7月份好評餐廳十強
2016-08-05
果然唔少香港人都係貪新鮮,今個月10強當中有七間都係第一次上榜!不過亦有熟悉嘅名字保持高人氣再次上榜。迎接暑假,唔少上榜餐廳都係啱哂Gathering嘅高CP值西餐廳,另外亦有消暑一流嘅冰品店同果汁店。呢個暑假要搵「好西」,就嚟睇7月10強參考下啦。

第10位   Nun Korean Dessert

韓式甜品店,夏天咁熱係要食下冰嘅。呢度啲冰杯杯都好大杯,有好多款揀,有選擇困難嘅朋友應該好頭痕,不過如果你係抹茶控,建議叫返個宇治金時紅豆雪奶,唔使諗咁多,永遠嘅perfect match,綠茶雪糕上面再有綠茶粉,我見到嘅係,bling bling眼。


Photos by KaterinaLin & eat_eat_everyday


第9位    Kowloon East Kitchen(*新上榜)

又係觀塘工廈餐廳,都係食西餐嘅,平時食開白酒煮蜆嘅,喺度可以試下啤酒牛油煮蜆,都夾㗎喎啲味,鮮甜之中帶有少少麥香。仲有,鍾意流心蛋嘅就啱晒,呢度都有得食。不過唔係原隻食,而係釀咗入意大利腸入面再拎去炸,脆皮、流心,飛佛。


Photos by neicla328 & A5和兔子


第8位    阿麥廚房

第2次上榜嘅阿麥廚房,好多人嚟呢度除咗食ribs同豬手,就係食海鮮。大蝦占米多,係大隻嘅,好彩嘅話隻蝦仲好多膏,啲蝦肉都好爽。另外有個黑松露麵包蟹意大利飯,即係用蟹殼裝住啲risotto,伴埋蟹肉同黑松露,賣相靚得嚟又有特色。


Photos by eatingsally & KS52


第7位    BAKE CHEESE TART

冇見一排,芝士撻又上返榜。雖然而家已經冇咗一開初嗰排瘋狂排隊嘅熱潮,但每次經過Sogo地下,依然見到一個個香噴噴、漲卜卜嘅半熟芝士撻,有時都係會忍唔住買個嚟食。


Photos by Fullfoodie & shing0214


第6位    Pom's Diner(*新上榜)

呢間喺佐敦嘅西餐廳,門面裝修已經先贏一仗,餐牌上嘅嘢食都唔執輸。嚟到最好就食鋸扒,比目魚扒又好、肉眼扒又好,都係大大塊,生熟度剛剛好之餘又能夠鎖住啲肉汁。而原隻炭燒波士頓龍蝦配松露薯條,色香味都齊。


Photos by JoanWong2003 & doublecloud


第5位    白鬍子炸魚薯條(*新上榜)

SOHO區專門賣Fish & Chips快餐店,比中環碼頭總店大而且有位坐。招牌炸魚有多款唔同口味,最特別嘅一定係冬蔭醬,比手掌長嘅炸Hoki魚柳炸至金黃色,炸皮薄脆有冬蔭香味,魚肉亦夠Juicy,配埋粗身薯條成個Package好邪惡。唔夠飽嘅話仲有炸蠔等小食同漢堡揀。最後提多一句,門口放咗部街機,等炸魚嘅時候打返鋪就無咁悶啦。


Photos by fufuchau & orangeondotdot


第4位    K-Net Square(*新上榜)

成班Friend約出嚟想盡興?太子呢間酒吧餐廳可能係其中一個好選擇,有波睇有電子飛鏢玩仲有得唱K!當然,唔單止配套設施好,Dinner Set嘢食都的確相當唔錯,例如厚切鵝肝多士係貨真價實嘅真·厚切鵝肝,煎到啱啱熟脂香誘人。黑松露什菌意大利飯香得嚟醬汁夠Creamy,安格斯肉眼牛扒唔韌有肉香,最後飲多杯酒或者特飲,滿足也。


Photos by xxslws


第3位    Hami Harmony(*新上榜)

呢間裝修非常少女Style嘅西餐廳,居然係藏身於太子酒吧街裡面。店名嚟自店主兼大廚嘅名Hami,雖然Hami之前以手工甜品出名,但餐廳入面嘅主菜亦非常出色。芝士釀春雞唔單止有香草香味,切開烤雞仲有極之邪惡嘅芝士醬流出嚟!其他菜式亦見誠意,意粉係自家製作,意大利飯亦用料十足。最後當然唔少得甜品,蛋白脆餅Colorful又唔硬實,Baileys酒布甸香甜醉人。


Photos by jose77_hk & siu shan


第2位    The Little Corner(*新上榜)

香港夏天天氣熱要食雪糕是常識吧,尖沙咀呢間雪糕店最近就出咗笨蕉杯,即係香蕉牛奶雪糕再加焦糖香蕉同巨型朱古力棒或者半個香蕉朱古力批,雪糕有自然香濃蕉味。另外三款軟雪糕口味分別係酒香同奶甜平衡有致嘅桑莓啤酒;香濃而唔太澀嘅靜岡焙茶,同柔滑帶回甘嘅京都抹茶。注意每日只供應其中兩款口味,想試哂四款就要去多一兩次啦。


Photos by lam.yaan & wingsvincciyceci


第1位    Banabana(*新上榜)

旺角呢間新開嘅果汁店可以一次過滿足到你三個願望!揀水果嘅方法同韓國嘅Beesket類似,先拎支火箭去集齊三個星球,亦即係三款水果,然後飛返去總部交畀店員落單,夠好玩。每款水果都會註明熱量,而且每杯果汁都新鮮即打後仲有張卡註明總熱量同營養成分,夠健康。水果選擇夠多,由大路嘅橙、士多啤梨到少見嘅西藍花都有,自己揀唔到嘅話亦可以留意每日精選或者排行榜,咁就可以自己配搭出一杯夠好味嘅果汁啦。


Photos by hkfoodelicious & joey0914


文:Kar、Cathy

隨時接收最新資訊
讚好OpenRice專頁!
關鍵字
排行榜
甜品
龍蝦
西餐
雪糕
果汁
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
2月份好評餐廳十強
2017-03-06
3月份好評餐廳十強
2017-04-06
迪士尼新酒店餐廳巡禮 米奇造型甜品最吸睛(有片)
2017-04-28
【新店直擊】細味抹茶甜點:御前上茶
2017-04-06
母親節約媽咪嘆Afternoon Tea!五大下午茶推介
2017-04-25
初夏清新之選 酒店芒果主題下午茶
2017-05-19
餐廳資料
更多
收起
本月熱門
全港首間牛角Buffet旺角登場 全日任燒任食和牛(有片)
2018-05-28
台灣排隊三個鐘!虎紋黑糖波霸鮮奶抵港(有片)
2018-05-30
5月份好評餐廳十強
2018-06-08
多倫多知名越式Pho店 銅鑼灣插旗
2018-05-29
日本神級燒肉店中環開業 午市食A5和牛五大部位
2018-06-02