7月份好評餐廳十強
2018-08-12

踏入2018下半年,越來越多新餐廳登場,雖然近來開極都係台式茶飲店,不過本地薑都有唔少有實力又有心嘅食肆!好似7月份打入十強嘅有間都係新面孔,未試過嘅話就要睇睇介紹,即刻同你「高呼」一吓先!


第10位    翁記上海館 (*新上榜)

旺區以外,其實住宅區都有唔少臥虎藏龍,好似慈雲山呢間上海菜街坊小店,門面普通,但味道紮實唔花巧,小籠包多汁餡料多,擔擔麵充滿花生醬香味,小菜、點心同客飯選擇多,份量足又抵食。

圖:MGanisam0685

第9位    茶屋町  (*新上榜)

去深水埗通常都係掃街頭小食或者港式麵食,有一間主打日式鐵路便當嘅新餐廳出現實在幾驚喜!門口同室內裝修充滿日式風情,食物就以平價定食為主,好似咖喱、汁燒魚類、意粉等,亦有抹茶甜品供應。咁多大熱元素,崇日嘅朋友一定鍾意!

圖:Princess637kawail_107


第8位    小島•澳門菜 (*新上榜)

唔少人不時過大海去澳門飲飲食食,因為香港食葡國菜嘅餐廳始終唔多。新開喺時代廣場嘅小島,以澳葡菜自居,有新配搭新做法,好似豬扒包加入馬介休蝦籽滑蛋、芝士馬介休球、蝦籽松露意大利麵等,亦供應地道烤乳豬、葡國雞同葡式煮蜆,有創意又幾特色。

圖:Pcsy晴天霹靂


第7位     篤篤車

今個月微升一級,喺元朗咁多平靚正食肆中要站穩住腳唔容易,車仔麵店亦有唔少競敵。憑住招牌泰式冬蔭功湯底及坊間好少有嘅鱷魚湯底吸引食客,唔少人大讚湯底夠味又鮮甜,而且配料唔吝嗇,有齊元貝、魷魚、蝦仁等海鮮,仲有泰式小食,食多幾次都試唔晒!

圖:Cas.、Molly_Momo


第6位    少爺泰 (*新上榜)

呢間泰菜館新開無耐就上榜,全靠創意!菜式好IG-able,菠蘿炒飯原個打直上,插住兩隻大頭蝦同一串菠蘿,夠晒霸氣!仲配上七味粉、孜然粉同咖喱粉等調味俾你DIY。招牌菜仲有金沙咸蛋軟殼蟹米紙卷、流心芝士蝦波波等,連飲品都非常之浮誇!

圖:FannyChan920snufKEI


第5位    鼎皇臭臭鍋 (*新上榜)

相信麻辣火鍋之後,今年秋冬好大機會興起臭臭鍋熱潮!源自台灣嘅臭臭鍋,即係臭豆腐鍋,湯底有陣獨特發酵酸味,配料就有臭豆腐、米血糕、台灣貢丸、鴨血等地道食材,豆腐入味但可以再臭啲。仲有麻辣鍋、麻油雞鍋等,份量十足亦有風味。

圖:estherlam084蝴蝶結姐姐


第4位    六両三 (*新上榜)

由居港台灣人主理嘅台式餐廳,兩個字形容:用心。牛肉麵湯底熬超過30個鐘,工序相當多,川味紅燒及清燉有兩種做法,但同樣牛味濃厚但飲落順喉,而且唔會口渴。仲有自家製酸菜同自家提煉嘅牛骨髓辣油,配牛肉麵一流!滷肉飯亦推介,肉粒連皮脂,軟滑香口。

圖:FoodieislifeSeobin*


第3位    雞翼山 (*新上榜)

「燒雞翼我鍾意食」呢句歌詞唱到爛,但雞翼就係人見人愛,今年都有唔少雞翼專門店開業,跑出嘅有紅磡呢一間!雞翼口味創意無限,好似玫瑰、鹹檸七、熱情果、檸香山葵蟹籽同避風塘味等,醃足一日即叫即炸,難得玫瑰味香甜又幾得意,吸引唔少雞翼控去試!

圖:sum_jessicalidylidy


第2位    NINETYs

呢間咖啡店果然實力非凡,連續兩個月佔據十強榜第二位!不過真係次次經過都好爆場兼有人龍。今次介紹吓店內咖啡,有fruity及choco blend,由澳洲烘焙商烘焙,最特別係分別配上果仁及果乾,用相反味道突出咖啡特性,咖啡迷可以試試咁飲。

圖:sarahdlaukalindachan


第1位    % Arabica

5月上榜,今個月再返榜首位置!呢間由香港發跡,紅遍京都,到今日全球唔少地方都有分店,人氣實在太強勁!香港店雖然冇上海店咁大咁靚,但咖啡質素完全無可挑剔,香醇濃厚,奶泡綿滑,夠專業而且水準穩定,加上日系簡約型格,難怪人氣一直不減。

圖:sylvasky8866



文:Perrins

關鍵字
十強
好評
咖啡
cafe
雞翼
台灣菜
臭臭鍋
泰國菜
車仔麵
葡國菜
上海菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
4天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
4月份好評餐廳十強
2020-05-07