雅趣燒臘小廚 (已結業)

人越大就越麻甩,越來越愛一些麻甩格的餐館,這間雅趣,為其中之一.老闆娘每次見到我,例牌問我飲唔飲湯,今日番茄薯仔湯好靚架.整碗啦.)基本上,十次有七次,例湯都係此一味,正中下懷.不含味精,原汁原味沒有下茄膏,味道鮮甜.燒味飯除叉燒之外,燒肉也不錯,但千祈不要點生腸,一點味道也沒有.尚有其他客飯如蒸肉餅,蒸桂花魚等,住家味豐富.以前還有鵝頭鵝頸這些送酒小吃.而家沒有了.當然,全個北帝街附近有電視的食店,只得這一間在賽馬日中播賽馬,亦是留住我的原因之一.拿住份馬經,同老闆度馬仔.埋單老闆娘實話又去買馬呀?)我係呀,呢場買.....)又同個電算機做朋友去.

在土瓜灣尾要食燒味黎講,新山道的"雅趣",已成為小弟之飯堂.同落山道明珍一樣,此店是另一個的士佬,在土瓜灣的聚腳點.每次下午時段,極多的士泊在門口,老細負責睇水.一到賽馬日,成班熟客同老細一起刨馬.好不熱鬧.入番正題,此店的叉燒雖然同昔日龍城榮記有點距離,但係已相當不錯.肥瘦分明,肉質鬆化.燒腩仔入口未到即化之級別,不過都相去不遠.算好難得.另外乳豬唔係咩野即燒炭燒之貨色,一樣好有水準.唔食燒味的話,可叫其他家庭小菜,蒸魚同蒸肉餅就最多人叫.連白飯例湯都係三草野左右,典型土瓜灣消費指數.如果想吃些小吃佐酒,可以叫碟鹵水鵝頭,$15就有一大碟.一邊啜骨一邊冰凍生啤,好不過癮.平心而論雅趣的燒味,未算頂級.有時呢樣又唔係絕對,土瓜灣黎講,已經夠殺有突.安心做其山寨王罷.