鋮記一品粥鋪 (已搬遷) 新店位置

今晚7點左右黎左呢度食粥,叫左個$25既粥餐--艇仔粥+腸粉+豆漿艇仔粥---叫左走牛,先講粥底,談不上好綿,但魚湯粥底十分鮮甜!而且相當足料,抵讚!腸粉---出奇地好食!腸粉夠薄夠滑,而麻醬甜醬亦頗香,辣醬則削左d,無咩辣味.豆漿---無渣但偏淡,一般啦!$25實屬抵食!老闆亦頗親切,下次會試魚粥.

4月15日，18:15因要到QE探病，見肚餓，便先到這裡吃粥。魚腩粥：粥底：好綿，但極稀薄，有1/4是粥水，慶好充滿了魚鮮味和清新菜味，師父算少，舌頭沒有起哄。魚腩：火焰魚腩，先由師父爆過，才放到粥內滾，因當時三臺人都要魚粥，所以火球三現。因走了油，魚腩鮮味封住了和不會過老，爆熟了那部分，那甜味更實在。魚腩份量不算少。配料：唐生菜和蔥段，唐生菜獨特的味道，令這碗粥活潑起來，有清新的感覺。離開時，我問店主可否要厚底，他說沒問題，下次一定要學乖點。題外話：在店主和食客言談間，知道店主從前在和味打了十多年工，才自立門戶，又是李景的翻版，在各行各業不停地發生。

o尋日又食粥，兩個人叫了魚卜皮蛋粥及豬潤魚腩粥，好夠份量好大碗。前者粥底幾綿，後者粥底較稀及較咸。講番d 粥料先，一碗裡面有十幾舊魚卜，我印象中好似未食過魚卜，食落口好韌，但係老公話好好食；皮蛋唔靚蛋心好實；豬潤起碼有10舊，顏色好深，初時以為唔靚，咬落原來好爽，魚腩好少得三、四舊，質素一般，不是十分鮮味。再叫碟炒麵，師傅再炒番熱先上台，雖然係熱，但係炒得過火，有d鑊屎，而且勁多油。再試埋o黎間，就差不多試均附近幾間主打魚粥舖，總括o黎講，覺得粥底係彌敦好，而粥料就和味水準高d。

「得未呀，叫左個及第粥好耐喇....」「我話左走清喎........」「幾錢呀？快d啦......」「仲有個腸粉未黎呀......」「執檯啦......」以上的對話是節錄自該小店的客人。唉，有時覺得，在這類的家庭式街坊舖，不要過份要求服務吧，黎得既，都預左要等咖啦，咪用另一眼光欣賞下週圍事物好過啦，何必動氣，看看樓面的兩個阿姐，一個還上了年紀的，被客人罵時還面不改容，報以微笑，仲想點？放鬆下啦香港人！有點發燒，食粥穩陣d，就專登走去這裡試下呢度d粥。這裡以魚粥作主打，如魚卜、魚骹、魚骨粥等等。但我反而想試下傳統的及第粥。的確等了幾耐，冇偈的，想食生滾粥，又咁多人，我寧願佢慢慢煮，話晒及第粥都有豬內臟，唔急的，慢慢煮熟d。終於上檯，滾熱辣，幾塊明顯的豬潤最為突出，咬落又幾爽脆，不會有起粉的感覺，大大塊，正！裡面還有豬腰，同意之前KC兄所言，是有點「化學」，有點假，原全沒有豬尿嘎味的豬腰，雖然易入口，但失了真。豬心脆口，但有些都幾韌難咬。粉腸一般，不算突出。粥稱不上綿的一類，都是迎合大眾的口味。還呵打了一個腸粉，滑滑的，但不夠熱，味道都是一般。今次沒有食到他這裡主打的魚粥，今次俾住OK先，

星期五去捱義氣，收工的時候朋友話請食消夜。因為幾個小時前才吃了壽司，故不太餓，提議去吃粥，兩個人就來了這裡。呢度十點幾人亦不少，朋友推薦及第粥，但他自己就怕膽固醇，叫了魚卜粥。呢度格局同相隔幾個舖位的和味生滾粥幾相似，又係成條魚的各個部位都有得食。兩碗粥都是生滾，所以都要等了一等。及第粥幾大碗，配料亦多，有幾塊豬潤、豬心、豬粉腸、豬腰及肉丸兩粒，還有生菜舖面，是相當的有睇頭。粥底不算稀，但亦不算綿滑。是魚粥底，有甜味，不過亦有味精。豬心吃來爽脆，但味道就不及豬潤般好味，這幾塊大大的豬潤是全碗及第粥最出色的一環。其餘豬粉膠太腍，豬腰味道又太「化學」，肉丸則有味精，俱麻麻。所以如果再來的話，是叫豬潤豬心粥就可以了；朋友的魚卜粥都十分不錯，魚卜滑溜爽脆又彈牙，有水準，似乎魚肉粥也是這裡的強項。叫了「多青」，來的真是多蔥，不是蔥花而是蔥段，吃過夠皮。又阿姐推薦油炸鬼，竟然還說是「新鮮炸起」！埋單40蚊，不算貴，可以一試。不過行多兩個街口，就要買可樂飲了。

1月29日在尖沙咀看完海南雞飯後,因在看電影途中吃了很多爆谷,加上看電影時已大飽眼福,所以已經半飽,故此食番碗粥就最岩,之前友人食過,說出品也不錯,於是來試試.三人來到,場面有點冷清,叫了及第粥、魚卜粥和炒麵,炒麵首先到來,十蚊來說,好像細碟了點,不過水準頗好,顏色較平常吃開的為淺,但都好夠味,而且做得好乾身,一點也不油膩,三兩下手勢就吃完了,之後來的是及第粥,嘩!好大碗喎,絕對是二人份量呀,粥底本身較稀,鹹淡度適中,豬肉丸好有肉味,豬潤帶點爽脆,其他如豬腰,以及一些不知名的內臟也都具有水準,是一碗不錯的出品.最後來的是魚卜粥,不知是我吃不慣,還是什麼的,個人不太愛吃那魚卜,吃下黏黏的,好怪,有點難吃,所以我只吃了幾口粥就作罷.