金記冰室 (霎東街) (已結業)

又在晚上來到老銅，吃的當然又是近期大愛的金記冰室~地道懷舊鮮茄龍脷魚農夫包 ($79)這位農夫包大大個的，在燈光的映照下，令人食指大動。蕃茄的味道更是芬香撲鼻啦~打開包蓋，芝士拉絲的感覺十分美好。但…看著看著…怎樣這個農夫包的樣子有點像大型連鎖店的「焗豬扒飯」啦..可味道卻大不同~XD蕃茄味淡淡的，跟芝士味成為相當不錯的配搭。另一方面，龍脷魚大大塊的，肉質很嫩滑的，魚咬落一點都不乾，而且令人愈吃愈想吃。農夫包的最底部份是炒得粒粒分明的炒飯，相當香口，沒有因為蕃茄醬的緣故而令炒飯變得過於濕潤。相反炒飯再配合魚跟蓄茄汁一起食用，更令人食指大動~至於農夫包嘛，外皮脆脆的，包中間軟棉棉，加入了蕃茄醬跟芝士的味道，更是令人停不了的吃。整體來說，這個農夫包的賣相跟味道也相當不俗的，而且價錢也算親民，不錯喔。

金記在香港是老字號，西營盤那間我常去；這天剛巧經過銅鑼灣，看到這裏也有金記，就來試一下。早餐我喜歡吃麥皮，貪其健康易入口，早上吃也不會太油，就叫了一個麥皮早餐。在香港，要吃麥皮早餐不容易，必然是舊式茶餐廳才有；翠華和太興都不會有，可能是比較麻煩。奶茶也對板，杯子也是舊式的，很有風味。蛋治也是我的至愛，健健康康。整體裝修也是很懷舊的，來這裏吃東西很開心。

今日放工後和同事突發慶起去食下午茶，剛好金記下午茶去到6點半，還趕得切就坐下來。同事第一次去金記，都被它的裝潢吸引，實在有懷舊風味的茶餐廳感覺。因為吾想食太飽，只選了瑞士雞翼沙律及吉列魚柳沙律。食物有點失望，因為份量太少（每份$36），瑞士雞翼食落沒有味道，至於吉列魚柳炸得剛剛好，食落就反而好香口，沙律吾夠凍。同事大讚杯奶茶有大排檔水準，好味所以計埋裝修，整體就不過不失了

原址於筲箕灣的金記，而家開咗新店係銅鑼灣。仲有懷舊的電車設計。十分有風味～～就連飲品，都好有懷舊感。凍谷古，係懷舊古朱古凍飲。朱古力味微苦，而且十分濃郁。每日，都會有幾款就新鮮食材而推出的小菜。呢條係石斑，新鮮嘅清蒸就已經好好食。肉質嫩滑，食唔停口！泰式可樂豬扒。用上鬆軟的大大塊豬扒，食起上黎很入味而且鬆化。加上惹味的泰式醬汁，食起上黎，特別有風味。咖哩牛腩農夫包，係呢度既招牌菜之一！睇下起晒絲的芝士，仲有一口一啖嫩滑入味的牛腩，點埋個咖喱汁，一流～～攬才肉菘四季豆，有啲似干扁四季豆。大大碟，而且好夠火喉好入味！！XO茄子牛仔骨，就連平時唔食茄子既我都食埋一份。個汁好好食，而且牛仔骨啲肉質好嫩好好味。茄子同樣入味非常！雞翼薯條，無論係食下午茶定係晚餐，都會點上。因為醃得好入味。而且炸得好鬆化。食起上黎，卜卜脆！牛油多，用上鮮牛油，加上烘得卜卜脆，好味！！

話說PJ 一起已超過11年了，但阿P 一直都未同阿J 去過冰室食飯，何解? 認識阿J 的朋友應該會好明阿P 的原因....但凡事總有例外，因為這冰室是新打造的摩登懷舊冰室，經阿P 評估過後，認為阿J 應該接受到，所以PJ 的第一次冰室約會就在銅鑼灣的金記發生了。來冰室，當然要飲返啲特色飲品啦。我就叫左個雪糕紅豆冰($26)，而阿J就一臉茫然咁問我咩叫做"滾水蛋"($20)，咁我就答佢即係滾水加隻生蛋然後自己加糖攪勻，阿J話咪玩啦，我話真架，你叫嚟試吓先la。半信半疑的她試完後話都幾得意幾好飲，不過都係鍾意我嗰杯大大粒紅豆再加雪糕嘅紅豆冰。朋友話不如試吓個豬膶通粉奄列多士餐($48)，咁得意晚飯食呢D? 我話咁不如食埋個西多士($26)同咸牛肉蛋治($20)呀笨！豬潤夠大件腍身，而西多士亦大大塊同香口，加埋花生醬、糖漿同牛油，朋友食得好滋味。至於咸牛肉蛋治，其實平日阿J Tea Time 好鍾意食的，只不過佢無估過會在晚餐出現....講返個蛋治，蛋夠嫩滑，咸牛肉份量亦多，麵包亦都算軟熟。食完啲"小食"，係時候到主菜喇，叫咗粟米斑塊($74)同埋清蒸石斑仔($98)。斑塊唔算好厚，但總算有

其實只是離開半年去Exchange，根本不是什麼大事來著。只是我們身處的是香港，分分秒秒變幻莫測的地方。當然世界不停轉變，不只在香港這彈丸之地，但速度有快有慢，香港就屬快，很快。眨眼之間回來了，在這短短六個月間，單說飲食，有很多店子結業了，開業了。也有些擴張了，就如早前跟友人們吃過的金記冰室。　　不變的是懷舊而不死板的裝潢及設計，不同的是乒乓球拍餐牌加了揭頁的目錄。餐牌內的選項依然非常多，琳瑯滿目，加上每日精選，吃一個月都不會嚐得完。這次的銅鑼灣分店面積頗大，所之除了卡位梳化位，仲有大圓枱。同酒樓大排檔果種一班親友聚首，熱鬧，興高采烈的感覺同出一轍。　　感謝友人的安排，攜來了蠟燭，可以重溫一下生日吹蠟燭的情景XD。雖然多番再嚐，咖喱牛腩一口包　$89這名堂依然讓人有點不解。如果單看名字，幾十蚊，係冰室食份一口小食，細細份，一定會覺得唔值得唔抵食。然而，其實體為大大個裝滿餸仲有飯底既農夫包，比面還大，哪只一口？管不得太多，趁熱辣辣要快食，讓那焗面芝士微溶牽絲，讓農夫包外層香脆帶酥。重點在於牛腩，大件足料，厚身而稔化鬆綿，不失牛味。想起半年期間吃過有一半的牛肉都是膻腥得很，回到香港吃一口真

幾個月前公司附近新開左間懷舊風味的茶餐廳，今日放工後終於去試一試。餐廳裝修佈置得充滿懷舊色彩，牆身的一幅大壁畫，真係已經好吸引另外最吸引的地方是餐牌用乒乓球設計，食物款式亦非常多，發覺有些選擇性困難原本想食必點之選--咖哩豬扒農夫包，可能今晚遲來，最後一個農夫包，已經給隔離枱叫左，剛好沽清只好選擇其他吧！我和朋友分別叫了日式豬扒炒公仔麵，炒貴刁及兩杯奶茶。公仔麵炒得乾爽且條條粉明很乾身，豬扒鬆軟好滋味；炒貴叨炒得很乾爽，很有鑊氣。至於奶茶夠香滑，茶味濃郁今次食吾到咖哩豬扒農夫包，再有機會，一定會再來嘗試！

1967年的香港，你會聯想起甚麼歷史大事呢?67工會暴動…獅子山隧道通車…船灣淡水湖落成…這些都是影響著我們現在每一個市民的大事，但如果你問Step哪一件事最為切身、最能令Step感受良多，Step會告訴你是1967年『金記冰室』在筲箕灣道261號後座正式開業(現已結業)。<<<不要打頭打面啊!!!>>>Step之所以對金記冰室有所認識，並不是Step和筲箕灣或金記冰室有一段不解之源，只是Step在西營盤返工，而西營盤有金記冰室，每個星期總有一兩日在那裡開飯，而近年金記冰室也開始大展拳腳，先後在灣仔和數碼港開記不同懷舊主題的分店 (註一)。今晚Step知道自己可以準時放工，立即約了娘子和朋友們去銅鑼灣享用晚餐；但放工時間將至，朋友們還未決定去那裡開飯…後來Step在網上搜尋時，發現了一單生果日報的新聞：『【逆市擴充】茶記反攻 金記冰室27萬租銅鑼灣舖』Step立即提議：『不如去試下金記冰室，原來在銅鑼灣開了新店!!』所有朋友都沒有異議，異口同聲說『金記? 沒有試過啊…就試下吖』(註二)就這樣，今晚Step、娘子朋友們就去銅鑼灣金記冰室開飯

最近在銅記行過見到這間好有懷舊風味的冰室, 相公就同我說, 在他公司附近都有間金記成日lunch 同D同事去食, 話好好味, 咁既然行街行到晚飯時間, 那就入去食啦~好得意的menu來個鼓油王雞翼沙律 (HKD46), 沙律是小時候吃的薯仔沙律, 大大粒的薯仔加其他生果及沙律醬, 有點懷念以前在家樓下間茶記的雞翼沙律加可樂呢~ 而雞翼是瑞士雞翼的味道, 不過這個雞翼就再煎香, 鼓油王雞翼入味非常之餘都好香口, 帶給我新鮮感的說而相公就點我一個農夫包 – 咖喱牛腩農夫一口包 (HKD89),大大個農夫包裏面其實是一個咖喱牛腩飯, 而且還是加芝士一齊焗的咖喱牛腩飯+包, 牛腩非常腍之餘也有牛根腩部份, 配咖喱一流; 加上這個農夫一口包非常香脆, 連咖喱汁(其實一口包已經充滿了咖喱的味道了呢), 所以是極度美味 (但食完已經好飽) 的一個菜式.牛扒沙律 (HKD51)但我地就轉個薯條, 牛扒的肉質還何, 不過就好像薄了一點, 不過以五十多元來說也差不多, 而薯條就不是我預計的粗昔, 不過也是香口好吃.雖然頭先食了個一口包, 但也想吃點甜, 就叫個西多 (HKD26) 來試下, 雖然好肥, 但

金記冰室這幾年擴展得很快，由西環，到灣仔，至最近分店已開到銅鑼灣了！這間銅鑼灣分店在利舞台附近，更方便！以後在銅鑼灣不需光顧連鎖食肆，又有另類選擇！一進店舖，嘩！很有趣！大大架電車廂座啊！好想進內坐，可惜當晚車廂內滿座，只能坐其他位置。金記冰室有什麼划算？我一定推介蒸魚套餐！大大條清蒸石斑加白飯以及飲品，只是＄98，吃到飽飽！魚蒸得剛好，嫰滑不老，加上豉油汁，拌飯一流！原本想叫多碟蔬菜，但一看餐牌，再比較其他以肉為主的菜式，看來吃肉比吃菜更划算！我們再叫多碟粟米斑塊 ＄74，大大塊魚柳，不錯！吃完正餐吃甜品，上次在灣仔分店吃過西多士回味無窮，今次再想吃啊！保持到水準，只是略嫌無上次吃的這麼多花生醬！ （少少扣分，但下次都會再叫）飲品方便，我們選了雪糕紅豆冰與黑牛，天氣這麼熱，即時透心涼！

在某個客office做到天昏地暗。餓得再唔食野會暈低局住落黎抖個氣。諗住求其搵間野食個快。點知唔知幾時金記開到黎呢到。咁梗係唔洗諗9衝入黎啦。正當我想叫個鮮牛福面之際。呀哥仔行埋黎問F餐最後一個。要唔要埋佢。我心諗賣得快實係好野啦。咁就連係乜都冇問就要左。點知⋯⋯我等左成兩個字都未有得食。喂大佬。平時啲野叮一聲就有快過我自己淥杯面嫁喎。點知有以下既對話我：呀姐。我個F餐未到幫我跟跟呀！姐：F餐呀。即叫即整係要啲時間嫁啦。我：平時你啲野都係嫁啦。邊有咁耐嫁。姐：要蒸嫁嗎！我：下？F餐咩黎嫁？姐：魚囉！你叫左乜自己唔知嫁？當我面都未矇完之際。落單個哥仔就抬左條魚上黎。係條魚唔係舊魚唔係班腩係一。條。魚！！！估唔到我竟然係叫左一個清蒸石班餐。更估唔到係係金記入面。更更估唔到只係一張紅衫魚既價錢。係銅鑼灣可以蒸到條魚做晚餐。仲要火候剛好離骨。啲豉油仲要係蒸魚豉油。送飯一流。

知道這間茶餐廳已有一段時間，剛巧經過；當然要一試吧！進入冰室，就像走進時光機，看到很多懷舊的東西和装修，既親切又興奮，可能人年紀越大；喜歡舊物的心就越大吧。櫃面有一排很古舊的全黑色圓形燈掣；印像中兒時家居的電掣便是這個模樣，相信那些八十後、九十後未必見過吧。餐廳正中央還擺了一部「電車」，總站就是筲萁灣；夠晒貼題😉 一坐下，第一眼便看到這個「乒乓球拍」的餐牌，立刻有抽返兩板的衝動。😂最喜歡飲奶茶，到茶餐廳又怎可以不叫呢？ 奶香味滑溜，可惜茶香淡薄，比較普通。看完餐牌，很多久未見過的「名字」，一一出現在眼前，例如：和尚跳海、牛肉汁、黑牛、白雪公主.....等等。原來這裡還有小菜叫，始終是晚飯，沒有理由各人自己叫一個常餐或小吃自己食吧。由於人數不多，經過一輪「殷選」之後，選定了以下的食物：豉汁蒸盲鰽 ～ 盲鰽蒸的時間剛剛好，肉質嫩滑，䜴汁香濃惹味，這也是另一飯盜呢😋欖菜肉崧四季豆 ～ 四季豆炒得爽脆，配上肉崧，又是一味伴飯之選。馬來咖哩豬排農夫一口包 ～ 一個大大的農夫包，內𥚃偷空用來放咖哩豬排，咖哩汁只是微辣，然咖哩味卻頗為突出；麵包亦夠香脆，用來點咖哩食，非常美味，但記得一定要即到即盡快

剛好在銅鑼灣，想食個 quick dinner 回家。2口子來到銅鑼灣金記冰室。嘩! 氣氛很懷舊、復古。茶餐廳來說，裝修一流。食品選擇也不少。先點了碎牛蛋治$20厚身滑蛋炒咸碎牛，食落都好滿足。美中不足是麵包沒有烘底。也點了2個晚餐。晚餐跟的中湯是雪耳豬骨湯。中湯也有些湯料在內，比一般茶餐廳足料、好味。清蒸石斑仔$98上桌時，都驚訝清蒸石斑仔都幾大條。真係抵過自己去街市買，再辛水辛汗煮。簡單以豉油、蔥清蒸，魚肉肉嫩、鮮美。趁熱食，火速清掉。想不到茶餐廳有咁正的蒸魚。抵食抵食，必叫呀!欖才肉崧炒四季豆$74四季豆炒得外乾身，但內裏仍飽滿多汁。唔想食蒸、炒清菜,呢碟亦很推介。牛肉汁$19牛肉汁是少見的飲料，所以點來試試。飲落似濃味的熱雞精， 好似好滋補呢!黑牛$23黑牛亦是少見之選。一大球朱古力雪糕溶掉在可樂中。忍不住吃一口朱古力雪糕，是舊式雪糕，好傳統。雪糕溶掉後，可樂多了雪糕的creamy，真係幾夾! 

夜媽媽係銅鑼灣搵野食雖然唔難但想平少少，食下普通野先難...周圍間間都差唔多七、八十起手..個頭又少茶記同冰室所以見到呢間有就入左去醫肚入去叫左個咖喱牛腩撈公仔麵($49)份量都OK，依完夠飽架不過咖喱幾好食，呢到當然係食到港式咖喱啦唔辣個種，幾香下，同埋咖喱永遠又同薯仔好夾食咖喱牛腩一定係要食晒佢D 薯仔先 XD但麵唔係出前一丁，有D 似大光麵個種撈完個麵身都有少少硬身間野開到十二點第時夜晚又多個地方食野 =P正評俾個咖喱汁

之前團購以20蚊買40蚊現金劵，買左9張全家去食飯。父親大人愛吃傳統中式晚餐，所以今晩主要以中式套餐為主。石斑仔好新鮮，亦好大條，肉質鮮嫩，可惜是養魚，不過以甘既價錢又的確不能太大想頭會食到野生海魚，性格比已屬相當高。呢間食肆碟頭算大，而且上枱時仍然非常熱，鑊氣夠（今時今日已經少見），但可惜師傅唔知係咪不太熟手煮中菜，生炒骨同牛柳味道都好令人失望，生炒骨唔夠香脆，唔入味，牛柳過熟好韌，茄子唔入味。呢碟生炒骨都算係我成世人食過味道最差既一碟是日中湯係煲老黃瓜豬骨湯，料足夠火喉，無味精，值得一讚！羅宋湯濃郁好味道，加埋牛尾骨入去煲就更好了雪糕紅豆冰亦實在值得一讚，今時今日好多餐廳既紅豆冰冰佔一大半，紅豆也不夠腍軟，用雲呢拿雪糕，但呢度既雪糕紅豆冰雪糕用椰子味雪糕(最傳統既味道），紅豆夠腍，一攪即溶而非仍是一粒粒，飲完只得返2-3粒細碎冰，唔會剩返大半杯冰而阻住你享受埋底下既紅豆！性價比高，有鑊氣，只是中菜廚藝有待改善！