影片
港鐵大埔墟站 A1 出口, 步行約9分鐘
繼續閱讀
營業時間
需先預約
以上資料只供參考, 請與餐廳確認詳情
有時想約一班朋友聚舊或者慶祝生日，作為搞手當然唔可以馬虎啦，好似食下啲特色菜、最好係可以靜靜地自成一角、無時間限制、把酒暢談、價錢合理嘅地方就最理想。最後我揀左位於大埔墟嘅一間上樓私房菜，其實今次已經係我第三次幫襯暢和軒食，自從第一次跟朋友嚟過呢度之後，就覺得呢度係幾值得介紹比朋友的，因為呢度合符晒我以上所講嘅條件。我後來上網睇返啲資料先知原來呢度嘅主廚吳師傅亦都大有來頭。做私房菜已經做左好多年，由以前元朗紅磚屋開始，展轉開到嚟大埔，最近仲開多間分店喺火炭，地方更大同埋有包房，咁近我沙田友，下次更加方便我嚟啦。我用WHATS APP聯絡呢度嘅主理人之一莎姐，佢比左幾款菜單我地選擇，除A-D餐外，亦有東江風味宴、懷舊宴和金牌翅席，由$250-$450。我地一行6人就預先訂左個D餐。呢度位於大埔墟廣福里，由火車站行過去都係10分鐘左右，今晚慶祝朋友生日，於是買咗1打啤酒，2枝白酒帶上去，諗住不醉無歸 睇返今次個餐單先，好多都係海鮮，亦有幾樣都係巧手嘢，好似蟹盒，糯米鴨，同埋紅棗糕咁，我地都好期待試下吳師傅手勢。大熱天時我最鍾意飲 冬瓜盅清熱解暑，大大個冬瓜裡面有蟹肉，草菇，湯底清甜得嚟又帶有鮮味，我反而喜歡呢個盅沒有落夜香花，可以清楚品嚐冬瓜哪種入口清甜味道，絕無添加味精。第一道餸係 白松露冰鎮鮑魚，亦都係我最欣賞的涼菜，鮑魚爽口彈牙，鮮味中帶有點松露獨特嗆鼻味道，層次複雜得令人難忘，墊喺底嘅青瓜一啲都唔執輸，撈了松露油後非常香口，原來青瓜遇上松露，兩種味道溝埋一齊先至係呢碟餸嘅精髓。 黃金蟹盒，只睇外表以為係炸豆腐，岩岩炸起嘅盒子聞落好香，究竟金黃色盒子裡係咩嚟，咪就係蟹肉囉，一咬開入面全部係絲絲嘅蟹肉，而不是溝肥豬肉，之前喺深圳金X軒食過金錢蟹盒，覺得不外如是，但呢個真係好香好好食。 七彩炒帶子，配料有西芹、木耳、紅椒、腰果、榨菜，主菜係大過五蚊銀嘅帶子，炒得剛剛好，柔軟細密嘅口感，我覺得這正是帶子嘅最佳食用狀態。糯米鴨絕對係巧手嘢，飽滿嘅鴨身由主理人莎姐一刀界開，裡面嘅糯米滲透左鴨嘅脂肪變得油潤軟燸，飯裡面混有栗子、咸蛋黃，可以想像果種咸香甘甜嘅糯米飯配以鴨肉嘅滋味，盡在不言中。竹笙上素卷作中場休息，清淡之選，沖涮一下味雷。鹹菜胡椒浸大鱔，胡椒配鹹菜本身就係一絕，鹹菜不會太鹹，處理得恰到好處、大鱔身夠粗，皮脆肉彈牙，鱔皮仲好重膠質添。再嚟就係泰式菠蘿蝦，汁底好香椰汁味，亦有九層塔嘅香味做點綴，蝦夠大夠彈牙，菠蘿亦都帶出開胃感覺。底層還有烏冬麵墊底，恕我不懂欣賞，我真係飽到食唔落個烏冬。點飽都好，最緊要食埋個紅棗糕，呢個真係鎮店之寶，濃郁嘅紅棗味，糕身廷身細緻，不膩不黏，女士恩物。
繼續閱讀
吃了一個懷舊宴，整體算是不過不失，但去到最後一味麒麟班片，所謂麒麟班片, 竟是一片雪藏青衣柳，夾著鮑魚菰和素火腿！沒錯，是雪藏青衣柳，鮑魚菰和素火腿! 如整得好吃是沒問題的，但可惜蒸出來班片又沒味又粗鞋，只有胡椒粉味，向女主人投訴，卻說要將貨就價沒辦法！唔好意思都無句，要將貨就價還做什麼私房菜？既然這味菜做不到水準，為甚麼仍放在菜單上呢？把原本的好感拖垮。
繼續閱讀
老友生日飯聚~ 搵左呢度試下! 大家都抱住試下私房菜呀, 試新野既心態~真係食到火都嚟埋~ 點解呢!!! 9樣野~ 得一樣係做得普通喎~ 有冇攪錯呀! (基本上樣樣都好好味!!!)豬肺湯, 又夠味, 豬肺又好食~ (淋身+乾淨)松露鮑魚, 鮑魚做得爽口~ 松露油好香, 青瓜片調味亦不錯! 讚豉油皇乾煎蝦, 香口, 可能有d人會覺得鹹左少少~ 但係我地成枱都飲酒~ 我覺得好正!菜扒魚唇, 有少少似食花爽口花膠既口感~ 可以.自定製椒盬豆腐, 炸得唔夠脆, 冇豆香~ 一般.豬肚雞, 一個完全食師傅手工既菜式~ 好重白胡椒既香味~ 飲落去微辣~ 食完個胃暖暖地~ 好正~ 讚!糯米鴨~ 一D都唔油+肉好淋身, 糯米吸晒肉汁肉香~ 入面仲有栗子~ 好好味呀!!!!!紅燒斑腩, 看似平凡的一道菜~ 比出面多左花椒油既味道~ 好香~ 完全係將佢加左分!以$250一位嚟計~ 真係冇得彈. 酒水飲品自備....... 不收開瓶費.題外話~ 佢d自定製辣椒油好香夠辣~ 有得買. 手快有.......
繼續閱讀
繼今年三月入到屯門三聖村興記嘅海鮮大食遊（http://www.openrice.com/restaurant/commentdetail.htm?commentid=2359446&con=rvw），我哋嘅死佬飯局事隔半年多再搞趟大埔廣福里暢和軒嘅私房菜飯局，幾經艱苦，約咗個幾月先度到個期，有成11件死佬，都算難得 。講番今次嘅暢和軒，都有啲古仔，由吳永皓師傅晌元朗錦田搞起，當時鋪號叫「紅廚」（因食店藏身於一間紅磚屋內），曾經搬過去長沙灣，之後輾轉又搬番入元朗朗屏，不過，吳師傅話紅廚由佢以前啲拍檔搞，佢就同另一個朋友晌度開咗暢和軒，所以餸菜都由佢主理。此外，晌大埔都仲有一間暢和軒（舊墟直街地鋪），細問之下，原本喺佢啲徒弟仔開，只喺做中菜，想食私房菜都喺要搵番吳師傅依檔。餐廳晌廣福里東樂樓，舊唐樓一幢，有少少難搵，無招牌，入咗唐樓一樓先有電閘，但又無鐘撳，吓吓要打電話上去。上到二樓，門口無招牌，又無門牌，撳鐘都喺估估吓 。入到裡邊，地方又幾大喎，裝修就唔多架喇，少少中式字畫、對聯、屏風嚟點綴吓，勝在乾深企理，整個場基本上主要喺3張大圓枱，以及1張細枱。是夜除咗柴娃娃嘅我咃之外，仲有兩枱客。菜單選擇方面，由A-D幾款套餐，以及1款東江風味宴及1款懷舊宴，每位實收$250-$350（只收現金），以一貫私房菜嘅定價屬中間位，而且茶芥全免，酒水亦要自備，但大可放心，廣福里附近大把超市及便利店，到時先買上去飲都未遲，唔使被一啲餐廳晌酒水上劏到一頸血，所以，晌度食划算好多 。咁多款餐裡邊，揀咗個C餐，唔喺價錢嘅問題，喺覺得啲嘢最啱食，又有特色，有炸生蠔，有蟹盒，又有蒸大鱔、圓蹄。成個餐一共9道菜，咪睇佢無炒粉飯麵作單尾，一道糯米鴨份量實在唔喺嘢少，好頂得飽肚，好似我哋11個麻甩死佬，食到尾捧肚走，所以，份量唔使擔心，一定夠你食，以下就等小弟逐道菜同大家分享。 杏汁豬肺湯 廣東人都喺鍾意飲湯先，一嚟就喺兩大窩杏汁豬肺湯加一整兜豬肺，11個人飲完一大碗都仲有得添，雖然杏仁味唔算好濃，但味道清香，而豬肺唔羶，又夠好腍，朋友話蘸啲辣椒油好正，小弟唔嗜辣，沾少少豉油亦覺得好食。 泰式菠蘿蝦初頭睇餐牌以為只喺一道餸，原來仲墊咗唔少烏冬。菠蘿應喺罐頭貨，但鮮蝦又大又爽，汁底好重金不換香味，又帶少少甜，撈埋啲烏冬又估唔到OK喎。 酥炸生蠔 整碟生蠔普遍都屬於大隻，一眼望落就唔只一打，幾多粒就無數過，總之夠每人食到兩隻。炸生蠔外層超酥脆，蠔味亦重，不過，大家一致認為少少偏鹹。 黃金蟹盒 蟹盒就啱啱11件，一人一件唔使爭。咪睇佢平平無奇，成舊炸豆腐咁，一咬開，絲絲蟹肉，絕無欺場，所以，好重蟹味，又炸得甘香，好味！好味！只可惜每人只得一件。 金蒜雙豉蒸大鱔 條鱔好大條，做成蟠龍鱔，賣相夠晒靚，以金蒜、磨豉、豆豉蒸，都好難唔惹味嘞，而鱔肉幾彈牙，帶有少少煙韌感，又油潤，滿滿豉香，實在出色 。 紅燒圓蹄 咁多道菜對圓蹄最有期望，不過，最唔滿意應該喺佢。圓蹄以燉盅上已經失咗個氣勢，同埋似乎太多茨汁，最大問題喺過鹹，亦似乎未做到肥而不膩嘅效果，感覺有啲可惜！ 菜扒魚唇近尾聲喺一道蔬菜類菜式，魚唇印象中好似第一次食，無論外觀，抑或口感，都幾似花膠，軟軟腍腍，煙煙韌韌咁，但有少少腥，要扣一扣分。 糯米鴨 雖然個圓蹄有啲失望，之不過，個糯米鴨則好有驚喜，鴨嘅大細會按人數而定，真想知如果得兩個人會唔會用乳鴿呢？將隻鴨一切開，熱氣上騰，估唔到原來佢喺咁熱辣辣，而且，散出朕朕香氣。鴨內填滿糯米、栗子及蛋黄，鴨肉鬆軟酥香，栗子粉甜鬆化，而糯米飯沾滿油香，軟糯好味，喺成晚最滿意，及最欣賞嘅菜式 。 紅棗糕 最後，喺以一人一件吳師傅嘅手本名作「紅棗糕」作結，紅棗糕燙手熱辣，師傅話完全唔加水或油，所以，棗香味濃，密度高，卻奇怪入口質感較削，否則，喺上佳之作。 生果盤（自攜）除咗酒水要自攜準備，亦可以買啲生果上去作飯後果，勞煩吳師傅操刀幫幫手，佢好好人，非常樂意至極。西瓜 / 哈蜜瓜喺超市貨色，好唔好味唔晌度多講嘞。以$300個價，咁嘅份量，加上菜式及味道，絕對食得過。招呼亦唔錯，不過，樓面主理人（亦喺店主之一）為人較有個性及鍾意乾淨，雖然不時有啲爛gag搞吓氣氛，我哋依班死佬都算好玩得吓，吹水唔抹嘴一類，可是，跟佢似乎唔啱嘴形，搞到冷場連連，暫時放低啲汽水吉罐晌地下，都被佢話我哋褦襶（讀：呢啡） 。成晚好似差佬捉垃圾蟲巡更咁，唉，真喺唔使埋嚟由得我哋癲就得喇！
繼續閱讀
難得樂聚, 家人摯友, 郊遊尋美食。 大埔"暢和軒"松露海鮮會= 冷盤, 母指頭般大鮮鲍加翠綠青瓜片, 爽脆美味, 但唔明同"海鮮會"有什麼関係!青瓜片似更勝鮑魚!杏汁豬肺湯, 糯米鴨, 咸菜浸蟮, 紅棗糕等還可以, 一樣的美味! 泰式菠蘿蝦,淡淡菠蘿幽香,但跟往昔原隻連殼大蝦,難而言喻,醬汁淡薄, 蝦球爽但缺鲜味! 最最名符其實嘅"七彩炒帶子" 鮮豔奪目,色香味全,好! 黃金蟹盒, 薄片丁方, 油温唔夠, 連最後返炸高温迫油的工序也缺, 出來成品,"油淋淋, 軟綿綿", 招牌菜, 失色也! 想像中的 "竹笙上素卷" 高湯煨透素料, 釀入竹笙, 蒸熟,勾蛋白蟹肉琉璃献…但見此刻這菜, 真的大失所望! "難以形容"……今晚缺"食神"關顧, 吃得很飽, 但完全吃不到師傅手藝, 這席菜唔應該係師傅所做! 遺憾也! 還好 地方雅潔,當下能夠舒適寧靜地享受晚餐, 也真難能可貴, 感恩! 感恩!
繼續閱讀