熱, 眼見廚房所有出嗁鐵板都唔夠熱, 無鐵板餐獨有嘅”咋咋”聲! 失敗!4, 配菜唔用我中意嘅雜豆轉用椰菜都算, 連薯條都得雞碎咁多? 失敗之中嘅失敗!5, T骨扒比牛扒嫩口, 但隱瞞有苦澀味, 肉鬆粉味?6, 地方極淺窄.7, 服務唔掂, 成四張枱掛上留枱牌, 食完都唔放出黎! 見D客係門口等又唔多理, 態度極hea!8, 黑牛嘅可樂味道古怪.9, 冷氣不足.總結 : 食過一次就算嚕, 質素同服務咁差, 睇怕都唔會再幫襯囉….

下雨天六點到門外未有人排隊，三缺一共四位（等齊人先可以入座），到齊入座四人卡位叫左四個餐：鐵板丅骨丶西冷丶肉眼＆牛柳餐，先來勁大個麵包（太大啦包是軟軟），紅湯可以但略甜，主菜牛扒上場但鐵板唔夠熱汁已經淋左係扒度，(鐵板上的扒汁應是上檯係我面前淋下去，這個沒有聲氣的扒⋯）四個扒冇肉味汁唔夠，兩凍兩熱飲吃完$451埋單冇下次。

叫一個95蚊海鮮餐，黎到用急凍海鮮包去焗，成碟係白色漿糊物體，完全唔可以叫做食物，同佢伙記講，佢話海鮮餐就係咁，唔啱食你就唔好食law,服務態度一向差都算，仲要比碟唔知乜嘅嘢叫人食，有冇再差D，咁大個人都未見過一碟咁核突嘅所謂食物

朋友介紹，假日接近2點到達午膳，到門口，就比侍應招呼，來回幾次問人齊未，已答幾次人齊啦，態度又唔係好。心諗食餐晏無所謂，通常出名嘅舊餐廳，服務可能無咁好。入去座低order野食，幾個侍應掛住傾計，有講有笑，要叫幾次先埋黎，埋到黎就變臉，問野要問兩次以上先答你。算啦，當去左茶記，最緊要d野先食。叫左個蕃茄牛柳會意粉，西炒飯，葡國雞飯，好似個名係咁叫，不過都唔緊要，因為全部味道一般，無乜特別。最特別係班侍應，當時食到過左2點半，我見餐牌有下午茶，但無寫明星期幾會供應，好自然咁問其中一個待應：假日有冇下午茶餐？侍應大哥目無表情望住第二度咁答：無。問：哦，剩係平日先有？但下午茶餐牌只寫2點半後供應喎。侍應大哥：無。心諗，咩呀，你答緊乜呀？！再問：其實係米今日無下午茶？待應大哥：入面未得。再三問：咩入面未得？侍應大哥：要2點半後。我都火火地：咁即係今日有下午茶，要2點半後，依家2點8，應該有喎，咁問你又不停咁答無！？侍應大哥：入面廚房未出得。我地：OK，唔該晒。待應大哥行番水吧，繼續同幾個侍應有講有笑（變臉真係快）我唔想再有交流， 問左咁耐，真係覺得九唔搭八，呢度待應都唔係做野嘅！你話有，不過廚

初初係俾門口個午餐牌價錢$$$39$$$吸引咗(仲要免加一), 去茶餐廳都要$4X啦。 一入去就覺得好似去咗幾十年前既舊式西餐廳，昏暗既燈光，窄窄既卡位。中午時段約十二點幾，時間仲早，大概有五成入座率，我選擇咗午餐$39，有湯、麵包、蒜蓉牛扒意粉、飲品，抵到爛啦！食物方面，最無敵係又大又熱嘅提子包，實在超驚喜，羅宋餐湯好多椰菜加上味濃，實在好味。食完個包飲埋湯都已經飽咗7成。牛扒飯份量都唔細小，個意粉汁比較多，有D滯。餐飲凍檸茶味足。整體而言，早餐價錢食午餐，係超抵的選擇！推介。

深水埗區好多價廉物美嘅餐廳，當中飛鷹餐廳相信不少人試過，由於情人節，我地一行四人決定平平地慶祝，而另一半又好D意舊式扒房餐廳，所以另一對介紹佢哋食過嘅飛鷹餐廳晚膳，但在情人節食牛扒，要有耐性呀，因為排隊是常識~而且飛鷹都出名，所以排咗個半鐘先入到去其實餐廳不大，坐得好逼夾，裝修係舊式扒房風格～牛扒類價錢多為＄140，其中只有T骨貴小小，＄155，全部扒類都有餐湯同嘢飲跟～餐包好大個，紅湯係蔬菜羅宋湯，酸中帶甜，白湯係雞肉忌廉湯，比較淡，但食到粒粒雞肉。西冷牛扒，配薯菜同黑椒汁，好大份，而且又滑又𣺉身，睇下，塊扒好厚嫁，叫幾成熟係以單數落order，即可以叫3、5、7同9成熟度，個人建議5成熟，既肉嫩多汁，又滑又𣺉。蘇格蘭牛扒，都係5成熟配黑椒汁，其實蘇格蘭牛扒即係肉眼扒，較重牛味，除大塊外，配菜都爆多，而且個黑椒汁幾👌，如果中意生蒜，可以加錢落生蒜~我就叫咗鑊牛柳，配燒汁，呢個係無得要幾成熟，而且都係鐵板上，佢D薯菜同牛扒嗰D唔同，牛扒係薯條蔬菜，而牛柳係燉薯仔。牛柳有成五六塊，一D都唔吝嗇，亦好嫩滑𣺉身。

黑椒T骨扒跟意粉紅湯，再加D生蒜，食到一半，涷o茶少冰吖唔該！塊T骨扒超大塊，簡直回味無窮！我超愛，以港式扒餐，我只鍾情呢度，牛扒算味濃，又夠淋，跟鐵板上最好唔好嗌咁熟，環境夠懷舊，好有60年代，阿飛正傳feel，其次我推介黑椒牛柳，還有跟嗰個餐包超軟熟，又大個！正正正！每年聖誕節我都來呢度食聖誕大餐！唔識牛仲可以食呢度嘅豬扒餐，全消餐，都幾好味架。以咁嘅價錢咁嘅質素，我覺得已經超晒班！一個扒餐都係百幾蚊！真係好平！

有朋友介紹到飛鷹餐廳食晚餐，懷舊扒房，價錢實惠。不過服務態度極度惡劣，無論食物有幾好都一定唔會再有下一次，更加唔會介紹朋友到來！一去到先攞位，有一位好有禮貌嘅侍應想安排我們就坐，點知後面有另一個態度非常惡劣嘅侍應大叫我哋出去等，咁我哋唯有喺出面等一陣。其實餐廳裏面有不少空枱，不過未齊人唔俾入都明白的。我哋共有五位，有一位泊緊車未行到嚟，因為有啲趕時間所以我哋諗住入去叫定嘢食先。坐低左之後，嗰位冇禮貌嘅侍應不斷質問我哋人數係咪五位，到落單嘅時候更加係非常惡劣咁樣質問我哋點解只叫四個餐。我哋解釋另一位朋友已經行緊嚟，好快會再叫多一個餐，不過佢繼續黑面好似好唔滿意咁，沒有回應咁就行開咗態度態度簡直係想鬧人咁！其實前後只係5分鐘內既事，我嘅朋友已經嚟到，成餐飯佢就不斷眼超超。講真，佢嘅服務簡直一粒星都唔想比！其實食物的確不俗，不過成餐都冇mood！之後上網search呢間餐廳，發現原來現任老闆係一位後生仔，如果佢仲想繼續保留家族生意，好應該改變一下員工嘅服務態度，否則就算keep到食物質素都唔會再有客人嚟！其實其他員工都10分正常，只不過有一個態度咁惡劣咁過分嘅員工都足以令人卻步！

餓底難得有機會同老公拍拖出街出飯，點知想食既一係就要排隊，一係就收左工，行下行下諗下諗下決定食飛鷹。入去前都預左坐得逼坐得衰架，坐得唔舒服無問題，服務質素唔高都無問題，但係......先講我份T骨（洋蔥汁、7成熟） 鐵板上，但竟然無我期待既「咋咋聲」，算。但上到枱發現原來無煙出架喎，都算。一拮條洋蔥食都係唔熱既，我都算。一切開件扒，好粉紅呀大佬。而且舊肉都係唔熱架！成碟野溫粒粒，我食緊鐵板餐喎大佬😫汁：一般。肉味：無乜。口感：好淋。薯條得3條，淋晒爛晒，明明之前都又多又好味。我老公隻豬手（燒汁）隻豬手好！咸！而且都係唔熱既，我真係唔知2個餐係放左幾耐先拎上枱？定還是根本就整唔夠時間？（但其一我地無催過佢地出餐；其二係當時唔爆場，職員只係度不停吹水）而且薯條都係少的可憐，得個10小條😔飲品：都係keep住咁細杯不變餐包：都係大過個拳頭餐湯：羅宋湯都仲係好飲，夠濃夠香總括：不去也擺，香港唔只佢依間舊式扒房。

之前聖誕節路過，很多人排隊這是我對它的第一印象。男友說這店很老很出名。今天選說分手，選了這家店。一進門有些懷舊感，服務還算可以，沒其他食評那麼差。也許是6點多，不算多的關係。座位比較窄，4人座位，怎麼看和感覺都只像只可坐放2人食物的。點希臘牛扒（沒得選成度）和肉眼。牛扒還好正常的港式口味，薯條失敗，冷冰冰/凍冰冰又冧，似一早炸放耐左的。羅宋湯甜，白湯少少鹹。肉眼好鹹，鬆肉放太多，太過好切冧過頭。白飯=冷飯。紅豆冰都唔好飲。。。。$235/2人，不合適分手吵架。食物已經太破壞氣氛。食過一次就好，牛扒叫還可以，其他選擇放棄。

港式情懷的茶餐廳，格仔鋪的檯布，帶出不同情懷的用餐格調，所有餐廳也是用不同燈光的打照氣氛。飛鷹餐廳同之前太子的扒房不同，這一間會選用麥包做餐前點。。。羅宋湯也是可以享用。

餐廳環境就比較狹窄，但係勝在夠懷舊。餐包並唔係一般用開嘅嘉頓餐包，香味十足牛扒多汁，熟成拿捏得幾準確，三成就三成，唔會送到上枱變5成，不過旁邊啲薯條可能唔夠汁成日都燶晒。餐湯夠曬料👍🏻鍾意食蒜蓉嘅朋友可以加多少少錢加埋個蒜蓉(建議share)價錢合理仲送杯細嘅飲品。因為餐廳細，座位比較迫，坐唔到卡位嘅有人岀岀入入就麻煩啲，而且人流較多，員工燥底都預咗。除咗扒餐，都有其他炒粉麵食既，下次可以試吓。