$68 任食素菜!大角咀走肉自助餐
2017-11-03

近年素菜buffet都幾流行,菜式並非只有菜菜菜,好似大角咀新開呢間素菜自助餐餐廳,以腐竹等素食材製作各款素肉菜式,好吸引,餐廳裝修仲幾有田園feel添!

剛成為「素」人嘅老闆羅小姐話,自助餐食物係全部「走肉」,處理素菜嘅廚房亦不會處理任何肉類,素食者可安心!但純素者要注意,部分菜式含雞蛋、牛奶架,所以要留意番菜式旁邊嘅特別標示呀!

餐廳喺最中心位置擺放一大張buffet table,有成30-40幾款食物,有沙律、前菜、炸物、冷盤、熱盤、湯水、甜品、飲品等,好豐富。正式開業後,餐廳會每星期轉換一次款式。

沙律有成3、4款,有薯仔沙律、南瓜沙律、菜絲沙律、地中海沙律,舖頭用嘅蔬菜全部都係本地農場種植!

紫薯雪糕杯、南瓜雪糕杯都幾得意,拎起一個迷你雪糕筒,將紫薯蓉放喺雪糕筒上,影相睇落100%似紫薯雪糕,好cute!

各款冷盤當中,有呢兩款最受客人歡迎嘅(左)皮蛋豆腐、(右)口水素雞。豆腐來自用加拿大非基因改造大豆嘅壹品,豆味又香又滑。口水雞麻而不辣,花椒味濃,腐皮做嘅素雞肉層次分明。

炸物方面有炸番薯、炸三色椒及炸豆腐。炸物都幾大件,略嫌厚粉咗少少,但入面依然juicy。

另有口感清新嘅蔬菜卷、甜而不膩嘅朱古力brownie。

唔少得車厘茄、菠蘿、粟米等經典小食。

至於熱盤,有(左)充滿冬蔭功風味嘅酸辣蔬菜,而(右)咕嚕肉好像真,用素火腿做成排骨,食落亦幾有「肉」感。


以腐皮製成素魚肉嘅煎釀三寶有茄子及三色椒,口感好似之餘,味道亦唔錯,難怪每次都被食客拎清光。

番茄炒蛋雖然簡單,但現場亦幾受客人歡迎架。

其他熱盤有豆卜燴冬瓜、梅菜蒸豆腐。

還有蒸原條粟米、番薯添!

如果想飽肚啲,呢度亦有黃薑炒飯以及炒意粉架!

是日湯水有老黃瓜煲赤小豆,味道同樣鮮甜,而且湯料不少,有老黃瓜、粟米、蜜棗等等。

甜品有木瓜雪耳糖水,都幾足料;木桶豆腐花好嫩滑,旁邊仲有薑糖漿、紅砂糖畀客人自行添加。

飲品方面,除咗水,仲有綠茶、涼茶提供。涼茶款式不時轉換,採訪當日有五花茶。

餐廳refill速度都幾快,所以一個鐘頭嘅buffet絕對夠時間食。

為咗配合素食者口味,所以大部分菜式味道不會太濃郁,如果嫌唔夠味可以睇睇調味架,有tobasco辣椒仔、豉油、黑醋、茄汁、胡椒等等。

餐廳以白色瓷磚牆配水泥牆、落地窗花,再加埋木系傢俬,好有田園風。部分傢俬亦係從倒閉嘅學校圖書館書櫃循環再用,好環保。

仲有少許能觀賞街景嘅吧枱位,天然光線映入餐廳,感覺好cozy。

餐廳仲有兩幅來自芬蘭嘅母女畫家之作,後巷呢幅壁畫更是由年僅15歲嘅女兒Sofia P.親手畫架,食完嘢唔好唔記得呢個影相位呀!

餐廳主張先付款後用餐,而且食完後要自行將餐具分別擺放入不同箱中,方便餐廳處理。

餐廳將於11月5日正式開張,嚟緊11月7日起仲會增加晚市時段添,各位快啲約定friend先啦!

素食自助午餐
供應時間:11:30am-3pm,每次限時60分鐘,星期六及日則限時75分鐘
價錢:星期一至五 $68/位、星期六及日 $78/位
註:不設加一

素食自助晚餐
供應時間:6pm-7:30pm、8pm-9:30pm11:30am-3pm,每次限時90分鐘
價錢:星期一至四 成人$118/位、小童$88/位;星期五至日及公眾假期 成人$138/位、小童$108/位
註:不設加一

走肉‧朋友
地址:大角咀博文街28-30號地舖


文:Joy

關鍵字
素食
素食自助餐
自助餐
buffet
大角咀
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
3天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【3月生日】優惠情報!有折扣仲有生蠔送
2020-03-03