二鍋頭 (福苑)

營業中

休息中

#熱鍋加火鍋🍲任食兩個鐘請朋友食飯 往往令我費煞思量 要顧住荷包👛 又唔可以餓親人 所以我多數請食放題 budget有預算 朋友胃口幾大都冇問題 最近喺旺角食咗個平靚正火鍋放題-✌️二鍋任食 每人$218/兩小時「二鍋頭」對於我嘅意義 就係先食招牌熱鍋 然後打邊爐 一餐食勻兩種鍋😋😜-🔥火焰鴛鴦鴨煲熱鍋份量大 有三款選擇 雞/鴨/豬手 鴛鴦鴨煲即係鴨同油鴨 即席再點火加熱 㷫烚烚 非常惹味-🥬自助蔬菜丸子粉麵區🍮自助雪糕雪條冷櫃🧃自助飲品櫃放題特色 當然係琳琅滿目嘅自助取餐區 飲品款式多 蔬菜瓜藕 麵食 肉丸 粉麵之類 有成幾十款 甜品有印尼特色口味雪條 本地薑CocoBerry雪糕杯都有 -🥓任點任食火鍋配料牛肉可揀美國肥牛或者本地滑牛 連羊肉都有😬豬肚 土魷 吊桶仔 脆鯇 花枝片 樣樣要啲 食下食下 已經好飽肚 想食得再豐富啲 可以附費追加廣島蠔/鮑魚/和牛之類-📍二鍋頭旺角西洋菜街138號福苑2樓

見幾多人推介嘅放題今日去試試～地點都方便不過要行兩層樓梯原來除咗雞煲仲有鴨煲同豬手煲三款都係任點任食架‼️食完一款再食另一款都冇問題不過我地今日食量應付唔到咁多🤣 就淨係試咗雞煲雞煲好惹味好濃 少少辣帶一點麻 雞件大小適中食完雞煲如果唔食其他煲嘅就可以嗌湯底打邊爐～醬料就係由店員送黎自己調配~我地嗌咗沙嗲湯 惹味帶花生香 湯底仲有啲蝦乾火鍋配料除咗寫紙仔，出面仲有自助區飲品都係喺出面任攞～配料好多選擇 肉類同海鮮都有好幾款食到好飽好滿足🤰🏻 出面仲有雪條攞榴連雪條幾好食好香濃嘅榴連味😋

食左佢個鴨煲，少辣有支竹都好入味唔錯叫半份雞煲佢比成一份我，太多到之後叫冬陰公湯底打邊爐，無辣味都算，竟然啲料唔夠新鮮，放响度攞果啲菜好似餸頭餸尾，啲海鮮就似係原本已經煮熟左跟住個場食邊爐，但係竟然開唔足冷氣囉

今日終於有晚市開放！收工就去咗呢間乜都有得食嘅💁🏻‍♀️二鍋頭，刷返餐先！呢到可以二小時任飲任食，有🐔雞煲、🐖豬手煲、🦢鴨煲同火鍋任食添！👏👏超多選擇！雞煲有🌶大中小辣選擇，而且重係無限添加！每次添加都會整鍋更換，確保味道濃郁👍🏻，洋蔥、芫荽等等··多種配料夠晒入味！豬手煲同樣出色，濃濃既黑椒味，辣度亦剛剛好，肉質QQ彈牙，膠原十足，洋蔥亦帶甜味！不錯👍🏻！如果重未夠飽😅最後點選埋個湯底，點餐紙和自助冷藏櫃，已經有超過60多種火鍋配料選擇，飲品雪糕任取，呢個價錢的確抵食👏👏 ！

12月飯聚，想暖笠笠首選雞煲+打邊爐。 幾個人一齊去食「二鍋頭」，未入到門口已經人頭湧湧，差啲連門口都逼唔到入去。飲品區在收銀處附近的位置，而食物就放在另一邊的鋪內要過電梯才去到。 雞煲份量不算多但入味，而中間大部分是骨頭沒有肉的。基本上食晒就可以請侍應換成邊爐的湯底，然後落單要火鍋料。 選單上的火鍋料選擇不多，而自助區的火鍋料選擇也不多。大部分都是丸類及腸仔，蔬菜類也只有金菇，粟米及時菜等。而且食材補充的速度慢，每次只補少量所以食材區很快便會空了。 整體：服務態度尚可，枱面收拾的速度快。但火鍋料只有第一次落單時的品質是好，特別是肉類。後續再落的品質都換成是差的。但以200蚊左右這個價錢在旺角區能食到飽算是便宜，食物水平不能要求太多。

本身我鐘意周圍食野 ，食評呢家野 我懶 ，但呢間野主打 煲任食 ，但真的普通到爆。 好似屋村酒樓個d咁 又似兩餸飯個d咁 ， 姐系如果你去旺角食野 ，同條女去 就真的吾建議 ，只會無下半場 ，但如果周圍都full booking ，呢間你就去因為方便又吾使等 。如果比我選擇多次 我吾會食law ,吾系錢問題 ，而系打邊爐加雞煲 豬手煲這些 真的好普通 100分滿分 40分law . 雞煲吾似煲 豬手煲 好似食豬 哨咁 ，其他打邊爐野食 吾系無野食你都吾會食個d .唯一讚的 老闆服務態度ok的 其他兼職員工 吾好有祈望

二鍋頭惹味雞煲雞煲既魅力真係好難抗拒！雞煲果種濃郁香甜既紅色醬汁，甜中帶辦同樣充滿椒香，醬汁帶點油份得黎以唔會過油膩。雞件好舊而且肉質唔會好老同乾柴，醬汁平均地被雞件吸引。食完雞煲配火鍋做後續係定律！火鍋底一共有8款咁多，嫌雞煲唔夠喉？仲可以加碼而且轉食鴛鴦鴨煲。火鍋既肉類選擇都幾多，除左豬牛雞外亦有鴨同羊食！仲有海鮮可以選擇。墨魚滑墨魚肉彈牙又帶粒粒墨魚肉，鮮香惹味。雲吞大大粒雪吞充鮮鮮蝦肉，口感豐富彈牙，雪吞皮薄餡料豐滿。鮮滑牛肉滑牛肉香滑唔鞋，咬落唔會無晒肉類既質感，彈牙嫩滑。其他配料都可以再係自選區雪櫃內再擇，款式同樣多而且蔬菜比平時火鍋更多選擇。雪櫃排得整齊而且蔬菜望落好新鮮翠綠又唔會枯黃。食完仲有甜品可以繼續。

臨近冬至前夕天氣開始涼左好多,天氣凍當然要食d暖笠笠既食物！天氣凍左食火鍋雞煲一定係我既不二之選！任食雞煲火鍋二鍋頭惹味雞煲雞煲可以揀辣度,雞煲拎上枱既時候已經感受到一陣陣香味,醬料惹味帶點辣勁.雞件滑嫩而且相當入味,每啖雞肉都充滿雞煲醬.雞煲充滿紫洋蔥,蒜,蔥頭,令雞煲帶一陣甜味.食完雞煲後除左換成火鍋外亦都可以選擇再食多一鍋雞煲.香茜皮蛋鍋湯底清之餘帶住芫茜香而且唔會過鹹膩,以清湯做鍋底啱啱好中和返雞煲鹹膩感.配料分開2個方法選取,用紙去選擇肉料為主既食物或者去自取區選擇丸類或蔬菜類.不論係自取或自選都處理得好乾淨而且種類豐富.

周日，天氣突然凍咗好多，一早收到朋友發來嘅短訊，今晚行完街，去打邊爐🍲，佢鍾意呢間二鍋頭，因為除咗任飲任食打邊爐，仲有雞煲、鴨煲、豬手煲，同埋雪糕🍦都係任食。見到有聖誕🎄限量版海鹽味同埋雲呢拿味雪糕。飲品方面，有基本的罐裝汽水外，還有啤酒、台灣製造的烏龍茶🌱等等，都幾多選擇。我哋先食惹味雞煲🐥，選中辣🌶，麻香撲鼻，夠哂惹味😋。然後轉個火鍋湯底，選咗個滋補藥膳鍋，見到有黨參、紅棗、杞子等藥材，好似好滋補，好啱而家嘅天氣。火鍋配料中，各有所好，我最鍾意脆肉鯇魚片🐟及白鱔片。朋友則是牛魔王，她很享受的美國牛肉及本地牛肉。同埋每次必點嘅響鈴。呢度嘅店員，有禮勤快，招呼周到，要讚一讚。👍

同朋友一齊喺旺角，天氣凍凍哋，我哋都想食啲暖胃嘅食物，朋友話不如食火鍋，咁我舉腳贊成，急速喺人肉電腦裏邊搜尋🔍😆，記起呢間，可以食雞煲又可以打邊邊，就即刻帶朋友一齊上去開餐😆叫咗 $228一個人 嘅「二鍋頭惹味雞煲・火焰鴛鴦鴨煲・黑椒豬手煲，連任飲任食火鍋2小時」，打邊邊 湯底就揀咗「滋補藥膳鍋」😋「二鍋頭雞煲🐓（小辣）」先上，雞肉嫩滑，應該係落咗好多香料，見到就已經有洋蔥、香蔥、芫荽、蒜頭、紅椒，所以非常香口惹味，仲越食越開胃😋。食完雞煲🐓可以再食鴨煲🦤同豬手煲🐷，但係我哋都想快啲開始打邊爐，於是就請店員哥哥將雞煲收走，換上「滋補藥膳鍋」，馬上開始烚吓烚吓😆我哋食咗好多嘢，包括：美國肥牛🐂、脆鯇魚腩、羊肉片🐑、鮮蝦雲吞、脆鯇魚片、白鱔片、鳳城水餃🥟、海蜆、鮮滑牛肉，自助區仲有 響鈴🔔、魚皮、香腸、肉丸🍢、各種蔬菜🥬。呢度 特別好味嘅食物有：鳳城水餃、鮮滑牛肉、白鱔片😋又有雞煲🐓食又可以打邊邊，朋友同我過咗一個好溫暖嘅晚上😊

「全港獨一無二」一次過滿足曬我五個食望…任食羊腩煲🐐➕雞煲🐔、鴨煲鴨🦆丶豬手煲豬➕火鍋🍲任飲各款飲品、任食雪糕雪條！真係越食越抵，越食越正、越食越平⋯⋯——————————-1⃣️羊腩羊腩煲：惹味又香噴噴的羊腩，炆得夠腍、肉質嫩口的滋味⋯⋯✌️———————2⃣️🐔雞煲：春夏秋冬四季都咁惹人喜愛的雞煲，幾時食都係咁滋味👍————————3⃣️🦆鴨煲：好小會有鴨煲食到，仲要係炆得非常入味和惹味，而且鴨肉仲要係好嫩滑👍———————-4⃣️🐷豬手煲：又彈牙又充滿了骨膠原的豬手，香氣撲鼻，味道出色👍————————5⃣️🪵藥膳火鍋湯底：食完五個煲之後，繼續火煱之旅⋯⋯😂———————-多款火鍋料任食：脆肉鯇又爽又脆，元貝大大粒，蝦夠彈牙，又有鵝陽、魷魚、雲吞、腸仔、午餐肉、支竹、羊肉、牛肉、豬肉.饍片、蜆、青囗，仲有原包的出前一定及多款火鍋⋯⋯等等😀————————-飲飽食醉，最後也不能小的甜品，就是我最愛吃的榴連雪條了😂食得満足又豐富的二鍋頭其實開心🥳簡單就在你身邊..。食….拍…寫..已經成為我生活中的一部份鍾意食..鍾意拍…鍾意寫..留下美食回憶🥰———————-

冬天既羊腩煲之約終於成行～一行四人，順便當做冬飯。聽講過二鍋頭唔錯，終於一試….聞名不如見面，去到樓下行上去就已經勁迫！太耐冇見過呢種場面，有啲嚇親！呢度有雞煲同羊腩煲揀，我地目標明確咁要羊腩煲！羊夠羶👍🏼肉質軟綿，好入味！食食下覺得好似爭左啲野喎？！馬蹄呢？？羊腩煲必要既配料呀…其他任食既野就好一般啦…比較推介鵝腸！飲品普普通通啦～該有的都有！整體評分：⭐️⭐️⭐️比個環境嚇親既關係，個人就未必會再黎第二次啦

預約左假日6點，時間算早，但入場時人數都幾乎坐滿，聽到基本上啲客人都有book位，愈夜就愈多人等位。 呢間火鍋幾適合一班人聚會。地方喺旺角中心對面，非常方便。價錢幾吸引，一次過任食雞煲、鴨煲同豬手鍋仲有火鍋。 其實食完雞煲同鴨煲都開始飽。 🤣麻辣雞煲係必點嘅，店員會主動炒雞肉，最正係好快炒完就即時食得。雞肉唔乾柴，非常惹味，之後店員換另一個煲轉食鴨肉同火鍋 。衞生方面做得幾好。Menu 上嘅海鮮款式唔少，有帆立貝、青口、鮮蝦等，推介白鱔、脆魚鯇幾新鮮，口感都爽嫩。另一邊有大雪櫃，有配料任拎， 包括蔬菜類、大量丸類同麵食。 魚皮同響鈴都保持到脆口。 飲品種類幾多，有啤酒汽水、迷你枝裝飲品等等。 雪糕雪條有幾款， 榴槤味雪條、珍珠奶茶味雪條係值得一試。

假日 我同 @greenmilkt_ 去咗就近旺角中心嘅任食火鍋。呢間係火鍋界都幾出名，有齊雞煲、鴨煲、豬手煲同火鍋。 🥘雞煲可以簡辣度，有大中小辣或唔辣，店員會幫我地炒雞件， 雞件嫩滑，份量幾多，仲可以添加炸鳳爪，醬料濃郁，十分惹味。鴨肉用咗花雕調味，遮蓋左鴨肉嘅羶味。鴨煲會有啲火焰，加上大量鴨掌和芫茜。雖然可以任食，我們食咗一大煲就滿足。🍲火鍋點單紙嘅食物除咗有肥牛、羊肉等肉類，海鮮嘅種類頗多，有🦐鮮蝦、蜆、帆立貝同青口等配料，幾抵食。 另設食物自助區，有🍜麵食、多款蔬菜🥬同🍢丸子類，少有啲嘅有萵荀、通菜、泡菜餃子、芝士丸同波波腸都有。 香脆炸魚皮同響鈴都幾脆口，係火鍋必備。🧃飲品選擇都幾多，啤酒汽水、迷你枝裝飲品，個人鍾意竹蔗茅根比較清熱。最後，我哋試咗珍珠奶茶味雪條。

見天氣轉涼﹐同朋友食飯就梗係要打邊爐啦！今次就嚟到旺角嘅二鍋頭食晚飯。一入到去就見到餐廳環境乾淨﹐枱同枱之間唔算好近﹐比咗一個好舒適嘅環境我哋邊傾偈邊食嘢。我哋一開始先食咗黑椒豬手煲﹐荏荏嘅豬手好入味﹐仲帶微微黑椒的香辣﹐鍾意食豬手嘅朋友一定唔可以錯過！食完煲就打邊爐喇～ 我哋揀咗比較濃味嘅豬骨煲﹐一聞到味道已經令我哋食慾大增啦！呢度嘅配料都好多樣化﹐ 豬、牛、羊、雞、鴨、海鮮，內臟等等都有齊。我哋最鍾意食佢個美國肥牛﹐濃郁嘅牛味令我哋不停追加！呢度仲有自助配料吧﹐有唔同嘅菜類、麵類、丸類俾我哋選擇。有咁多嘢食當然唔少得飲品啦~飲品方面都有多樣選擇﹐好似汽水，啤酒各樣。我就最鍾意荔枝烏龍茶，唔太甜而且冇掩蓋到佢嘅茶味！最後就梗係要食甜品。有雪糕雪條自助拎，鍾意食榴槤雪條嘅朋友千祈唔好錯過呀！