黑門市場係大阪人嘅廚房，同樣係香港人嘅廚房呀(笑) 每次去日本都忍唔住去黑門市場掃街，已經一年幾無去過大阪，喺香港都好想回味嗰種味道同氣氛。尖沙咀「黑門水產」嘅老闆之一就喺黑門市場開店，並將當地文化帶埋嚟香港，所以喺度可以食到好多日本地道料理、新鮮魚材。
居酒屋設計好有日本氣氛。
儼如日本水產居酒屋，放工後約朋友濱燒飲酒啱晒。店內設刺身吧，刺身壽司即叫即做。
日本人著重食材本身味道，所以呢度都唔會加入太多調味料，只會簡單引出食材鮮味，特以招牌菜甲羅燒、活貝盛、濱燒，最為突顯呢種日本人精神。
必食甲羅燒！爆多蟹膏大滿足
好多熟客都為甲羅燒而嚟！相比坊間甲羅燒，呢度蟹膏味特別香濃鮮甜、口感更Creamy，唔使花巧食材襯托，單以梳打餅拌甲羅燒已經一絕，可見師傅對自家出品信心。
蟹蓋上放滿蟹膏、蟹肉。
甲羅燒共3款口味—赤鬼明太子蟹味噌、黑門令蟹味噌、海膽蟹味噌。每款甲羅燒都以蟹膏、蟹籽、蟹肉同鵪鶉蛋為主調，赤鬼就加入微辛明太子，食落更刺激過癮；黑門令蟹則著重原始蟹味；海膽蟹味就啱重口味人士，鹹鮮味濃郁。
甲羅燒以日式濱燒上枱，即席喺你面前拌勻燒製，極有日本氣氛。
日本濱燒 活鮑魚邊燒邊郁
相信大家對日本濱燒絕不陌生，日本街頭就有眾多通宵營業濱燒店，放工後同朋友小酌兩杯、燒海鮮已係日本人生活寫照。呢度嘅濱燒比日本絕不遜色，會於日本各地引入海鮮，每日直送到港。
極上黑門活貝盛合集合多款新鮮貝類，食濱燒必點。
個人覺得新鮮貝類嗰種鮮甜味好獨特，非雪藏貨可媲美。所以好推薦黑門活貝盛合—北海鮮帆立貝、活鮑魚、日本岩手蠔、時令貝類。最記得係鮑魚燒嗰陣仲識郁㗎，入口又Q彈，係最為深刻嘅魚材之一。
清森縣網鮑魚燒嗰陣仲識郁！
白貝加咗牛油燒製，聞落好香、貝味最重。但師傅依時令入貨，唔係次次嚟都有㗎。
岩手蠔海水味較重，燒時會以自家海鮮汁提鮮。
師傅親揀當日靚魚材 黑門時令刺身盛
呢度有多款日本魚刺身揀，金目鯛、真鯛、平目魚等。唔想慢慢諗，淨係想食當日靚刺身，就可以揀廚師發辦刺身盛，交畀師傅幫你揀當日最靚魚材，夏天常見有深海池魚、伊佐木、秋刀魚、喜之次、赤鯥等。
今次我哋食呢個黑門時令刺身盛，就有原條輕炙長崎梳子魚、金目鯛、深海池魚、牡丹蝦，主要係夏天當造嘅白身魚。
黑門時令刺身盛以廚師發辦方式，由師傅親揀當日靚刺身畀你。
好驚喜盛合有原條魚刺身！梳子魚魚味唔算濃，但勝在肉質Q彈，輕炙至5成熟入口更香。
拖羅好肥美！
帆立貝相當厚切。
必食: 極上壽司盛合
壽司盛合都係以廚師發辦形式，主要有三文魚、油甘魚、金目鯛、大拖羅、深海池魚、海膽、赤貝、松葉蟹膏、松葉蟹肉等。
壽司盛合相當豐富，兩個人Share 都好滿足。
不容錯過 一系列創意料理
除咗傳統壽司，呢度亦有創意卷物，好似呢道赤鬼海老天反卷，反卷內嘅炸蝦入口時仲微溫香脆，加埋牡丹蝦、鮑魚、青瓜絲、壽司飯嘅多重口感衝撃好過癮。但最重點係秘製辣汁，我會形容為日本嗰種低調辛辣，唔會一下辣到你要飲好多水，係持續有微微激辛感，忍唔住又會想食多件。
炸蝦入口仲微溫香脆，配埋秘製辣汁會忍唔住Keep住食。
師傅亦會不時設計新料理，好似呢兩道一品料理—牛油蒜蓉炒伊勢海老、牛油蒜蓉炒活粒貝，分別以新鮮龍蝦、活粒貝配牛油、蒜蓉炒，入口牛油味重，佐酒一流。如果你係龍蝦控，伊勢海老嘅龍蝦味足以滿足到你；而個人鍾意爽彈口感，活粒貝就完全做到呢種過癮咬口。
牛油蒜蓉炒伊勢海老
牛油蒜蓉炒活粒貝
日式Fusion 黑門令大漁魚子醬脆脆包
創新菜式仲有呢道Fusion菜黑門令大漁魚子醬脆脆包，上枱時麵包依然好脆，配埋豐富香濃嘅魚子醬、海膽、魚籽等材料，作為前菜或佐酒都好滿足。
黑門令大漁魚子醬脆脆包
