漢記牛什粉麵茶餐廳 (已結業)

九月三日(星期四)同老公做完gym後,我們就到了附近的漢記吃,本身想吃大戶屋的,不過旨吃得太飽,所以就選擇了漢記!我點了魚旦魚麵,味道不錯,魚旦彈牙,魚麵就比較硬!樂園做得比較好!老公點了牛腩豬肉丸河,腩算稔,而豬肉丸都可以!魚皮,味道味道不錯,很脆!加上湯吃都配合得來!

今日下午茶突然間好想食牛腩, 所以又去左漢記食lu. 之前食過哩度既崩沙腩又淋又入味, 所以今次想試下佢地第二款既牛腩, 今次叫左碗爽腩+熱奶茶, $28, 如果唔配熱飲, 仲可以揀汽水, 油菜, 都係哩個價錢. $28既選擇有好多, 除左牛腩之外, 仲有菜肉雲吞, 鮮蝦雲吞, 墨丸, 魚旦, 牛丸, 冬菇等等. 今次哩碗爽腩就普普通通了, 首先唔夠淋, 食完"痴"牙既, 不過勝在夠大碗, 湯底又夠晒味, 米粉吸晒d腩汁, 正到暈. 熱奶茶又係不過不失, 係銅鑼灣靚既雲吞麵墨丸麵就好多, 不過崩沙腩就唔多選擇lu, 所以我下次如果係銅鑼灣區又想食崩沙腩既話, 都一定會番黎再幫襯.

無咩胃口，只想吃點濕濕地既東西，行過漢記見到佢既牛什似乎不錯，就進去整番碗粉食下。坐低連餐牌都唔使睇，二話不說先來碗牛雜魚麵，凍奶茶。再問阿哥有咩菜，回應是菜心、芥蘭、生菜，整多碟生菜都好。魚麵鮮味不足，但尚算彈牙，勉強可以收貨。牛腸肥美，肥膏多得走晒出來，十分滋味；牛膀和牛肚都炆得幾夠稔，其中牛肚也很厚身，可是不太入味，與心目中想要的有些少出入。生菜碧綠，通透又爽脆，對路。奶茶則是普通茶記的水準，不多說。埋單要成四十八蚊，究竟有冇計錯數?

陪朋友黎食，因為行過門口見佢好多都係牛什個D，加上聞到都好似好香。叫左碗牛腩米 $22，牛腩都整得幾林!!! 唔會好un，好好，不過太趕時間啦，下次有機會一定再試!

消遣畢, 回家前想吃點麵食, 以地鐵站為目標的話, 漢記的位置實在是得天獨厚. 腩河的坑腩算腍身, 肥瘦參半口感還可以. 河粉不太滑僅可接受, 可惜湯頭口味太重且帶點死咸. 這種質素, 三十四蚊一碗腩河日光日白在銅鑼灣實在太多候補. 唯獨夜闌人靜時, 人就不能介意太多. PS: 牛雜的食味反而正常得多, 價錢亦較便宜, 唯一不足是店內的辣椒醬只屬普通料, 枉費一看好雜.

Lunch打算簡單的吃一餐，突然掛住潮興的坑腩河，怎料來到時發覺駱克道的潮興已經結束了，帶著一點失望的心情想著吃甚麼好，反正都行了過來，就試試幾鋪位之隔的這裏吧。坐下後便同樣點了坑腩河一碗﹙$34﹚，看見價錢和潮興相比貴成$10，質素應該不會怎樣差吧，由於侍應說坑腩沒餐，要飲品便要加$8，於是加錢要了杯凍檸茶。等了五分鐘左右便送到，碗的份量和之前潮興的差不多大小，坑腩值得讚的是的確夠肥美；但肉的部份炆得唔夠入味而且唔夠腍。本應單憑食物質素還算ok，但$40元的價錢吃一碗如此普通的粉+一杯凍飲，原先打算$30有找的lunch，結果變了$40都唔夠比，實在不值。

去麵店我只會有3個選擇, 雲吞麵, 牛腩河, 牛筋米....雖然呢度既牛腩河, 唔係最好, 但都唔錯!牛腩炆得好腍, d腩有好多肥膏, 女仕食唔食就要諗諗, 不過就係有個d肥膏連埋先好食! 河粉索晒d湯, 好味! 加埋個芥蘭加腩汁, 仲正!

為了買禮物, 來到銅鑼灣, 怱怱買下朱古力, 怱怱走入希慎道逃避維園人潮, 怱怱行入Time Plus 再Search. 怱怱行返出電車路搵一間唔駛等既地方怱怱食D野走. 怱怱地, 找到漢記, 來了一碗牛腩麵, 味道可以說不錯, 牛腩爽口. 出麵都夠快. 惟獨是麵身不夠爽. $26, 一碗麵加奶茶. 有點貴. 但換來不錯口感. 怱怱地, 俾個OK!

間唔中會o黎食班沙腩河﹐因為實在腍﹐味精就食得出有o架喇﹐不過抵唔住班沙腩o既召喚。有時候班沙腩冇晒﹐就叫墨丸魚片頭河﹐墨魚碗味道唔錯﹐可惜就係唔夠結實﹐好在有魚片頭o既質感搭夠。通常會叫碟通菜添﹐估唔到好幾次都非常翠綠新鮮﹐意料之外~

練習完畢，真的是十個辛苦，只想吃湯粉，行經這裡，聞到鹵牛什的香味，吃碗牛肚粉也不錯。銅鑼灣的十時正，也沒幾個客人，食肆競爭也真大。要了碗牛肚墨丸米，加紫菜，多蔥。雙併再加紫菜再多蔥，碗粉夠晒豐富。先吃牛肚，阿厚身，炆得幾腍，但卻不太入味，可以更好；墨丸輕輕的，吃落有墨魚味，但質地鬆泡泡不夠實淨，是「真材」但不夠「實料」；紫菜都美味，沒有沙，而湯底的味精都不算嚴重。總括來說，廿五蚊的一碗米粉，算及格。加碟菜芯及一杯凍飲，埋單37蚊，都算幾便宜。

6月19日19:30偷空南下，回家前在這店來碗牛雜手轆魚麵。牛雜：肥美牛腸夠甘香；牛肚又淋又入味；牛膀口感豐富；牛肺亦入味，齊體有水準。魚麵：爽而有魚味。辣椒油亦夠力度。店小而整潔，店員勤快。

吃了沙腩魚麵, 牛腩勁鞋口,而魚麵就幾好食。地方不太乾淨，無服務可言，當我問亞姐沙腩同坑腩的分別,她話唔知,佢只係樓面, 態度勁串。我同個friend立即叮叮聲。食物普通仲要成$30,下次去後面街潮興好過。

食完"滋味館",幫同事買埋tea,買左個雲吞麵餐配油菜$19,雲吞麵一碗5粒,普通size,一口一粒,蝦頗爽口,豬肉餡亦很有鮮味!麵身無"簡"水味且屬彈牙,抵讚!腐乳通則中規中矩啦!

宵夜時間,叫了碗淨四寶, 腸粗,加碟通菜.魚蛋就唔夠爽,魚皮餃同魚扎就好好,牛腩類好Ｄ,炆得入味又唔會無咬口.交數$50有找. 食得過.