7月份好評餐廳十強
2019-08-06

近期開咗好多間石燒牛扒店,其中有兩間仲迅速打入咗7月嘅十強名單,到底香港嘅牛魔王力量有幾大?呢股熱潮又可以維持幾耐呢?BTW,今個月嘅10強中,有8間餐廳都係首次上榜,作為飲食界一員,實圶樂見有咁多新力軍啊。

第10位  阿里郎熱狗棒(*新上榜)

 圖:sophiawong0127

深受各位泡菜仔女歡迎嘅韓式熱狗嚟到香港,旋即打入十大一啲都唔出奇。呢間熱狗連鎖店本身喺韓國都有超過80間分店,香港店則有8款口味選擇,當中梗係唔少得芝士拉絲系列啦。熱狗包炸得金黃酥脆,入面條腸又有肉汁,仲可以自由揀醬,係吸引嘅。

第9位 FAMA(*新上榜)

 圖:food_enthusiasthkAgnesAu6999

位於大埔嘅工廈餐廳,行田園風格,一入去就有個靚靚綠林打卡位,仲有幾部夾公仔機過下手癮,未食嘢但環境分已經加咗唔少。推介巨型鹹豬手配蕃薯條,外脆內軟啊。而呢度嘅飲品更加係呃like首選,好似Orange& Peach咁,成支反轉雪糕筒插咗喺度,好吸睛。

第8位  雞翼山(*新上榜)

 圖:mandymanlovefoodieadang82027

雞翼山呢間雞翼專門店,多間分店都分別多次上榜,今次就輪到銅鑼灣呢間終於都爭返啖氣。特別介紹下新口味嘅菠蘿油王子,先用牛油炒香雞翼後,再加自家製嘅菠蘿油脆脆,鹹香中帶甜。舖頭另外仲有多款港式風味雞翼,好似檸茶同鹹檸七咁,夠 晒local!

第7位  牛極(*新上榜)

 圖:chow928coiekaka

呢期好興石燒牛扒餐廳,旺角呢間能夠喺芸芸眾多店中突出,相信夠平係原因之一,180g嘅牛肩肉眼油脂分佈平均,肉味又香濃,都只係需要$78就食到。牛扒由師傅以自家製和牛牛油煎至約1成熟,就會放上火山石板交由客人繼續自己燒,唔怪得咁juicy啦。

第6位  快樂小羊火鍋餐廳(*新上榜) 

 圖:hkfoodphoto

餐廳只選用天然牧場放養嘅6個月大幼羊,並以老雞、牛棒骨等36種配料熬製成湯底,陣陣羊肉鮮香。想食到羊肉原味嘅話記住唔好點醬啊。黃金羊王、蒙式烤羊都係推介之選。

第5位 hEat(*新上榜) 

 圖:loveyou713besimple

香港少見嘅地中海菜餐廳,以炭烤爐高溫快速炭燒嚟帶出食材原汁原味,特別推介肉眼扒畀各大牛魔王,有熟成30日或45 日嘅,肉味濃郁,仲要好鬼juicy。至於海鮮控就要試皇帝蟹喇,肉質鮮甜爽口,仲有陣陣炭香味添。

第4位  美滋鍋(*新上榜) 

 圖:天天食好野IE食神俠侶

7月盛夏都無阻大家打邊爐嘅決心,不過呢間嚟自新加坡嘅火鍋店有別於一般嘅舖頭,事關佢哋主打養生美顏湯底呀!以以瑤柱、雞肉、雞腳、豬手豬骨等熬製超過8個鐘嘅湯底啱晒貪靚嘅女生,清甜呢。就算係麻辣湯底一樣係健康版,加入咗唔少中藥去製作㗎。

第3位  磊犇(*新上榜) 

 圖:phonebuslankiman6330

新上榜就入三甲嘅,又係一間石燒牛扒餐廳,價錢親民,白飯任裝,沙律同湯等都係飲嗶,餐廳仲會提供圍裙,等各位論盡豬仔唔會濺污糟件衫。三款牛,三款size,三款醬汁選擇,西冷扒油花最多,肉味最香;牛肩肉質軟腍;磊牛扒則較有嚼勁,牛魔王自己揀心水啦。

第2位  Mamaday

 圖:wngancleetszhin

 上個月第7位嘅小店,今個月躍升至第2位,佢哋個求求其其蒲燒鰻魚蛋包飯實情一啲都唔求其,原條鰻魚啊!加入牛奶炒成嘅蛋好滑,成碟飯好香口。多款甜品亦都相當有誠意,推介天然紫薯蛋糕,軟滑香甜。

第1位  為食龍

 圖:Percytswchachalin

榜首嘅創意壽司店,上個月排第6位。餐廳以恐龍做主題,8款口味嘅腐皮壽司,刻意比日本口味減低咗甜度,多種新鮮配搭比想像中match,冇負皮。另外,呢度仲有日式飯糰,食得辣嘅朋友仔不妨試下川味辣雞飯糰飯糰啊。


文:Kar


關鍵字
報榜
好評十強
十強名單
石燒牛
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
3天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
日本人氣茶室登陸尖沙咀 招牌Tea Set、甜品推介(有片)
2019-09-25