4月份好評餐廳十強
2016-05-06
你哋上個月去咗邊啲餐廳食飯呀?呢10間Top 10有冇去過先?睇返4月份嘅十強榜,有三分一都係甜品嘅世界,睇嚟世人已經唔能夠否認香港人好好好鍾意食甜品嘅事實。另外,有2間相對嚟講比較高檔少少嘅餐廳都有入圍,打破以往多數只係平民化餐廳嘅局面。

第10位 CHOO CHOO

長沙灣火車主題餐廳,入到去兩邊「車窗」播住風景,加上音樂同音效,營造火車旅遊嘅感覺。雖然去外國搭長途火車啲嘢食未必好食,但可以放心嘅係呢間餐廳一定可以「食好西」。

招牌甜品L.J.K繼續受到熱捧,不過其實唔少主菜都相當有水準。例如蘆筍龍脷卷配青醬意大利麵就用啱啱好煎熟嘅嫩滑龍脷柳捲住爽脆蘆筍,青醬香濃之餘亦同魚肉非常夾。白酒煮蜆配多士嘅蜆肉夠大隻,白酒汁香甜又醒胃。


圖:小新與愛麗絲

第9位 飯意主題餐廳(*新上榜)

旺角Fusion餐廳,原來係深水埗以芝士熔岩蛋漿飯出名餐廳嘅新分店。招牌菜當然繼續受到芝士迷歡迎,泡菜炒飯加蛋漿圍邊,再加芝士喺鐵板上即場炒勻,邪惡到一個點!

另外進擊巨橋。濃湯芝士鍋分兩層,上面係豬肋骨同薯格,下面係加咗足料芝士鍋,超滿足。相反如果想減低罪惡感嘅,仲有吉列鱈魚柳蛋包飯、日本甜薯沙律、主題小食拼盤等輕量級滋味選擇。


圖:Nia

第8位 HeSheEat

呢間人氣甜品店已經係第10次上每月10強榜啦!餐廳最近唔單止得甜品,連小食同主菜都有得食,例如炸雞翼、沙律、All-day Breakfast、漢堡、意大利飯等等。

HeSheEat Burger漢堡厚身足料,Juicy牛肉扒配香口大啡菇等,不顧儀態一啖咬落去最滋味。難得主菜好味之餘甜品亦Keep到水準,招牌岩鹽焦糖厚焗鬆餅依然外脆內軟,一試難忘。


圖:Lawrence Lau

第7位 米走雞

香港人鐘意打邊爐嘅程度,係一年四季都可以開住冷氣打,專賣芝士雞煲嘅米走雞再次重新上榜就係實證之一。

黃金芝士雞煲依然係分量十足,一滾起就可以起筷,夾住雞塊芝士牽絲嗰下真係超吸引!記得要快手食,如果唔係好易黐底。食完雞件唔好浪費啲精華,加湯點配料就可以玩烚下烚下,滋味令唔少芝士控都念念不忘。


圖:starki

第6位 CHEF STAGE de Eddy Chu(*新上榜)

細個讀書都成日讀到,香港係一個中西合璧嘅國際都會,連食嘢都體驗到呢種特色!呢間餐廳就以「西餐大排檔」為主題,同唔少西餐廳一樣會用高級食材,但以大排檔百搭嘅精神嚟創造菜式。

松露煮日本年糕以幽香松露白汁配煙韌日本年糕,有驚喜。海鮮黑毛豬肉骨茶就減少咗藥材味,增加海鮮嘅鮮甜味令未食過肉骨茶嘅食客都容易入口。最有香港特色嘅香港豬扒包選用西班牙燒黑毛豬肋條,特別Juicy香口。


圖:ytmxxgiannhui

第5位 南駅(*新上榜)

呢間餐廳話就話主打海南雞飯,不過其實咩國式嘅菜都有,日本西餐意式泰國等等都有,啱晒一大班人嚟食,自己鍾意食式就咩式,唔使話要就住邊個咁。

不過既然人哋出名海南雞,就點都要試下嘅。有兩種雞揀,清遠麻雞或者龍崗雞,唔止雞有得揀,指明想食雞嘅邊個部位都仲得,不過就要加少少錢囉。雞皮薄雞肉嫩,碗飯仲好大碗。啲飯沾滿雞油咁放入口,係香嘅,不過都有啲膩,耐唔耐先犯一次規,唔緊要啦。


圖:wingwingmangreen_brean

第4位 金船長餐廳

金船長餐廳喺上年都入圍過,今年又再度入圍。唔使講,最出名一定係「黑松露馬卡斯芝士夾心薄餅」,每種材料都係咁香,食多幾次都唔會厭。

另外,車仔麵就聽得多,分分鐘你成日都食添。但你有冇聽過車仔意粉?呢度就有得畀你試喇。其實即係有好多種餸同埋汁畀你慢慢揀一碟「你的最愛」,鍾意挑戰嘅朋友就可以乘機試下啲新奇嘅組合喇。


圖:nicolechau20carlilikalai

第3位 漁獲浜燒(*新上榜)

呢間日式燒店都唔平㗎,不過燒親嘅都係新鮮嘅海鮮,而且仲每枱都有店員駐枱咁幫食客燒,又真係要返咁上下嘅價錢嘅。

北海道毛蟹同伊勢龍蝦,大隻得嚟仲好多膏,係吸引嘅,仲好有鮮味,啲肉又好鮮甜,都幾難抗拒。隻龍蝦特別之處係在於個龍蝦身仲混入咗啲甜蝦肉同特製蝦膏一齊嚟燒,令到食嗰陣唔止食到甜,而係幾種層次嘅甜!要豪一餐就唔爭在燒埋隻鮑魚,燒完都唔會太乾身,仲可以保留啲鮮汁……樣樣都好吸引咁樣樣,嗯,下餐食平返少少啦。


圖:siucincindvhmama

第2位 甜入心

連續兩個月入圍十強,仲要躍升至第2位,甜入心嘅實力實在唔能夠睇小。不過佢哋嘅甜品款多兼樣靚,有一系列有特色得嚟又有新意嘅甜品,一個椰皇都有幾款唔同玩法,夾焦糖布甸又得、夾榴槤又得……

普通一個雪糕粒粒山都特別過人,個雪糕係黑松露味!配飯或者意粉就話啫,雪糕味?不過如果你夠膽試,包你對佢另眼相看,出乎意料地都係咁香之餘,都幾夾。鍾意黑松露嘅話,另外仲可以叫多個黑松露鮮菌撻。


圖:yatdingPriscillamoon

第1位 Next Station Dessert

又係Next Station Dessert,分分鐘你哋仲熟過我。講真,佢款款甜品都咁吸引,每次淨係食得一兩三款,真係要去多幾次先試勻。

紫薯同抹茶控都唔使爭,呢度有齊你哋嘅至愛,抹茶心太軟、紫薯窩夫……心太軟真流心,窩夫成塊都係紫色,見到切開裡面個心都係,個心就真係被俘虜晒喇!另外,仲有款焙茶心太軟呀,食得太多抹茶或者紫薯嘅,都可以試下,茶味幾香幾濃。而家香港都慢慢多咗啲焙茶製品,唔知遲下會唔會跑出呢?


圖:舔舔俐peachy.foodie



文:Kar/Cathy

隨時接收最新資訊
讚好OpenRice專頁!
關鍵字
排行榜
甜品
紫薯
抹茶
芝士
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
端午糭動員 新潮口味逐隻數
2017-05-18
尖沙咀區酒店高CP值 宇治抹茶主題自助餐
2017-03-24
人氣北海道芝士蛋糕專門店開café 悠閒嘆日式甜品(有片)
2017-04-12
200%特濃抹茶芝士蛋糕超吸引 孝順仔女必讀母親節送蛋糕指南
2017-04-27
法式餐廳以京都抹茶入饌 有鹹有甜抹茶宴
2017-04-27
【新店直擊】細味抹茶甜點:御前上茶
2017-04-06
餐廳資料
更多
收起
本月熱門
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
6天前
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22