講起糖水甜品，香港人真係百食不厭～每隔一段時間都總有新嘅小店冒起，帶嚟唔同驚喜。今次就同大家嚴選幾間最新人氣糖水/甜品小店，讓你放工或者假日可以約埋朋友去嘆返個甜蜜時光～
芒果及芋泥主打甜品 甜西施研究所
圖：官方(IG)
一間細細嘅糖水外賣舖，喺荃灣同深水埗都有分店，主打用新鮮水仙芒製成嘅甜品，店內成日都見到一箱箱芒果，保證全部即切即用。必食多芒楊枝甘露，除咗芒果汁仲加咗自家調配嘅椰奶，味道更加突出有層次，每一啖都好實在；多芒小丸子嘅丸子Q彈帶微甜，配埋滿滿新鮮芒果，真係好滿足。佢哋嘅芋泥甜品更加係一大亮點，厚芋泥山野桃膠小丸子綿密香濃，配搭Q彈小丸子同滋潤桃膠，食落層次感豐富；厚芋泥西米露就最啱鍾意傳統口味嘅朋友～雖然舖頭唔大，經常要等十分鐘以上，但性價比幾高，$30幾蚊就可以食到咁有水準嘅甜品，難怪多人專登過嚟支持。
中環日式芭菲專門店 All Day Parfait
圖：呢間喺中環新開嘅芭菲專門店，將日本夜芭菲文化帶到香港，真係好有新鮮感！開放式廚房乾淨企理，可以睇住師傅逐層砌芭菲，好似藝術品咁，而且每杯都會附送手繪材料卡，細節位好用心～必試開心果雙椰脆芭菲，椰殼裝住雪糕，打卡一流，而開心果雪糕濃郁creamy，配埋清甜椰子雪糕非常夾，再加埋煙韌麻糬、無花果同藍莓，口感層次超豐富。另一款四重朱古力芭菲簡直係朱古力迷天堂，脆片、曲奇、蛋糕、冧酒朱古力慕絲同朱古力醬層層堆疊，濃香幼滑又唔會膩；想清新啲可以試Apple Crisp & Lemon Zest Tower，用檸檬蛋白脆餅、烤棉花糖同爽甜蘋果打造酸甜滋味。
法式精緻甜品 Relive Patisserie
圖：micng.hk
由網店開到實體店嘅法式精緻甜品，店舖設計細緻又有格調，將法式甜品同生活點滴融合得恰到好處。甜品款款都精緻到好似藝術品，推介開心果Fans試開心果蜜柑蛋糕，用上意大利開心果做靈魂，由開心果粉、醬料到奶油，多層次咁演繹出濃郁又平衡嘅堅果香，配上日本蜜柑清新又優雅。另一款紅心番石榴紫蘇茉莉花茶撻，紫蘇嘅淡淡香氣反而令番石榴更加突出甜美，再加上花茶香氣，味道有驚喜。泡芙都好推介，每粒表面都有人手逐粒沾上嘅焦糖，咬落外脆內軟，再配上輕盈伯爵茶忌廉，層次感超豐富～
地道高質糖水店 一甜糖水
圖：中式糖水、西式甜品一應俱全，而且價錢親民，$30幾蚊就有交易。必試嘅雙拼雞蛋仔可以揀海苔肉鬆加黑糖麻糬，即叫即做外脆內軟，仲有煙韌麻糬增添口感；芒芒雪糕雞蛋仔就更加邪惡，大球雪糕配滿滿新鮮芒果肉，甜美又飽肚。糖水方面楊枝甘露分量足，芒果肉甜美，配埋西米同金柚酸甜清新，都幾消滯；一甜仙草用料十足，有桃膠、紅豆、芋圓、蓮子同麻糬，口感層次超豐富。仲有開心果露都值得一試，一上枱就香氣撲鼻，入口咬到果仁粒𠻹～
超人氣甜品店 龍糖坊 
圖：銅鑼灣嘅人氣甜品舖喺尖沙咀開設新分店！新店多咗唔少創新甜品款式，必試嘅手工雙皮奶系列之中，牛油果甘露雙皮奶用上新鮮牛油果果肉同漿料，味道清新香濃，配埋奇亞籽更添口感；焦糖娟姍雙皮奶上層脆卜卜焦糖同香滑雙皮奶形成對比，甜而不膩。芒果Fans必食芒果河粉，晶瑩啫喱條狀河粉浸喺芒果汁同椰奶之中，爽滑又清新；想食經典糖水亦唔少選擇，杏仁茶、芝麻糊、核桃糊同陳皮紅豆沙都各有特色。
文：Yanica
編：Cathy
