森記海鮮大牌檔 (已結業)

2個人今晚去左呢間,試左以下三樣紅燒豆腐煲, 火腩半肥瘦, 豆腐個面都脆脆地, 最好係佢唔太肥膩好香口好好味椒絲腐乳通菜, 通菜新鮮,油多左小小試唔到鑊氣,好鹹！蒜蓉豬扒, 好多豬扒同好多洋蔥,感覺一流...價錢平...服務ok啦...總括黎講,冇咩要求下呢度都ok既。

這夜同老友兩個又去森記食飯，上次來吃味道麻麻，不過食慣食熟點都會俾多次機會佢既﹗八點左右來，是晚天氣仍冷，斜路位無咩人，找到位置坐下，先向肥佬點兩味餸，再叫多三支獅威。獅威慢慢品嚐，等了三個字，一個餸都未o黎，同肥佬講叫佢跟下，佢就話"得喇得喇!"之後又行左去。算，搵個骰盅玩下啦諗住，點知佢地話骰盅用哂一個都無，我地兩個餓得連0的小吃花生都食鬼哂﹗再等多半個鐘即係等左九個字，野食依然未來，火光了，諗住埋單走人便算，肥佬見狀先識得走入去廚房問下有野食未，又走出來同我地講就來就來。最後乾等了一小時，先來第一個餸，就係是日特價$20的沙爹金菇肥牛，味淡，肥牛算多不過相當肥，唔同金菇同吃真的膩死﹗再等多三個字，小炒王再上枱，呢次出品油淋淋的帶油膱味，最鍾意食既蝦乾明顯少左。食完呢兩味餸都懶得再叫，是旦飲左三支啤兩個餸百幾蚊就埋單走人，今次吃得真不快﹗剔除佢成為我最喜愛餐廳先﹗

返出黎觀塘食飯, 朋友早就霸好位.今日一嚐森記, 森記鋪頭好細, 所以如果多人既話多數都係坐出面.一行十多個坐一張大台, 張大台真係大到伸長晒手都夾唔到餸咁.叫左8個菜, 仲有汽水$7/支先來魷魚鬚, 炸粉岩岩好唔多, 唔會過鹹, 魷魚較林比較易咬, 亦不失煙韌度蠔餅, d 蠔幾細隻下. 幾香蛋味.沙嗲金菇肥牛煲, 沙嗲湯唔夠味.芝士斑塊, 最好食算係哩個, 芝士味如果再濃烈點就更好, 但現時為止撈飯都依然一流椒鹽九肚魚, 真係好巧筷子功, 好易夾散. 炸得非常鬆脆, 好味過炸魷魚炒蜆唔夠新鮮咸魚雞粒炒飯都夠乾身.另外炒左碟蒜蓉白菜仔, 冇乜蒜香味埋單每人$44, 個人都係喜歡隔離既新南苑, 夠多位同比較靜森記哩d 坐出面有人食煙, 又有人玩骰盅, 黎食大排檔既阿叔大多豪邁奔放, 講野難免較大聲, 認真鬥不過.

呢晚地盤加班成九點先收工，但咁夜竟然反而相約到幾個老友一齊去森記。好鬼耐無見，大家各有各忙，四大癲王共聚於森記，從未好過，飲大是必然。未飲大前都食左幾多野，不過今次出品真係十分油麻地。先來既係小炒王，平日炒得乾身又香口，不過今次來到的雖然我愛吃的蝦乾也不少，但食物有一陣濃濃油益味，唔知係咪0的油出左問題呢？之前吃是沒有的﹗見天氣咁凍當然係打邊爐啦，雖然已是我這星期的第五次，不過都是旦，要了個牛坑腩鍋，記得當年食驚為天人，坑腩正到不得了，不過今次坑腩份量少得離譜，友人話食落仲有一陣酸味，四個人一人兩件竟然已經無哂，餘下的是大量蘿蔔及幾根粟米，成98蚊一個有呃鬼之嫌。開始飲酒就無影相了，美國肥牛是半肥瘦貨，成條煙肉咁見到都唔想食﹗好在仲有一味醬爆雞翼保持水準，惹味又香脆，三分鐘就成碟掃哂﹗最後梗係醉醺醺離開，森記出品今次差0的喎，希望下次再來時可以食番舊時的美味﹗

月前到仁愛圍的新南苑試過大牌檔小炒，今晚又碰巧來到附近，本想「翻炒」，但聽聞鄰旁的森記也是形式相近的大牌檔，加上魚腸做得不錯，故轉過來試試。森記佔據仁愛圍尾段位置，設一冷氣開放小店接通裕民坊及仁愛圍，圍內露天位置亦放有十數大圓桌，鄰旁除了有其他食店，還有遊戲機中心，極具原始大牌檔「路邊」風味。我們一行七人於七時許入座，先點了數個小菜及外間較少有的「風花雪月」啤酒，雖然有聞這裡的魚腸出名，但有同行者不好，故只點了涼瓜魚腸煎蛋及薑蔥焗魚腸兩味。最後邊吃邊加單，結果共點了十二個小菜加九枝大啤酒，真誇張。 蒜蓉粉絲蒸扇貝：扇貝以傳統的蒜蓉粉絲蒸，朋友說肉質頗韌，但小弟那隻還可以哩。 豉椒炒蜆：蜆隻雖然較小，但炒得頗入味；雖然難以證實是生炒，但至少吃不出烚熟蜆肉再以豉椒回鑊的感覺吧。 椒鹽魷魚鬚：魷魚鬚做得不錯，炸粉份量不過多，火候也控制得很好，沒有太乾太硬；小弟吃得味重，如果椒鹽味能重少許便完美了。 油浸筍殼魚：索價 $55，但筍殼比預期為大。魚身外面炸得很香脆，但魚肉仍然嫩滑，簡單配以香蔥豉油已經很好。 酥炸大腸：豬大腸炸得過火了，太乾身，連內裡的脂肪亦被炸乾了一半，失去原有的油香，

自老友結婚後，無哂自由失自由，出街食飯都難過登天，今晚難得有時間，森記三人組終於重聚，齊齊飲大佢﹗天氣炎熱，我們也不理世俗眼光，褪去上衣食飯飲酒吹水，肥佬無見半年，風采依然，一見到我地三個即時好醒目的話:"三支獅威快快快!"是日特價是椒鹽魷魚鬚，當然唔會錯過，炸得香口，不過略嫌就乾身得濟搞到有0的韌。小炒王是飲酒必點的食物，差不多每次吃飯都例叫一碟佐酒，最喜愛的是佢0的蝦乾夠大隻，吃落脆口惹味，呢碟野有如去酒吧既NUTS一樣，長食長有，由頭帶到尾﹗再來的是醬爆雞中翼，醬汁微辣帶濃烈蒜香，雞翼先炸起再撈汁，上枱仍是皮脆肉嫩，三兩下手腳就俾我地掃哂﹗最後加多個蒜蓉開邊蝦，大大碟，蒜泥滿佈，蝦不算大隻不過味道新鮮爽口，好食﹗骰子聲、歡呼聲及嬉笑聲交織這個晚上，大家也盡興而歸﹗

上個月的窮鬼飯局,地點在觀塘仁愛圍的"森記",這一間隱身在觀塘黑白森林的菜館,以各式魚腸菜式最為馳名.所以是夜以魚腸菜式為主角.個人覺得此"黑森林",比前兩次大局的環境更市井,由巴士站走進來,要經過一條又暗又窄,有如城寨的小巷,內裏環境市井麻甩,好多人來一邊隊啤,一邊玩骰盅.我輩草根去慣街邊檔,當然沒有問題,如果是平日出入高級餐廳的人來到,恐怕嚇到要調頭走.因為魚腸並非人人會吃,兼地理環境不算闊落,如果擺三四圍就有點難度,今次出席人數沒有牛頭角同石硤尾多,一圍人馬剛剛好.雖然是魚腸行頭,其他小炒也不可少,先上檯的是森記小炒王,用韭菜加腰果,蝦乾一起炒,鑊氣十足,爽脆可口,自然是送酒良伴,這夜駐場的啤酒妹是嘉士伯.小弟與千里兄雖然一個愛華頓,一個曼聯球迷,但此一刻敵愾同仇,齊齊不喝"利x啤"嘉士伯.飲風花雪月.森記每夜都會有不同的特價菜式,今夜是沙爹金菇肥牛,$20一客,我們一要就要兩碟.特價始終是特價,不能期望過高.果然此沙爹肥牛味道麻麻.沙爹味不濃,牛肉質素平平.來牌檔吃飯,一些香口如椒鹽的菜式不可少,椒鹽魷魚鬚就做得不錯.脆漿不厚,金黃香脆,魷魚鬚爽口彈牙.油泡田雞用西芹,辣椒同炒

魚腸是一種利錢不多卻工序繁複的食材，香港不是有很多食肆供應用魚腸做的菜肴，就算有大多都祇是魚腸焗蛋。某天收到南瓜兄的邀請，得知原來大排檔林立的仁愛圍，裡面有間“森記”供應多款魚腸做的小菜，雖然我並不是很喜歡吃魚腸，但見機會難逢，於是我臨時決定加入是晚魚腸做主角的晚飯。5月26日（星期二）晚，七點半準時到達，南瓜兄早已在場，其他食友亦陸續登場，幫主見人差不多到齊就準備點菜。當老闆知道目的是吃魚腸，亦問清楚是否有足夠的魚腸給我們吃。點菜時女友打來，難得女友是晚可以提早收工，於是我便叫她來。來到大排檔吃飯，豈可不喝啤酒？是晚的啤酒妹係“XX伯”，我和南瓜兄當然不會捧場，已經婉拒了一次，但她好懂得推銷，她再來問的時候改為推銷另一味道較淡的牌子“風花雪月”，其他人亦沒有意見便叫幾枝大啤先。不用多久，小菜就陸續上檯。小炒王材料十足，有蒜心、菜甫、蝦乾、腰果、韮菜、韮黃等，少少咸，送酒一流；椒鹽魷魚鬚炸得金黃，炸漿不厚，又是佐酒小吃；辣椒田雞雖然連我也覺得不辣，但田雞肉總算嫩滑。跟著主角開始上場，先來的是涼瓜魚腸炒蛋，魚腸的份量不多，未能細嚐，涼瓜新鮮爽口，蛋亦炒得不算老；雞蛋焗魚腸是最慣常見到的菜

今天的飯局是有一個明確的目標，就是魚腸，其實我一世人也真的未試過一餐吃咁多魚腸，真厲害。人到齊，主人家也開始發板點菜了，在這地方，一大班人吃大牌檔，有吃的，當然也要啤啤佢。先來的是以一個小炒王來作熱身，今天此處的小炒王，也是例牌的以蒜心、菜甫、蝦乾、腰果、韮菜、韮黃、薑片及紅椒等炒在一起，炒得香口、乾身，而又熱辣辣的，也當然的好好吃，配合啤酒，真的是一大享受。也來了雙份是夜特價的沙嗲金菇肥牛粉絲，粉絲是普通貨，不煙韌也是預期的了，畢竟也只是大牌檔，金菇跟肥牛的質素也有如水軍鬥海兵，金菇太韌，而肥牛也真的是肥瘦分明得太誇張了吧，但其實也不要緊，只要那沙嗲醬好吃，淨吃軟淋淋的粉絲也會好吃，很可惜，沙嗲味是淡如無味，唯有是勝在夠便宜了。也來一些香口佐酒小吃，椒鹽魷魚鬚，大牌檔出此品，差極有限，魷魚鬚也算是大條的，也爽口而有咬勁，椒鹽重一點會更好，也是好吃，但是若要和東寶的比，也真還有點距離。全晚唯一的辣菜，是我身邊一位如我一般的獨狂辣友點的，是辣椒田雞炒西芹，當然今晚的出品，對我們來說只是在舌頭上抓癢，不太過癮，好處也是抵食夾大件，一碟有十幾條腿，田雞也是嫩滑，而且也在少少的辣味中滲出甜味，

「史記」刺客列傳中，有所謂魚腸劍的故事，刺客專諸將匕首藏在鮮魚的肚內暪過眾人，雖然將目標擊殺，最後也要死於衛兵的矛下....悲狀的故事發展至今天，已演變成數個好食之窮鬼，在一間大排檔下，享用以各式魚類腸臟為題的晚餐，另加風花雪月為名的啤酒和爛gag一大堆。今次的地點是觀塘的森記，在裕民坊巴士總站的附近，以前在這裡上班，那邊仁愛圍有數間熱鬧的大排檔，這森記就是其中一間之一，如只求鑊氣小炒的話，略嫌千篇一律，這裡以主理的魚腸菜譜而馳名，總算有一個主題，所以對怕腥味和內臟之人，今餐倒不太適合了。打頭陣是菜館的小炒皇、特價的芽菜醬汁煮肥牛片、和西芹紅椒爆田雞等，雖然不算十分美味，但以幾十年的店齡底子，其廚房功夫，總不會令人失望。另外來幾道炸物，其椒鹽豆腐、炸鮮魷和九肚魚，外漿炸得香脆，入口不油，內裡的水份卻仍能保存，有此水準，夫復何求?! 可以做的，唯有飲多兩口酒水作贈慶。主角陸續上場，有涼瓜魚腸煎蛋和雞蛋焗魚腸等，都是以雞蛋為輔，配合香口的做法，可減少怕腥者的抗拒心理。前者還加上涼瓜，相對上魚腸份量少了一點，味道上沒有想像中那麼重的甘香，至於焗雞蛋，因為下足料，趁熱下舀了一口，其甘香的味道，

呢日老友放監，飛電call我去吹下水，雖然夜晚有節目，不過都相聚小飲一番，當然又係去森記﹗成個月無來都算是異數，呢晚只係吹水同飲下啤酒，獅威是老拍檔，十三蚊支最佳享受﹗要了特價食物$20的炸魷魚鬚，再加多碟小炒王，咁就傾傾下傾左兩個鐘喇﹗要提提呢個炸魷鬚，大條又大碟，出面好少地方食過咁鬼長的魷魚鬚，雖然廿蚊不過都無欺場，味道很不錯﹗小炒王當然是我的佐酒至愛，我敢說咁多小炒店，做得最好的小炒王就係森記﹗所以次次都係叫佢﹗料多份量多，送啤酒一流﹗埋單百五蚊，是計埋半打獅威的﹗抵食﹗

3月9日爸爸生日，他提議回官塘森記吃飯，我還是第一次去，以前大多數都是去隔壁的新南苑。五個人叫左:炒蜆 - 是日特價，20蚊雞，抵吃~水準也ok~京都牛柳 - 送飯一流，味道不錯西檸雞 - 不好吃，粉太多，肉不夠滑，而且上台時已經涼了，大打折扣椒鹽鮮魷 - 粉薄材料正，好味椒絲腐乳通菜 - 正常味道啤酒一堆...overall還不錯。

我與幾個麻甩老友其實個幾兩個星期就會有一晚約出來吹水飲酒減下壓我地美其名稱呢一晚係 「男士之夜」﹗不過.............好景不常，某老友星期五就要結婚，從此無街出仲要被困﹗所以今晚係最後的男士之夜，我地相約老地方於官塘森記﹗街邊大排檔，我地最鍾意就係坐巴士站一邊的斜路位，風涼水冷又無咁迫，招呼既肥佬一見我地就知熟客，食慣食熟﹗呢度0的小炒又平又好食，十樣有九樣都很不錯﹗男士之夜當然係以酒精為主啦﹗最後一晚，獨身幾十載，想回頭不勝唏噓﹗只有不醉無歸﹗麻甩佬坐埋一齊，骰盅較量在所難免﹗飲完啤酒仲要玩撞酒，四條友四支紅酒，想唔死都難﹗第一碟餸係我最怕既油鹽水雞子﹗佢地個個都話又鮮又好味，唔係雪藏野香得不得了，一陣就食哂﹗我小試一口，都係唔得，內臟既食物我真係食唔到，好腥好呷﹗只有飲杯紅酒沖沖佢﹗炒蜆都算多肉亦無沙，$20特價餸梗係叫啦﹗呢度所有醬爆食物都係好食，呢個醬爆豬頸肉味道辣辣地，送酒佳選﹗又到我唔食既煎魚腸蛋角，佢地話唔腥新鮮又好味﹗某中產人士開始食雪茄，豪氣震天﹗椒鹽魷魚皮脆肉鮮，切得夠厚身咬落軟熟，好味道﹗又係醬爆喇，次次來都食的醬爆雞翼﹗雞翼炸過夠熱夠脆口，蒜味濃，正﹗

幾個星期無來，呢晚又來飲酒作樂﹗ 真係越來越好生意，感覺好似而家呢度仲受歡迎過前面的新南苑，平日夜晚來想搵張枱坐下都難，真誇張﹗ 三個麻甩佬，先來一個椒鹽魷魚鬚，魷魚新鮮彈牙，炸粉薄而脆口，好食﹗ 再來一個栗子雞煲，一上枱已嗅到一陣酒香，份量都不少，雞肉入味嫩滑，栗子好似炸過咁燶燶的，可惜係唔夠腍有一兩粒仲係硬身未熟咁，麻麻地﹗ 飲酒時間再點多個必點的小炒王，次次來都叫，韮菜蝦乾份量足，惹味得來又大碟抵食﹗﹗ 玩骰盎先飲嘉士伯再飲風花雪月，一個月總有一兩次去來呢度，男人老狗都係叫下吹下水放鬆下，咁咪無壓力囉﹗

成個月無來，最主要原因係減肥，見新年就到，相約森記之友又來呢度吹水食飯﹗高談闊論﹗呢晚在百佳自己買定0的紅酒上來，唔想飲啤酒咁full咁飽，點知就咁出事﹗森記都轉左個新餐牌喎﹗唔知係新年加價定係已經加左價，每樣餸大約貴左三至五蚊左右啦﹗我成日來食當然清晰﹗人客多得不得了，連我地坐開既小巴站位都無哂位，要轉左去正門對上的冷巷，真係誇張好生意﹗先來豉椒蟶子，蟶子不算大隻不過勝在無沙亦入味尚算肥美，大約有廿隻左右算係咁﹗西蘭花鮑魚是健康之選，鮑貝仔份量也不少﹗咬落有彈性口感清新﹗呢晚想食得豪0的想叫薑蔥蟹，阿姐叫我地叫例牌就可以，好似$88，一碟上來，例牌份量真係心照，細肉蟹一隻嫌佢寒酸左少少，而家出面大排檔0的例牌已經差不多有兩隻蟹啦，咁樣搞法下次人客仲點會叫呢？好在隻蟹都幾新鮮，肉質鮮甜，唔係真係鬧鬼﹗最後又係隊酒玩骰，玩到大一大，當然要叫個椒鹽雞軟骨同埋雞翼尖送下酒﹗呢兩樣差不多飲酒次次叫，夠大碟又惹味，慢慢坐佐酒之選﹗三條友隊左五支紅酒﹗八點坐到十二點﹗老友飲到貓哂，又打又鬧之下離開﹗