蠔食龍蝦!詳睇尖東酒店自助餐兩大回本位
2017-11-10

尖東一間酒店自助餐以生蠔、龍蝦做最新主題,生蠔、龍蝦一向都受歡迎架啦,buffet迷肯定首先掃左幾輪即開生蠔、龍蝦山,但除咗凍食,餐廳亦炮製咗其他生蠔龍蝦菜式!一定要試勻晒主題菜式先可以回本,究竟有乜食?快速睇一轉!

即刻介紹「生蠔」先!一開始梗係追食生蠔啦,採訪當晚有兩款法國生蠔:Cadoret Oyster、Carantec Oyster。由廚師即開畀客人,好新鮮,每次只限3隻。


兩款生蠔都充滿海水味,但Cadoret Oyster口感比較爽口,而Carantec Oyster就偏向creamy啲。


除咗生蠔,一定要拎莧菜芝士焗蠔,將莧菜、芝士擺放喺蠔肉上面焗製而成,蠔肉keep住鮮甜之餘,仲有啖啖「芝」味。


以生蠔製成嘅蠔湯,蠔鮮味濃而不過鹹。


口感香脆嘅吉列炸蠔,炸粉不太厚,但蠔肉依然好濕潤,仲有少少海水味添!


而另一主角「龍蝦」亦唔輸蝕,餐廳專登砌起呢個好震撼嘅龍蝦山,食客一見到就即刻舉「夾」,雖然refill速度快,但食客嘅瘋搶速度非常快,絕對係回本item!


鍾意龍蝦「肉」感嘅可以食番茄薯蓉芝士焗龍蝦,龍蝦入面仲有啲龍蝦膏架!


避風塘炒龍蝦鉗帶有少許辣勁,好香口。不過客人要自己拆龍蝦鉗,都有少少麻煩。


餐廳仲特別製作日式龍蝦卷,將龍蝦肉連飯、紫菜、沙律醬、蟹籽及香蔥整成壽司樣。


如果想食飽肚嘢,可揀美式龍蝦飯,鮮甜嘅龍蝦汁精華全部流入炒飯之中,yummy!


餐廳即煮喇沙廚房亦換上馬來龍蝦喇沙,肉質彈牙嘅龍蝦配以檸檬草、辣醬、椰奶、黃薑、乾蔥、蝦醬等12款食材,讚!


海鮮番茄粥配龍蝦鉗,除咗龍蝦鉗,仲有大蝦、帶子等海鮮,令成碗粥好有鮮味,但食落都好清淡。



更多【飲食潮流】:
1. 星巴克聖誕系列 兩款迷你布甸杯新登場
2. 糖廠街市集回歸!特色咖啡配街頭小吃
3. 海綿寶寶素食點心 登陸中環尖沙咀(有片)


仲有乜海鮮食?

凍海鮮除咗生蠔、龍蝦之外,其實都仲有5、6款海鮮架,有花蟹、雪蟹腳、麵包蟹、蝦、田螺等等。



刺身方面有三文魚、吞拿魚、油甘魚、三文魚籽及八爪魚;壽司則有一大盤擺放喺枱面,有八爪魚、赤貝、腐皮、青瓜卷、蟹籽卷等等。日式小食有芝麻八爪魚、芝麻豆腐、沖繩水雲等等。


湯水方面,有中式嘅沙參玉竹冬瓜排骨雞湯、西式嘅忌廉蘑菇湯。


泰式沙律都好受歡迎,有蛋沙律、水果沙律、海鮮沙律及菠蘿沙律。


另外仲特別有個沙律廚房,客人揀選蔬菜後可自選十幾款配料,好有「營」。


唔少得即切牛扒,有鮮嫩多汁嘅肉眼扒。


叉燒雞蛋仔,叉燒由酒店另一間米芝蓮二星餐廳香宮炮製而成,口感香脆得嚟又有叉燒嘅咬口。


有乜甜品?

我知有好多甜品控,餐廳甜品都幾多款式,有椰奶斑蘭洋菜凍、開心果法式燉蛋、意大利芝士蛋糕、香橙杯子蛋糕、綠茶孖寶芝士餅、脆脆朱古力蛋糕、法式杏仁小餅、拿破崙、焦糖香蕉蛋糕等等。


Häagen-Dazs雪糕有成12款口味畀你揀包括:士多啤梨芝士餅、抹茶、香檸雪菓、士多啤梨、夏威夷果仁、冧酒提子、咖啡、芒果、意大利芝士餅、曲奇呍呢嗱、紅桑子雪菓及呍呢嗱,勁多選擇。


除咗雪糕仲有frozen yogurt添!


即叫即製嘅法式薄餅,睇下旁邊嘅配料有成十幾款。


即叫即製嘅仲有呢款即焗薑味巧克力伴烤蘋果,大約每15分鐘就會出爐一次。


以巴黎鐵塔盛載嘅macaron,以及新鮮即切嘅水果,款式不時轉換,採訪當晚有西瓜、蜜瓜、菠蘿及火龍果。


自助午餐
供應時間:星期一至四12nn-2:30pm、星期五至日及公眾假期12nn-3pm
價錢:(星期一至四)成人$378/位、小童$278/位、(星期五至日及公眾假期)成人$468/位、小童$318/位

自助晚餐
供應時間:星期一至四6:30pm-9:30pm、星期五至日及公眾假期6pm-9:30pm
價錢:(星期一至四)成人$628/位、小童$498/位;(星期五至日及公眾假期)成人$688/位、小童$518/位


使用OpenRice優惠券最高可享7折優惠,有效期至2017年11月30日
>>>低至7折龍蝦與蠔自助餐優惠,另贈送每位客人歡迎飲品乙杯

Café Kool
地址:尖沙咀麼地道64號九龍香格里拉大酒店閣樓


文:Joy

關鍵字
自助餐
酒店自助餐
buffet
生蠔
龍蝦
尖東
尖沙咀
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
4天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
食肉獸必收藏!牛年到 五間品牛餐廳介紹返
2021-02-11
1月份好評餐廳十強
2021-02-09