講起韓國菜,淨係諗起炸雞同邪惡拉絲?其實韓國人平時食嘢好健康,特別係韓國人一日三餐包括主食或配菜都會飲碗熱湯,好養生㗎!因為每款熱湯都有唔同功效,甚至連解酒湯都有。全店大廚、員工都係韓國人嘅「韓屋」,就將咁地道嘅韓國飲食文化帶嚟香港,日日嚟飲碗熱湯、食個拌飯,直頭好似多咗個韓國屋企咁呀!仲要全部熱湯都無味精、無防腐劑,咁住家Feel 唔怪得叫「韓屋」啦!
![](https://www.openrice.com/userphoto/CMSContent/0/67/00188ED6D559C09F0B21B3j.jpg)
韓國人一日三餐飲呢啲 十幾款韓式熱湯
店主話好想香港人可以食到韓國家常味道,為此真係落咗唔少工夫。全店有過十款熱湯,全部都係用獨家秘方煮製,仲專登由韓國廠家直送大廚自定自家傳統配方湯包嚟香港,就算唔得閒日日嚟「韓屋」飲,遲啲仲可以買湯包返屋企自己煲。
![](https://www.openrice.com/userphoto/CMSContent/0/67/00188FCC4D44C607DD447Aj.jpg)
釜山人最愛!釜山豬肉湯
大廚作為釜山人,就話當地最常飲嘅係豬肉湯,自然成為呢度招牌菜。熱湯係先用豬骨熬成濃湯再放入豬肉同蔬菜,最後會加少少辣調味料同蝦醬,辣辣地又惹味。
![](https://www.openrice.com/userphoto/CMSContent/0/67/00188GB3FDCD0F70BB6FACj.jpg)
因為豬肉湯係招牌菜,店家仲有可愛小豬燈牌,絕對係打卡位。
香港人最愛!薯仔豬排骨湯
店主話香港人特別鍾意呢款薯仔豬排骨湯,而呢款湯嘅豬骨味好濃郁。唔講唔知,原來呢款湯喺韓國係解酒湯嚟㗎,喺度飲完酒再飲碗熱湯都幾正。
![](https://www.openrice.com/userphoto/CMSContent/0/67/00188HB146C5DB052E03D3j.jpg)
韓國人喺夏天飲!蔘雞湯
我哋都知蔘雞湯係韓國傳統養生湯,但你可能唔知原來韓國人係喺夏天,特別係三伏天時飲蔘雞湯㗎!對韓國人嚟講,呢種係「以熱治熱」嘅方法,利用蔘雞湯嘅熱量逼出身體風寒濕邪同降暑。
![](https://www.openrice.com/userphoto/CMSContent/0/67/00188I50F84C4DEE64075Fj.jpg)
韓國招牌食材!泡菜湯
主要係用熟成辣白菜,再加入豬肉、豆腐、蔥等熬煮,酸酸辣辣,鍾意食泡菜嘅人一定鍾意,食晒成碗飯都得呀!
![](https://www.openrice.com/userphoto/CMSContent/0/67/00188J58E6C9D0B022E206j.jpg)
肉味十足!牛排骨湯
將浸泡嘅牛排骨去血水後剁件,加入蘿蔔一齊煮成,熱湯有香濃牛肉味之餘,仲帶蘿蔔清甜。飲湯時記著要食埋牛肉,全部都煲得入味軟腍。
![](https://www.openrice.com/userphoto/CMSContent/0/67/00188KE5B559C65211337Dj.jpg)
石鍋拌飯
除咗熱湯拌飯,呢度拌飯、餃子同炸物都好正。先睇熱辣辣上枱嘅石鍋飯,大廚特別一層米、一層芝士層層疊上,最後鋪上蔬菜而成,令芝士平均沾上每粒米飯,完全係終極邪惡版拉絲呀!雖然多芝士,但「韓屋」依然貫徹食得健康,所以專誠用最少油分嘅芝士,食多啲都唔怕肥啦!
![](https://www.openrice.com/userphoto/CMSContent/0/67/00188LF80ABFBBE5DEB051j.jpg)
韓國拌飯
拌飯一定係韓國家常菜代表之一,主要用各種蔬菜、炒肉、炸海帶等食材,拌勻飯粒入口。多種脆腍口感非常豐富,同時野菜又為肉片解膩,所有食材相輔相成啱啱好。
![](https://www.openrice.com/userphoto/CMSContent/0/67/00188M9BCCB5F430920BD2j.jpg)
十幾款餃子口味 韓國直送
其實「韓屋」可以話係熱湯同餃子專門店,因為韓國人平時太鍾意食呢兩種菜式,所以「韓屋」除咗有熱湯外,仲特別引入十幾款口味嘅餃子,例如龍蝦、人蔘雞、芝士或者傳統口味都有,有煎又有蒸。
![](https://www.openrice.com/userphoto/CMSContent/0/67/00188NB85A2DE2C7E52059j.jpg)
蒸餃子好精緻。
![](https://www.openrice.com/userphoto/CMSContent/0/67/00188O399D82B7AEA539DBj.jpg)
餃子由韓國直送,味道正宗,仲可以煎到外脆內軟。
![](https://www.openrice.com/userphoto/CMSContent/0/67/00188P4A846C189E2F081Bj.jpg)
一個人嚟食又想過餃子口癮,仲可以單點一隻𠻹!三五知己就可以每款口味叫一隻,咩都試下最開心。
炸物湯麵
偶然想放縱一下,呢度仲有炸蝦同炸豬扒,可配各種麵類-素麵、蕎麥麵、拉麵同烏冬,為炸物解解膩。
![](https://www.openrice.com/userphoto/CMSContent/0/67/00188Q9C60A46465A20EB4j.jpg)
湯麵湯底都係無味精。
![](https://www.openrice.com/userphoto/CMSContent/0/67/00188R16945A156219A8FEj.jpg)
炸物香脆又唔油膩。
![](https://www.openrice.com/userphoto/CMSContent/0/67/00188S9B8FF733878C8685j.jpg)
炸豬扒鎖到肉汁,絕對係加分位。
韓屋
地址: 尖沙咀金巴利道69-71A號美園大廈地舖
電話: 26382832