愈嚟愈多表演同體育盛事喺啟德舉行，開飯仔特別為大家搜羅鄰近嘅土瓜灣有咩宵夜好食，睇完show有得醫肚就更圓滿啦～

人氣手工漢堡 SHADI

圖：yummy_gummy、yuchiro

如果早少少完場，可以試呢間區內人氣手工漢堡店，標榜牛肉、羊肉、蝦同雞肉都係自家店內剁碎，每款都係即點即製熱辣辣。最受歡迎嘅100%安格斯牛肉漢堡，醬汁帶黑椒風味，令juicy嘅漢堡扒更惹味，而且同雞堡、羊堡都可以揀雙層，男士都一定食得飽～另外7吋純牛肉腸熱狗、6吋手工薄餅同沙威瑪捲都唔少人試㗎。

街坊通宵茶居 慶發飯店

圖：湯子食家、lymyg

區內屹立多年嘅小店，唔少人會嚟飲夜茶，亦係凌晨收工補充元氣嘅選擇。幾十款大眾口味嘅點心都有供應，包括水晶蝦餃、奄春蛋燒賣、香芋鴨腳扎、馬拉糕等等。如果要飽肚又特別，可以試試鳳凰煎米雞，即係將糯米雞沾上蛋液再煎香，比平時蒸熱嘅做法香口得多。

白種元大讚街坊茶記 陽光餐廳  

圖：9heatogetherfoodie、Redbean45

韓國餐飲界名廚白種元，早年嚟香港拍片時曾探索土瓜灣嘅街坊店，一度令呢間茶記登上熱搜！餐廳24小時營業，除咗供一般茶記有嘅炒粉麵飯，亦有唔少海鮮料理、煲仔菜等大排檔風味菜式，如椒鹽魷魚、蒜蓉粉絲蒸扇貝、炸蠔餅等，幾配合「隨性」嘅環境。

粵式小菜館 富和飯店

圖：Jessischong、andyc1209

如果真係好肚餓，呢間遠啲嘅粵式小菜館仲可以食到雞煲，而且營業至凌晨3am，唔使急急腳咁食。呢度嘅菜式都有大排檔風味，香噴噴嘅雞煲有二至四人套餐，配埋肥牛、紅薯粉等都好豐富。如果想食小菜，惹味嘅蜜糖牛柳粒、椒鹽粟米、小炒皇等都好啱佐酒。

人氣「大牌檔」 楚撚記大排檔

圖：starrychow

想坐得舒服啲嘅話，亦可以試呢間主打大牌檔菜式嘅人氣餐廳。拔絲焦糖香燒脆腩仔以傳統拔絲圍繞脆腩仔，賣相好啱打卡，一齊食鹹鹹甜甜幾特別。另外香煎黑松露手打蓮藕墨魚餅、香濃南乳粗齋煲、炸大腸都邪惡得嚟有特色。

文：Cathy