曾記快餐 (已結業)

基本上喺藍田冇咩特別好食，加埋德田東成嗰個花師奶老闆娘同班成日話人有病既伙計，我哋就決定去遠啲既廣田食早餐。曾記係一個不錯既選擇，奶茶好濃好滑，而且又多唔同既餐比你揀，凍飲只係加一蚊。相比起東成嗰啲碟頭飯，雖然細碟啲，但係唔洗成日聽到嗰花師奶喺到"巴巴閉"咁叫你坐邊同埋不停咁鬧啲伙計，的確食都食得安樂好多。仲有喺廣田安裝左兩部電視，你可以一路睇電視一邊慢慢食，唔會俾人眼超超話你食少少嘢霸住啲位，阻住佢做生意。值得一提係廣田嗰到喺熟食中心，所以你可以叫曾記既奶茶，然後叫其他熟食檔既嘢食。

　　今朝又黎幫襯，叫左熱奶茶蛋牛治，老闆娘聽錯野，俾左凍奶茶我。我份人一向都秉持住「和諧包容」嘅心態生活，我當然絕冇詐型照單全收，橫掂天氣咁熱，轉飲下凍飲爽一爽都係好嘅。「尾深」女大學生為左四寶飯鹵水墨魚冇同碟飯分開上而炳到燒味亞叔揸住張刀起勢爆粗嘅不文明態度，響我身上絕對唔會出現。　　飲啖凍奶茶，唔對路，因乜解究咁淡口呢？望一望杯面，原來係Ｄ冰作怪。印象中曾記並無私伙製冰機，佢地用嘅冰粒全部係大袋裝批發交黎嘅。呢種大粒冰會令凍飲快速淡化，杯面仲會好快出現一層水，如果轉用大型茶餐廳嘅碎冰，效果會好飲得多。最好嘅凍飲當然係要用冷藏雪凍或冰鎮方法處理，令凍飲凍得黎唔會水汪汪，更加唔會越飲越淡。對小本經營嘅屋村茶檔，我唔會咁高要求，只不過係發下牢騷姐！　　蛋牛治今日Ｄ長城牌鹹牛肉煎得幾香，蛋就稍為老左少少，ＯＫ啦！

　　住廣田村同康雅苑嘅食家們，相信唔會唔識得位於廣田商場樓上好運街市嘅曾記快餐。幾乎每朝早我都會去幫襯從差不多兩年前１３蚊賣到今年１５蚊份嘅滑蛋牛治加熱奶茶，熱奶茶單上就由７蚊賣到宜家９蚊，雖然加幅都幾得人驚，但係村屋價錢始終俾市區旺舖平一截。　　滑蛋牛治做得並不特別好食，有時指明要滑蛋，硬係煎熟哂俾我。大陸長城牌鹹牛肉，大圓罐十幾蚊貨仔，落入蛋牛治之中竟然變得如此矜貴，係咪真係唔可以俾多一茶匙牛肉我呢？　　我幾乎日日黎，祇係貪佢有無線翡翠同亞視本港兩台齊播電視睇下新聞，又或者悶悶地睇下書，坐下佢果Ｄ輕飄飄嘅鋁凳，仲有當然係因為佢係全藍田最平嘅茶水檔（起碼我真係搵唔到藍田有第二間賣９蚊杯熱奶茶）。　　奶茶中嘅濃茶經常保持高溫，黑白奶沖泡水準自然有保證。最鍾意佢用大隻透明玻璃杯裝，非常有大牌檔ＦＥＥＬ，不過已經係領匯旗下嘅新式大牌檔，有空調，夏天有時仲好凍添。　　呢間曾記最搞笑之處係，Ｄ人鍾意或者記得就寫單，忙緊或者唔記得係唔會寫單俾你嘅，我都已經習慣左行去同是但一個得閒收錢嘅講：「十五！」如果係老闆娘娜姐聽到我咁講，佢就會好盞鬼地對上一句：「收哂！」