鼎爺中環再開店! 設散叫手工懷舊家常菜
2018-09-03

李家鼎鼎爺又發功,繼私房菜開業一周年之際,再次喺中環開設新店!今次唔係分店咁簡單,名為鼎.會館,概念、菜式完全唔同,好消息係唔使湊夠一圍先食到,而且設有散叫菜式,不過壞消息係,應該都係好難book!鼎爺話,開店主要因為銅鑼灣店成日full晒,好多人詐型!另一個目的係想將中菜格調提升,要精雕細琢,即使睇落係一般平價菜式,但食落完全唔同味,因為係按住每個步驟、份量,用心炮製而成。



新店位於新食廈H Queen’s內,其實座位都係唔多,但比起私房菜,多咗細枱,二至四人都食到。一入去見到好霸氣嘅鼎字之外,四合院設計加上龍鳳雕花木柱,相當古色古香,加上蓮花水晶燈,好有氣派。落地玻璃更加見盡中環摩天大廈及海景,開揚舒服。



今次唔單止做圍菜,同樣走手工懷舊粵菜路線,但餐牌完全唔同。鼎爺話要照顧中環一班寫字樓客人食飯時間,要快捷方便之餘,味道都好重要。部分菜式用上好靚食材,好似南極蟹、南非鮑魚,亦有好多工序繁複嘅手工小菜,但亦多咗好多家常菜,鼎爺仲做得更巧手更刁鑽添。好似阿爺蒸肉餅,用新鮮脢頭豬肉,鼎爺以自家手法炮製,肉質腍滑,而且加上切得工整又細碎嘅吊片、木耳同馬蹄,令肉餅鬆軟又帶爽口,完全唔乾唔嚡,食得出啖啖心機。

阿爺蒸肉餅 $298


另一道阿爺巧手桑拿雞,係金針雲耳蒸雞嘅升級版,而且可以一雞兩味。新鮮雞肉去骨,八隻雞殼加紅蘿蔔、粟米熬湯,雞肉連同雲耳等配料放上新鮮夏桑葉上蒸,保持肉汁又帶有少少桑葉味,金針以蟲草花代替,有益之餘,亦保留雞肉嫩滑鮮味,仲有絲絲果皮香氣,雞湯亦好清甜。

阿爺巧手桑拿雞 $588


泥鯭湯浸大泥鯭亦好考功夫,四條細泥鯭仔煎香配果皮及鶴斗白菜煲湯,再將魚湯浸熟另外兩條泥鯭,原汁原味兼食到軟滑魚肉,要花時間及耐性炮製。葱香梅菜皇炆和牛肋骨帶中西合壁風味,用美國和牛加大量蔬菜,配以中式八角、香葉、桂皮及薑等,以柱侯醬炆個半鐘至入味。牛肉夠腍帶微微膠質,配上濃郁醬汁,好惹味!

泥鯭湯浸大泥鯭 $680 (兩位用,要預訂)、葱香梅菜皇炆和牛肋骨 每位$298


而最考廚師功架嘅乾炒牛河,鼎爺相當有自信話冇得輸!河粉人手逐條分開,加新鮮牛肉眼、爽身唔出水嘅芽菜,食落有鑊氣又唔油,而且條條分明兼沾滿醬油。

正宗乾炒牛河 $238


古法吊燒片皮雞用新鮮雞醃製後風乾燒香,片出雞皮,配以鵝肝、青瓜及饅頭,食厭片皮鴨不妨轉吓口味!

古法吊燒片皮雞  $698


中環人不時要宴客,矜貴菜式推介葱燒汁脆皮婆參,用澳洲一頭白石參,以鮑魚汁、蝦米、蒜頭等煨透後,加上好薄嘅脆漿炸香外層,真係做到外脆內軟,好少機會食得到!鱆魚鮑魚雞粒有味飯亦夠得體,用八頭南非鮑魚,配上瑤柱、蝦乾、鱆魚等原煲上枱。

葱燒汁脆皮婆參 每位$328

鱆魚鮑魚雞粒有味飯 每位$138(兩位起)


專誠由澳洲入貨嘅水晶蟹,至少2、3斤重,以鵝肝醬、黑椒爆炒,蟹殼帶濃郁甘香,但蟹肉肉質一梳梳,鮮甜有質感。海鮮的話選用本地青龍嘅龍蝦雙式涼拌,起肉後配甜酸醬及泡椒汁,酸甜但又唔搶走鮮味。

鵝肝醬炒南極水晶蟹 $2,380(要預訂)


最後記得要食一碗由鼎爺專登篩選雞骨香蕃薯炮製懷舊蕃薯糖水,黃薑連皮一齊煲,薑味濃又香辣,非常暖心。

懷舊蕃薯糖水 $48


不過鼎爺都話主力會喺私房菜,未必成日會駐場,呢度就交俾經驗豐富嘅中廚李翔師傅,李師傅親自向鼎爺學師多個月,煮法食譜都係跟足鼎爺,唔會走樣。不過價錢都唔平,達中環及酒店級數,特別日子同屋企人來豪一豪啦。親民啲可以食套餐,午市由$398起有八道菜,有前菜拼盤、燉雞湯、蒸和牛、自選三款小菜、飯麵及甜品。 仲有$498同$598兩款揀。晚市套餐最平$688起九道菜,比起鼎爺私房菜價位已經算入門級。


鼎·會館

地址: 中環皇后大道中80號H Queen's 23樓

*5/9正式營業


文、相、片:Perrins

關鍵字
鼎爺
中菜
粵菜
中環
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
兩位台灣媽媽返嚟啦!吃什麼中環新店直擊(有片)
2018-08-25
8月份好評餐廳十強
2018-09-06
4cm厚班戟+招牌刨冰抵港!京都人氣甜品銅鑼灣店直擊(有片)
2018-09-12
日本人氣大阪燒登陸旺角!席前炮製足料大阪燒+廣島燒(有片)
2018-08-30
一年容易又中秋 流心、特色新款月餅巡禮(有片)
2018-09-11