影片
更多
2011-09-27
98 瀏覽
每日返工，都路經洪水橋，見香辣屋嘅招牌俾紅紙蓋住，一直都諗，會有咩嘢餐廳進駐呢？早兩日，終於開估啦，原來係德國餐廳King Ludwig Beerhall。今朝返工，見到招牌嗰棚仲未拆，但係已經貼咗張開幕告示，好，一於趁今日係星期五，約埋兩個同事，走去試吓。德國餐廳，係香港，並唔係新餐廳；第一間係赤柱開，剛剛開業時 (約2002或2003)，tea time去過，飲咗杯Hoegaarden，食咗少少嘢就走咗，對於佢哋嘅食物，印象並唔深刻反而俾佢哋嘅裝修同設計所吸引，如果冇記錯，係當時，要搵一間咁有特色嘅餐廳，確實唔多；及後，分別係尖沙咀同灣仔開分店，但係都無緣再聚。點解今日又咁有興致來試吓呢？原因好簡單，係元朗，應該話洪水橋先啱，要搵間似樣d嘅西餐已經唔多，仲要係一間有d規模、有d名氣嘅特色餐廳就更加係絕無僅有。一心以為佢哋剛剛開業，又點會多人點知我哋一行三人，約九點幾去到，已經見到有唔少車泊咗係度當我哋架車緩緩地駛入去閘口時，已經有個好醒目嘅泊車仔走埋黎，好禮貌地幫我哋泊車；嘩有咁大個停車場都唔止，仲有專人代客泊車服務，正；不過，埋單先知，原來泊車要收$30，並唔係免費不過，$30泊
今朝返工，見到招牌嗰棚仲未拆，但係已經貼咗張開幕告示，好，一於趁今日係星期五，約埋兩個同事，走去試吓。
德國餐廳，係香港，並唔係新餐廳；第一間係赤柱開，剛剛開業時 (約2002或2003)，tea time去過，飲咗杯Hoegaarden，食咗少少嘢就走咗，對於佢哋嘅食物，印象並唔深刻反而俾佢哋嘅裝修同設計所吸引，如果冇記錯，係當時，要搵一間咁有特色嘅餐廳，確實唔多；及後，分別係尖沙咀同灣仔開分店，但係都無緣再聚。點解今日又咁有興致來試吓呢？原因好簡單，係元朗，應該話洪水橋先啱，要搵間似樣d嘅西餐已經唔多，仲要係一間有d規模、有d名氣嘅特色餐廳就更加係絕無僅有。
一心以為佢哋剛剛開業，又點會多人點知我哋一行三人，約九點幾去到，已經見到有唔少車泊咗係度當我哋架車緩緩地駛入去閘口時，已經有個好醒目嘅泊車仔走埋黎，好禮貌地幫我哋泊車；嘩有咁大個停車場都唔止，仲有專人代客泊車服務，正；不過，埋單先知，原來泊車要收$30，並唔係免費不過，$30泊一晚都唔算貴，總好過冇位泊車，或者泊咗車，又要行一段路才返到餐廳；呢嗰停車場，至少都可以泊二、三十部車。
交低架車後，就有服務員引領我哋進入餐廳；未步入室內範圍前，就有一排露天卡位，睇真d，應該係兩排，一排比較貼近餐廳位置，係一張張嘅圓枱，仲有把太陽傘，非常寫意；另一排，就係完全露天嘅卡位，比較簡單，我相信係方便d吸煙嘅朋友。
係左手邊嘅角落，就放咗另一套木枱、木櫈，仲有d木製嘅大車輪、鋤頭，泥扒等等，好有田園氣息，非常精緻。
經過咗呢嗰咁精緻嘅角落，係我哋前面，有一個小型噴水池，唔大個，唔花巧，係水池入面打燈出來，效果突出，係一個唔錯嘅點綴。
再向前行，就入到餐廳嘅室內部份，一入到去，就被前面嘅小舞台所吸引，嗰台唔係好大，但係就足夠俾四個賓妹同賓佬係上面載歌載舞，唱嘅當然係英文歌，亦都接受台下客人點唱，但係就寫明唔接受客人上台客串表演，唔想影響其他客人食慾 (呢句係我講嘅)。出面泊咗咁多車，入面當然都唔少人，雖然未至於滿座，但眼見都有七、八十人，有d兩、三知己把酒言歡，亦有d一家大細，樂聚天倫，各適其適。
未坐低，我哋又被右手邊嘅水吧所吸引，吧頂掛滿啤酒杯，佈局亦酷似酒吧，最吸引就係個嗰生啤機，有六個發光嘅圓形嘜頭，離遠已經可以望到，有嘉士伯、盧雲堡、生力、Hoegaarden同兩隻德國啤Arcobrau；我未飲過Arcobrau，想試吓，但係又驚唔好飲，嗰bar tender好好人，見我猶疑之際，就二話不說，斟咗少少，俾我試吓一呷入口，味道比較濃同甘，近似嘉士伯，唔似Boddington咁滑；試過後，我都係比較喜歡Hoegaarden，因為佢雖然淡，但有一種好幽香嘅味道，加上生啤打出來的泡沫，樽裝係做唔到咁嘅效果；因為Arcobrau有1公升嘅杯 (Hoegaarden只有半公升杯)，所以我就要咗杯1公升嘅Hoegaarden，相入面嗰Arcobrau嘜頭係呃人嘅，哈哈，不過呢杯1公升啤酒，索價$145都唔平。
為咗保持一個理想嘅溫度，佢哋專程做咗嗰凍房，用來擺啤酒桶，仲故意做係bar枱對面，開咗一個窗口，等客人可以睇到入面嘅狀況，雖然我唔懂，但係就覺得非常專業。
既然我已經order咗啤酒，咁我嘅同事兼老友，就只好叫d非酒精飲品，順道做埋司機啦。佢哋分別叫咗一杯藍色嘅Virgin Hawaii同一杯橙色嘅Frozen Novel；話明Virgin，緊係冇酒精啦，入面有菠蘿汁、椰汁、同埋藍色糖漿，唔知d藍色糖漿係咩，不過唔太甜，椰子味比菠蘿味重；至於Frozen Novel，正確來說，係沙冰，有橙汁、桃、同石榴汁，但係呢杯d冰太多，好難啜，味道則以橙汁為主，可能石榴嘅味道偏淡，而桃嘅份量又唔多，所以橙味偏重。
食德國餐，點少得豬手同腸仔，我哋叫咗脆皮燒豬肘、迷你德國腸拼盤同特式澳洲肉眼串燒。最先來的，係德國腸拼盤，有三款，每款兩條，共六條，唔知是否迷你的關係，d腸都比較幼身，長短則約4-5吋；左手邊最淺色嘅係慕尼黑白香腸，中間紅色嘅係維也納腸，左手邊比較深色嘅係紐倫堡腸，當中以紐倫堡腸最濃味，未至於辣，但有點黑胡椒嘅味道，至於另外兩隻腸，都係比較淡味，但分唔出係牛肉還是豬肉，服務員建議我們醮d蜜糖芥辣，但我就比較喜歡食原味；伴碟仲有d酸椰菜同燒薯仔，相信係一貫做法，係餐牌上亦都寫著，不足為其，最特別嘅，係碟底仲有兩塊煙肉，煎香咗，不過本身已經肥，加上墊咗係底，索哂d肥油，肥上加肥，真係肥到食唔到，我諗呢兩塊肥煙肉，真係用來伴碟，唔係供客人食用，哈哈哈。
跟著，就係特式澳洲肉眼串燒，賣相好吸引，一枝成呎長嘅不銹鋼义，义著四件肉眼扒同四粒車厘茄，斜斜地插著係一個特製嘅木架上，支义下面仲有一個圓形嘅鐵架仔，放著一個圓形嘅兜仔，盛載著d燒汁，再下面就放咗隻橢圓形嘅鐵板，上面就放咗d燒薯、西蘭花同椰菜花。睇真d，嗰四件肉眼扒，表面都燒得頗焦，仲有d坑紋係上面，都幾吸引，我哋一人一件，一刀切落去！出事啦！一切開，點解一d紅色都冇，係well done幾乎全熟！天啊！全熟嘅牛扒，如何食呢？算啦，要怪，就只怪我哋落單時冇主動提出要求，但係服務員是否都有責任問一問客人嘅要求呢？
對於全熟嘅牛扒，當然唔會抱任何寄望，食咗一口，冇肉汁，質地比較韌，嚡口，這些都係意料中事，但係不止於此，基本嘅肉味都冇，而且連一丁點肥脂都食唔到，完全唔似肉眼扒，我覺得呢件應該係西冷，絕對唔係肉眼扒；至於嗰燒汁，更加差，味淡如水，其實一件靚牛扒，又何需任何醬汁呢？只要處理恰當，就可以食到肉嘅質地同味道。
正當我哋三人對於第四件肉眼扒”虎視眈眈”之際，一隻脆扑扑嘅豬手，就捧到我哋面前我哋當然再冇閒情逸緻去理會嗰件肉眼扒。服務員今次又係好細心咁幫我哋將隻豬手拆骨，講真，如果冇佢嗰把狗牙餐刀同熟練嘅刀法，一般嘅客人都幾難將隻豬手切開。
望著呢隻劏開咗嘅豬手，大家都有d猶豫，我就毅然义起一件，以身試法；嗰皮可以話脆，但係偏硬，唔係一般乳豬嗰種爽脆，可能由於隻豬手嘅皮比較厚的關係；至於肉嘅質地都可算嫩滑，唔嚡口，味道唔濃，亦唔鹹，脂肪唔多，成隻豬手，都只係都一塊肥膏，食入口，唔覺肥，反而覺得膠膠地，好似食花膠咁嘅咬感，唔錯，係值得一試。
食完，覺得有d意猶未盡，見餐牌上有個特色德國珍寶黑森林蛋糕，足夠2-3人用，就叫咗一客試吓；件蛋糕的確幾大件，有3-4吋厚，我哋就三個人瓜分咗呢件珍寶蛋糕；嗰蛋糕質地好鬆，確實好似海綿咁，不過好散，冇嗰種軟綿綿嘅咬感；至於面嗰層忌廉，亦唔滑，略甜，好似食砂糖咁，唔好食；入面則有三層，中間嗰層係朱古力mousse，一樣唔滑，不過幾香，有朱古力嘅味道，另外兩層，係櫻桃同cream，櫻桃甜中帶少少酸，加上這種忌廉，反而有唔錯嘅味道同咬感，因為依家好多cream都好滑，而且味道比較香濃，配襯呢d櫻桃，反而食唔到佢嘅味道。
其實食完呢餐飯，我哋三個都覺得d食物質素麻麻哋，隻脆皮燒豬肘，都有d特色，可以一試，其他菜色，都不敢寄予厚望；反而覺得呢度可以係一個唔錯嘅飲酒吹水地方，一來呢度提供嘅啤酒種類都頗特別，並不是一般元朗嘅酒吧可以搵到，二來呢度又有live band同有線足球直播，絕對適合三五知己，把酒言歡；所以撇除食物嘅質素，德國餐廳King Ludwig Beerhall係元朗區絕對係一間有份量嘅特色”酒吧”。可惜今晚有揸車，我哋三人未能一齊暢飲，只好擇日重賽，埋單$1,000，每位$333。
張貼
